2024 2023 2022 Flere år...
08-02-2012
Naalakkersuisunut Inatsisartullu siulittaasuannut inissianik pisineq
KNR-ip radioaviisia ulloq 7. februar 2012 pineqartoq pillugu ilanngussaqarpoq. Radioaviisikkut ilanngussaq tamatuma kingorna KNR-ip nittartagaanut ilanngunneqarpoq "Demokratip aqqani tamanna akuersaarneqarsinnaanngilaq!" qulequtaralugu.
Ilanngutassiami naalakkersuinikkut pissutsit pillugit oqaaseqartartoq Jakob Janussen oqaaseqar-tinneqarpoq innuttaasunik kukkusumik ima isumaqalersitsisinnaasumik suliassaq manna inatsisit naapertornagit Aningaasaqarnermut Ataatsimiititaliami suliarineqarsimasoq.
Aningaasaqarnermut Ataatsimiititaliap qangaaniilli suliassanik ingerlatsisarnermi ammasumik paa-siuminartumillu pisarnissaa pingartittuarsimavaa, taamaattumillu ataatsimiititaliap aalajangiineri tamarmik ingerlaavartumik ataatsimiititaliap nittartagaani tamanit takuneqarsinnaasunngorlugit saqqummiunneqartarlutik. Aalajangiinerit ilaat ingerlaannaq saqqummiunneqartarput. Aalajangii-nerit allat aatsaat kingusinnerusukkut saqqummiunneqartarput, piffissaanngitsukkut saqqummiun-neqaraluarunik assersuutigalugu pisortat karsiisa aningaasatigut annaasaqarnerannik malitseqar-sinnaasutut nalilerneqarunik. Tamanna ukiorpassuarni nalinginnaasumik suleriaasiusimavoq.
Tamanna tunngavigalugu paatsuugassanngitsumik erseqqissarneqartariaqarpoq aningaasaliissu-teqarnissamik suliassaq manna aningaasaliissuteqarnissamik suliassat allat Aningaasaqarnermut Ataatsimiititaliap suliarisartagai assigilluinnarlugit suliarineqarsimammat. Suliami matumani ataatsi-miititaliap allaat suliassap ilaanut isummernissani kinguartikkallarsimavaa paasissutissanik suku-miinerusumik pissarsiniarnermini.
Taamatuttaaq tupinnartuliaanani, asuli pinerunani demokratiimilluunniit sumiginnaanerunngilaq Aningaasarnermut Ataatsimiititaliami aningaasaliissuteqarnissamik suliassaq isertussaassaagal-lartutut suliarineqarpat. Tamannami naapertuulluinnartumik nassuiaatissaqarpoq. Suliassamut matumunnga ilaavoq illumik aalajangersimasumik pisinissamut aningaasaliissuteqarnissamik qinnuteqaat. Ingerlaannaq tamanna saqqummiunneqarsimassagaluarpat illumik pineqartumik pisinissaq annertuumik akitsorsarneqarsinnaasimassagaluarpoq, illumik tunisisussap pisisussamut aningaasatigut killissaritinneqartut ilisimasimassagaluarpagit.
Aningaasaliissutit qinnutigineqartut akuerineqartullu aamma ima annertutigisutut oqaatigineqarsin-naanngillat Aningaasaqarnermut Ataatsimiititaliaq akuersissuteqarnissaminut tunuarsimaarsima-sariaqaraluarluni. Sanilliullugu assersuutitut oqaatigineqarsinnaavoq ataatsimiititaliaq 2011-mi de-cembarimi atuartut angerlarsimaffiinik ilinniartullu inissaannik sanaartornissamut katillugit 140 mio. kr. sinnerlugit aningaasartalimmik aningaasaliissuteqartoqarnissaanik qinnuteqaammik akuersissu-teqarmat sunnguamilluunniit ataatsimiititaliamit, innuttaasunit naalakkersuinikkulluunniit oqaase-qartartunit uparuarneqanngitsumik.
Taamaalilluni qularutigineqarsinnaanngilluinnarpoq Naalakkersuisut aningaasaliissuteqarnissamik periaatsit nalinginnaalluinnartut atorlugit qinnuteqaataannik Aningaasaqarnermut Ataatsimiititaliap suliarinninnera sunnguamilluunniit assuarineqarsinnaanngitsoq.
Aningaasaqarnermut Ataatsimiititaliaq sinnerlugu
Andreas Uldum
Siulittaasoq