2024 2023 2022 Flere år...
16-06-2011
Eqqissisimatitsinermut Avatangiisinullu ataatsimiititaliaq piffissami 17.-18. juni 2011 Maniitsumut tikeraassaaq aluminium pillugu suliniummi aallajangiinissamut tunngavissaq annertunerusumik paasisaqarfigerusullugu
Eqqissisimatitsinermut Avatangiisinullu ataatsimiititaliaq piffissami 17. aamma 18. juni Qeqqata Kommuniani Maniitsumut paasisassarsiorluni tikeraassaaq. Tamanna pissaaq Alcoa pillugu suliniummi ataatsimiititaliap avatangiisinut eqqissisimatitsinermullu tunngasutigut naalakkersuinikkut suliaminut atatillugu.
Alcoa pillugu suliniut aallarteruttorpoq, Inatsisartunilu aalajangiivittoqartinnagu Maniitsumi eqaanilu suliamit aatsitivissatullu eqqarsaatigineqartumit nuna sunnerneqartussaq pillugu ataatsimoortumik aalajangiivinnissamut tunngavissat ersarissarnissaat pingaaruteqarpoq.
17. juni ulloq tamakkerlugu ataatsimeeqattaartoqarniarpoq. Ataatsimiinnerni aluminium pillugu suliniummut Qeqqata kommunianeersut innuttaasullu peqatigiiffii akulerusimasut oqaloqatiginissaat ilisimasaannillu paasisaqarnissaq qulakkeerniarneqarpoq, peqatigiiffiit innuttaasullu taakku suliniummut aalajangiinissamullu tunngavimmut taama isikkoqartillugu isumaqataappata akerliugaluarpataluunniit.
Aluminiumimik suliniut pillugu allaaserisarpassuaqarlunilu saqqummiussisoqartarnikuuvoq, aalajangiivinnissamullu tunngavissat ilaattut ilaasortat qanimut najugaqartunillu oqaloqateqarnissartik kiisalu sumiiffinnik aalajangersimasumik takusaqarnissartik pisariaqartippaat.
Sila teknikilu ajussanngippata Eqqissisimatitsinermut Avatangiisinullu ataatsimiititaliamit kiisalu Aluminium pillugu ataatsimiititaliamit aamma Kultureqarnermut, Ilinniartitaanermut, Ilisimatusarnermut Ilageeqarnermullu ataatsimiititaliamit peqataasut Tasersiaq ulloq 18. juni takusassarsiorfigissavaat.
Tasersiaq sapusiorfigineqartussat marlut ilagaat, taakkulu erngup nukinga atorlugu innaallagissiorfimmit aluminiumimik aatsisivissamik pilersuisussatut ingerlatsisuussapput. Kalaallit Nunaata Katersugaasivia Allagaateqarfialu Tasersiamik takusassarsiornermut atatillugu immikkut ilisimasalimmik ilaatitaqassaaq, taamaalilluni tamatuma kulturikkut oqaluttuassartaata pingaaruteqarnera pitsaasumik paasissutissiinikkut qulakkeerneqassalluni.
Maniitsumi paasisassarsiorluni tikeraarnerup nalaani Qeqqata kommuniani eqqagassalerineq pillugu Ataatsimiititaliaq ilisimatinneqassaaq kiisalu Maniitsumi ikuallaasarfik takuniarneqarluni.
Paasisaqarnerorusukkuit Eqqissisimatitsinermut Avatangiisinullu Ataatsimiititaliami siulittaasoq Jane Petersen attavigisinnaavat, oqarasuaat +299 58 74 19.