2024 2023 2022 Flere år...
08-02-2012
"Tuusip atorfimminut atatillugu illua isaterneqassaaq" pillugu
AG-mut naqqiut
Inatsisartut eqqarsaatigalugit AG-mi allaaserisat eqqoratillu pissusiviusunik equtitsisut, kingullermik AG-mi nr. 6 2012-imeersumi ullumi saqqummersumi allaaserisakkut qulaani issuarneqartutut qulequtalimmi, ajoraluartumik uparuarneqartariaqarput pissusiviusut ersersinniarlugit.
Uanga nammineq inuttut kiisalu Inatsisartut Allattoqarfiat allaaserisami eqqartorneqarput. Allattoqarfik eqqunngitsumik eqqartorneqarpoq oqaatigineqarmat illutoqqap isaterneqarnissaa suliariumannittussarsiuunneqareersimasoq, illumullu nutaarluinnarmut titartakkat siulliit titartarneqareersimallutik. Allattoqarfik taamatut oqaaseqartoqarsimaneranik ilisimasaqanngilaq AG-lu qinnuigineqarpoq taakkuninnga uppernarsaaqqullugu. Allattoqarfik AG-mit ataasiarluni sianerfigineqarsimavoq. Sianertoq Allattoqarfiup Naalakkersuinni oqartussanut eqqortunut innersuuppaa.
Nuummi illumik pigisaqanngilanga taamaattumillu aamma allaaserisap qulequtaa akuerisinnaanagu, tassani Igalikumi illora isaterneqartussaananiluunniit oqummik ajornartorsiuteqarfiunngimmat.
AG-p nunatsinni aviisit pisoqaanersaattut ilisimasariaqaraluarpai Inatsisartut Naalakkersuisullu akornanni suliassat nammagassallu qanoq agguataarneqarsimanersut kiisalu nunami maani inatsisit suut atuuttuunersut.
AG-p allaat paasiniarsimanngilaa matumani pissutsit eqqortumik qanoq ataqatigiinnersut. 2012-imut aningaasanut inatsimmi konto pingaarneq 20.30.10 Namminersorlutik Oqartussat qitiusumik allaffeqarfii aamma konto pingaarneq 20.30.11 Namminersorlutik Oqartussat illuutaannik aserfallatsaaliineq takuinnarneqarsinnaagaluarput.
http://viewer.webproof.com/pageflip/307/69631/index.html#/207/ aamma http://viewer.webproof.com/pageflip/307/69631/index.html#/209/
Aamma takoqquvara Inatsisartunut Naalakkersuisunullu ilaasortat aningaasarsiaqartitaanerat il.il. pillugit Inatsisartut inatsisaat nr. 22, ulloq 18. december 2003-meersoq kingusinnerusukkullu allanngortinneqartarsimasoq maluginiaqqussavarattaaq. Taakku uani aaneqarsinnaapput:
http://www.inatsisit.gl/gh.gl-love/kn/2003/ltl/ltl_nr_22-2003_vederlagslov/ltl_nr_22-2003_grl.htm
http://www.inatsisit.gl/gh.gl-love/kn/2011/ltl/L_02-2011_vederlagslov/L_02-2011_kn.htm
Josef Motzfeldt
Inatsisartut Siulittaasuat