2024 2023 2022 Flere år...
17-07-2011
Inatsisartut Siulittaasuata Ataqqinartorsuaq Dronningi Hans Egedep Illuani naapeqatigaa
Ataqqinartorsuup Dronningip nunatsinnut tikeraarneranut atatillugu Inatsisartut Siulittaasuata Josef Motzfeldtip Naalakkersuisut siulittaasuat Kuupik Kleist peqatigalugu kunngikkormiunit tikeraartit ullumi Hans Egedep Illuani naapeqatigaat. Tamanna nal. 11.30 pivoq Annaassisitta Oqaluffiani naalagiaqatigiittoqareermat.
Ataqqinartorsuup Dronningip Kunngikkormiutullu Ataqqinassusillip Prinsip saniatigut Naalakkersuisut Siulittaasuata tullia Jens B. Frederiksen, Ilaqutariinnermut, Kulturimut Ilageeqarnermut Naligiissitaanermullu Naalakkersuisoq Mimi Karlsen Naalagaaffiullu Sinniisaa Mikaela Engell naapeqatigiinnermi peqataapput.
Naapeqatigiinnermi Naalakkersuisut Siulittaasuat Ataqqinartorsuarmut Dronningimut nalinginnaasumik nunatta inissisimanera pillugu ilisimatitsissuteqarpoq, tamannalu pereermat Inatsisartut Siulittaasuat Inatsisartuni sulinerup killiffia pilugu ilisimatitsissuteqarluni.
Paasissutissiiviusumik naapeqatigiinneq akunnerup affaata missaanik sivisussuseqarpoq, tamannalu pereermat Kommuneqarfik Sermersuup rådhusianut ingerlaqqittoqarpoq, tassanilu Josef Motzfeldt Nunatta Eqqumiitsulianik Saqqummersitsiviata siulersuisunut siulittaasutut Nunatta Eqqumiitsulianik saqqummersitsivissaa pillugu illussanik titartaasartunik unammitsitsinerani ajugaasimasoq pillugu Ataqqinartorsuarmut Dronningimut ilisimatitsissuteqarluni.
Josef Motzfeldt
Inatsisartut Siulittaasuat
Paasissutissat sukumiinerusut Inatsisartut Siulittaasuat Josef Motzfeldt angallattagaq 55 76 41 attaveqarfigineqarsinnaavoq.