2024 2023 2022 Flere år...
08-09-2011
Inatsisartut Siulittaasuata Josef Motzfeldtip Islandip Præsidentia naapeqatigaa
Islandip Præsidentia Dr. Ólafur Ragnar Grímsson Islandimi Akureyrimi Universitetip Nuummilu Ilisimatusarfiup suleqatigiillutik Issittumi Inatsisilerineq pillugu isumasioqatigiissitsinerannut nunanit assigiinngitsunit peqataaffigineqartumut peqataanerminut atatillugu Nuummi ulluni 7. - 9. september tikeraarpoq.
Præsidentip Nuummut tikeraarneranut atatillugu Inatsisartut Siulittaasuata Josef Motzfeldtip præsidenti ullumi ullu'qeqqasioqatigalugu naapeqatigaa, tassanilu Inatsisartut Siulittaasuat Præsidentilu qulequttat Kalaallit Nunaata Islandillu ataatsimut soqutigisaqarfii pillugit oqaloqatigiinnissaminnut periarfissaqarsimallutik.
Illuatungeriit immikkut pingaartippaat nunat pineqartut akornanni attaveqaatit pisortatigoornerusut avataatigut Islandip Kalaallit Nunaatalu akornanni suleqatigiinnermi ilisimatusarnikkut qaninnerusumik attaveqarnernik pilersitsisoqartariaqartoq. Issittoq eqqarsaatigalugu ilisimatusarnermut nunat peqatigiillutik nunarsuup sinneranut, minnerunngitsumillu nunarsuup ilaanut nutaanut nalinginnaasumik siusinnerusukkut suleqatigisimanngitsatsinnut, tunniussaqartarnissaat pisariaqarpoq.
Illuatungeriit tamarmik isumaqarput piffissanngortoq Kalaallit Nunaata Namminersulersimanermigut periarfissani nutaat atortariaqarai kulturikkut taamatullu aamma inuiaqatigiinnik nutaaliaasunik ineriartortitsisimanermi minnerunngitsumillu silap pissusiisa allanngoriartornerat eqqarsaatigalugu misilittagaalersimasut tunngavigalugit nunarsuup sinneranut ilisimasaminik tunniussaqarnerusalernissaa.
Inatsisartut Siulittaasuata Josef Motzfeldtip Islandillu Præsidentiata Dr. Ólafur Ragnar Grímssonip Kalaallit Nunaata Islandillu suleqatigiinnerata ineriartorteqqinneqarnissaanut annertuunik periarfissaqarsoraat, tamannalu tunngavigalugu suleqatigiinnerit pioreersut suleqatigiinnissamullu periarfissat nutaat tapersersortuarniarlugit. Tamanna pillugu oqaloqatigiinnerit piffissami qaninnermi Islandimi nangeqqinneqarnissaat isumaqatigiissutigineqarpoq.
Josef Motzfeldt
Inatsisartut Siulittaasuat
Paasissutissat sukumiinerusut Inatsisartut Siulittaasuat Josef Motzfeldtimut angallattaqaq 55 76 41 attaveqarfigalugu pissarsiarineqarsinnaapput.