2024 2023 2022 Flere år...
24-01-2012
Inatsisartut Siulittaasuat Josef Motzfeldt Tromsømi Arctic Frontiers (Issittumi tikitat nutaat) qulequtaralugu ataatsimeersuarnermut peqataavoq
Inatsisartut Siulittaasuat Josef Motzfeldt januaarip ulluisa 22-ianniit 24-annut nunarsuatta avannaarsuani nukissamik iluaquteqarniarneq sammillugu Tromsømi ilinniarnertuut atuarfissuanni Issittumi tikitat nutaat Arctic Frontiers qulequtaralugu ataatsimeersuarnermut peqataavoq. Ataatsimeersuarneq taamatut qulequtaqarluni ataatsimeersuarnerit arfinilissaraat.
Siulittaasoq ataatsimeersuarnermut peqataavoq Nunat Avannarliit Killiit Siunnersuisoqatigiiffiata (NAKS) siulittaasoqarfia sinnerlugu NAKS-illu siulittaasoqarfiata ataatsimiinnissaanut Københavnimi ingerlanneqartussamut atatillugu.
Ataatsimeersuarneq peqataaffigineqartoq qulequttanut marlunnut avinneqarsimavoq, tassa nukissiornermi isumalluutit iluaqutiginiarneqarnerisa naalakkersuinermut tunngasortaanut, taamatullu aamma sammineqartumi ilisimatuussutsikkut ilisimatusarnernut tunngasortaanut. Inatsisartut Siulittaasuat ataatsimeersuarnerup naalakkersuinermut tunngasortaanut peqataavoq. Ataatsimeersuarnermut peqataasut tassaapput issittumit tamarmit suliniaqatigiffiit naalakkersuisutiguunngitsut, atorfillit, ingeniørit, ilisimatusartut naalakkersuinermillu suliallit.
Issittumi nukissiornermi isumalluutit iluaqutiginiarneqarnerannut tunngasinnaasut tamarmik ataatsimeersuarnermi tikinneqarput. Ataatsimeersuarnerup naalakkersuinermut tunngasortaani inaarutaasumik oqallinnermi nukissamik iluaquteqarniarnerup piffissami qaninnermi ungasinnerusumilu innuttaasut inuuniarnikkut atugarisaannut ulluinnarnilu inuunerannut sunniutigisinnaasaat sammineqarput.
Ataatsimeersuarnerup ingerlanerani Inatsisartut Siulittaasuat peqataasunik assigiingitsunik naapeqateqarnissaminut periarfissaqarsimavortaaq. Inatsisartut Siulittaasoqarfiata qanittukkut isumasioqatigiinnissaanut Norgemi inatsisartunut Stortingimut tikeraarnermut atatillugu pisussatut pilersaarutigineqartumut atatillugu Inatsisartut Siulittaasoqarfiata saamit inatsisartuinut Sametingimut pulaarsinnaanera misissorneqassasoq siulittaasoq saamit inatsisartuisa siulittaasuata tullianik isumaqatigiissuteqarpoq. Siulittaasoq taamatuttaaq Canadami kuussuup Mackenziep akuani nagguativut inuit Inuvialuit Piniagassanut tunngasunut Siunnersuisoqatigiivisa Inuvialuit Game Councilip aallartitaanik Frank Pokiakimik ilisimateqatigiiffiusumik naapeqateqarpoq, nukissamik iluaquteqarniarneq eqqarsaatigalugu ilinniartitaanerup taakani qanoq ingerlanneqarsimanera pillugu, nunarpullu eqqarsaatigalugu tamatumani ilinniartitaanikkut pilersaarutit siulittaasup ilisimatitsissuteqarfigalugit.
Inatsisartut Siulittaasuata ataatsimeersuartarnernut taakkununnga Tromsømi ingerlanneqartartunut, siunissarlu eqqarsaatigalugu pingaaruteqaleriartuinnartussanut issittumilu ilisimatusarneq eqqarsaatigalugu qitiulersussanut, nunatsinni naalakkersuinermik suliallit kiisalu inuussutissarsiortut suliffeqarfiillu susassaqartut siunissami pingaartitsinissaat sinniisuutitaqartarnissaallu ilunngaarmik kaammattuutigaa.
Josef Motzfeldt
Inatsisartut Siulittaasuat
Paasisutissat sukumiinerusut Inatsisartut Siulittaasuat Josef Motzfeldt angallattagaq +45 24 42 34 06 attaveqarfigalugu pissarsiarineqarsinnaapput.
Arctic Frontiers pillugu paasissutissat sukumiinerusut uani nassaarineqarsinnaapput http://arcticfrontiers.com/
