Nutaarsiassat

13-01-2012

Inatsisartut Siulittaasuat Josef Motzfeldt Dronningip naalagaaffeqatigiinni qullersatut ukiunik 40-nngortorsiorneranik nalliuttorsiutiginninnermut peqataavoq

Dronningip nalliuttorsiorneranik Folketingimi malunnartitsiniaaneq

Ulloq 10. januar sapaatip akunnerani matumani Dronningip taamatut atuuffeqarnerminik ukiunik 40-nngortorsiornera malunnartinniarlugu pisortatigoortumik nalliuttorsiualaarnerit aallartillugit Folketingimi malunnartitsiniaanermi peqataavoq. Nalliuttorsiualaarnerit taamaalillutik aallartinneqarput danskit inatsisartuisa ataatsimiittarfiani Ataqqinartorsuup Dronning Margrethep ilaqutaasalu pulaarneratigut. Tamatumani Folketingip Siulittaasua Mogens Lykketoft folketingi sinnerlugu Ataqqinartorsuarmut Dronning Margrethemut oqalugiarpoq ulloq 15. januar ukiunik 40-ni dronningiusimanerata nalliuttorsiutiginera aallartillugu. Tamanna pereermat Inatsisartut Siulittaasuat Christiansborgimi Landstingssalimi ilasseqatigiinnermut peqataavoq, tassanilu kunngikkormiunik oqaloqateqarnissaminut periarfissaqarluni.

Inatsisartut Siulittaasuata ilasseqatigiinnermi ilaatigut Kunngissaq Frederik oqaloqatigaa. Kunngissap tamatumani ersersippaa meeqqanut sisamanut ataataanini assut nuannaralugu, ilaqutariinnertillu meeqqamillu sisamat ineriartornerat malinnaavigalugu pilluaatigalugu.

Ulloq taanna kingusinnerusukkut Inatsisartut Siulittaasuat  folketingimut ilaasortat pisarnertut ukiumoortumik nalliuttorsiualaarnerannut peqataavoq, tassanilu Ministeriunermik Helle Thorning-Schmidtimik Folketingimilu attaveqarfigisartakkanik allanik oqaloqateqarnissaminut periarfissaqarsimalluni. Ministeriunerup tamatumunnga atatillugu ilaatigut ilisimatitsissutigaa nunatsinnut tikeraarnissani assut qilanaaralugu, kisiannili aamma oqaatigalugu tamanna siusinnerpaamik pisinnaasoq juulip aallaqqaataani Danmarkip EU-mi siulittaasuutitaqarnera naanerata kingorna.

Frederiksborgip illussaarsuani Inatsisartut qalipagaataannik saqqummersitsineq

Inatsisartut Siulittaasuat ulloq 11. januar Frederiksborgip illussaarsuani naalagaaffiup oqaluttuarisaaneranik katersugaasivissuarmi Det Nationalhistoriske Museumimi immikkut saqqummersitsinerup "Regenten i 40 år" ("Naalagaaffiup qullersaa ukiuni 40-ni") ammarneqarnerani peqataavoq. Nunatsinni Inatsisartut saqqummersitsinermut tassunga aamma tunniussaqarput, tassami Namminersornerulernermik inatsimmik tunniussinermik Bodil Kaalundip qalipagaa Inatsisartut ataatsimiittarfiata silataani majuartarfiit eqqaanni ulluinnarni nivingasartoq atukkiunneqarsimammat. Bodil Kaalund saqqummersitsinerup ammarneqarneranut aamma peqataavoq. Qalipagaq taamaalilluni maajip ulluisa aallaqqaataata tungaanut atukkiunneqarsimavoq. Qalipagaq siusinnerusukkut atukkiunneqarsimanngilaq.

Saqqummersitsineq Ataqqinartorsuarmit Dronning Margrethemit ammarneqarpoq. Saqqummersitsinerup ammarneqanngitsiarnerani saqqummersitsineq nalliuttorsiutigineqarpoq kiisalu naalagaaffiup qullersaanik nalliuttorsiutiginninnermut atatillugu Niels Strøbekip qalipagaa nutaaq uleerneqarluni. Dronning Margrethe Frederiksborgip illussaarsuani nalliuttorsiualaarnermi uini Prinsi aamma Kunngissakkut Prins Christianilu ilagai. Niels Strøbekip qalipagaani danskit naalagaaffiup qullersaatut maanna qullersarisaat Dronningi kingornussisussaalu Kunngissaq Prins Christiaallu ataatsimut qalipanneqarsimapput. Prins Christianip taamaalilluni aamma aanani Dronning Margrethe ikiorpaa qalipakkamik uleersinerani. Nalliuttorsiornermut atatillugu qalipagaq taanna saqqummersitsineq naammasseriarpat Frederiksborgip illussaarsuani aalajangersimasumik nivingasussanngussaaq kunngikkormiut assinginik qalipagaasarsimasut allat sanileralugit.

Saqqummersitsinerup ammarneqarnerata kingorna ilasseqatigiinnermi Inatsisartut Siulittaasuata Prins Christian, ilasseqatigiinnermut peqataasut akornanni nammineq angalaartinneqartoq, aamma oqaloqatigaa. Prins Christianip ilaatigut Inatsisartut Siulittaasuat kiseeqaluni oqaluttuuppaa nammineq aamma namminerminni inatsisartut siulittaasuata asserpiaanik annoraaqarami. Prins Christianip oqaloqatiginerani Kunngissaq aamma takkuppoq qaquguussanersorlu qimusseqatigiissinnaanertik eqqartorlugu. Prins Christian erseqqilluinnartumik arajutsinaveersaartuuvoq inunnik oqaloqateqarnissaminik nuannarisalik, taamatullu aamma paasinarluni taamak suli meeraatigigaluarluni angajoqqaami nunatsinnik soqutiginninnerannik ilisimasaannillu kingornussiumaartoq.

Nunatta sinniisoqarfiata Canadallu aallartitaqarfiata suleqatigiillutik naalagaaffiup katersugaasivissuani Nationalmuseumimi kulturikkut aaqqissuussinerat

Frederiksborgip illussaarsuani aaqqissuussinerup kingorna Inatsisartut Siulittaasuat naalagaaffiup katersugaasivissuanut ingerlaqqippoq. Tassani nunatta sinniisoqarfia canadallu aallartitaqarfia suleqatigiillutik aaqqissuussisimapput puisinniartarneq qitiutillugu, puisillu amiinit nioqqutissianik nutaanik kusanartumik takutitsiviusumik. Aaqqissuussinermut tassunga nunat allat aallartitaat arlallit peqataapput, taamaaliornikkut neriuutigineqarluni nunarsuatta ilaani puisit amiinik iluaquteqarniarnermik isorinninniarfiusartuni aamma paasineqassaq puisit amiinit nioqqutissiat kusanaannaratik aamma iluaqutiginiarneqarnerat piujuaannartitsinermik tunngaveqartoq.

Namminersorlutik Oqartussat ukiortaami ilasseqatigiissitsinerat

Ulloq 12. januar Inatsisartut Siulittaasuat nunatta aallartitaqarfiani Namminersorlutik Oqartussat ukiortaami ilasseqatigiissitsinerannut peqataavoq.

Dronningimut sassarneq

Ullumi tallimanngornermi ulloq 13. januar ualikkut Inatsisartut Siulittaasuat Naalakkersuisut Siulittaasuat peqatigalugu Dronningimut sassassapput tassanilu Dronningip nalliuttorsiorneranut atatillugu nunatsinniit pisortatigoortumik tunissut ilisaritinneqassalluni. Nunatsinniit pisortatigoortumik tunissut tassaavoq niaqorutaasaq kuultimit nunatsinneersumit suliarineqarsimasoq nunattalu ujaraanik pinnersaasersugaasimasoq, kuultimit pinnersaasiortartumit Nicolai Appelimit Ina Rosing ikiortigalugu suliarineqarsimasoq.

Ataqqinartorsuup Dronning Margrethep pisortatigoortumik nalliuttorsiutigineqarnera

Sapaatip akunnerata naanerani ulluni 14. aamma 15. januar Danmarks Radiop tusarnaartitsisarfissuani

Nalliuttorsiutiginninnerit sapaammi ulloq 15. januar ingerlaqqissapput Christiansborg Slotskirkemi naalagiaqatigiinnermik unnukkullu Christiansborgip illussaarsuani nereqatigiinnermik, aamma TV-kkut toqqaannartumik aallakaatinneqartussamik, naggaserneqassallutik.

Josef Motzfeldt

Inatsisartut Siulittaasuat

Paasissutissat sukumiinerusut Inatsisartut Siulittaasuat Josef Motzfeldt angallattagaq +45 24423406 attaveqarfigalugu pissarsiarineqarsinnaapput.