2024 2023 2022 Flere år...
08-02-2012
Keermiaa AG naqqinneqartariaqarpoq - qassissaa pinerpoq
Inatsisartut Siulittaasuannit
Atuagagdliutit AG normumini nr. 6-imi "Tuusip atorfimminut atatillugu illua isaterneqassaaq" qule-qutserlugu allaaserisamini aammaarluni paasissutissanik eqqunngitsumik siammarterinermigut innuttaasunik tammarsaavoq. Naluara qulequtaq suminngaanneersuunersoq, tassami Nuummi illumik pigisaqanngilanga.
Nuummi Karl Lundip Aqqutaani illu pineqarsimappat - aamma AG-mi allaaserineqartutut 1964-imee-rani 1980-ikkut ingerlanerani sananeqartoq - matumani suliassaq alla piginnittorlu alla pineqarput. Namminersorlutik Oqartussat piginnittuupput. Illu ukiut ingerlaneranni Inatsisartut Siulittaasuannut atorneqarsinnaatinneqarsimavoq. Piginnittulli paasisimavaa illu ima oqoqalersimatigisoq peqqinnis-saq eqqarsaatigalugu najugaqarfigineqarsinnaajunnaarsimalluni, taamaattumillu tassani najugaqartoq peqquneqarsimalluni illumut allamut nuussasoq. Taamaattumik illumik piginnittup kisimi siulittaasup Karl Lundip Aqqutaani najugaqaannarsinnaannginnera aalajangigarivaa. Inatsisartut Siulittaasuat illup qanoq pineqarnissaa eqqarsaatigalugu aalajangermut sunnguamilluunniit attuu-massuteqangilaq.
Tamatuma kingorna Namminersorlutik Oqartussat paasivaat illup oqummit ajoquserneqarsimanera iluarsaanneqarnissaanullu aningaasartuutissat ima annertutigissasut sumiiffimmi illumik nutaamik sanaqqinnissaq akilersinnaanerussalluni. Pissutsit suleriaatsillu tamakku aamma atuussimapput Naalakkersuisut Siulittaasuata illua eqqarsaatigalugu. Taamaattumik aamma soorunami akuusunut tamanut ajornartorsiutip taama annertutiginera paasillugu tataannarsimaqaaq.
Aningaasarsiaqartitsineq pillugu inatsit malillugu Naalakkersuisut siulittaasuat aamma Inatsisartut siulittaasuat inissaqartinneqartussaapput akileraarutigineqartartussanik. Taamaalilluni aamma tamatumani pineqanngillat illut siulittaasut namminneq pigisaat aamma aserfallatsaalineqarnissaannut illulluunniit qanoq innerisa nakkutigineqarnissaannut imaluunniit pitsanngorsaasoqartaria-qarpat pitsaanngorsaanissamut akisussaaffigisaat.
Tamatumunnga ilanngullugu ilisimatitsissutigineqassaaq ilumuunngimmat AG-mi allaaserineqartoq Inatsisartut Allattoqarfiannit ilisimatitsissutigineqarsimasoq illu suliariumannittussarsiorneqa-reersimasoq. Inatsisartut Allattoqarfiat sanaartugassanut oqartussaasuunngilaq, taamalu aamma illuutinik nakkutilliisuunaniluunniit Karl Lundip Aqqutaani illup qimanneqarnissaanut isaterneqarnissaanulluunniit aalajangiinermut attuumassuteqarani. Ataatsimut isigalugu suliassaq manna pillu-gu allattoqarfik oqaaseqarsimanngilaq matumani naqqiuteqarneq sioqqullugu, AG-li paasiniaammat taamaallaat oqartussanut eqqortunut suliassaq pillugu attaveqarnissaannut innersuunneqaannarsimalluni.
Taamaattumik aamma pissusissamisooranilu asuli pineruvoq naalakkersuinikkut pissutsit pillugit oqaaseqartartoq AG Sermitsiap nittartagaani naak pissutsit ilisimaarisussaagaluarlugit issuarne-qarmat suliassaq innuttaasut qinikkat aqqutigalugit naalakkersueqataaneranni najoqqutassat malillugit suliarineqarsimanngitsoq. Suliassaq malittarisassat, missingersuutit pillugit inatsit naalakker-suinikkullu isiginiagassat maleqqissaarlugit ingerlanneqarsimavoq. Suliassap suliarineqarnerani naalakkersuinikkut aqqusaaqqaagassat arlallit aqqusaaqqaarneqarsimapput, soorlu aamma missi-ngersuutit pillugit inatsimmi aalajangersarneqarsimasut maleqqissaarlugit Aningaasaqarnermut Ataatsimiititaliami ilaasortat arfineq-marluk suliami aalajangiisimasut. Innuttaasut qinikkat aqqutigalugit naalakkersueqataaneranni malitassat tamarmik malinneqarsimapput, naalakkersuinikkullu pissutsit pillugit oqaaseqartartoq Inatsisartut Allattoqarfianni siusinnerusukkut pisortaasimasutut siumut paasiniaaqqaarnissaminut sunik tamanik periarfissaqarsimagaluarpoq pissutsinik paasini-aaqqaarsimanngitsutut oqaaseqannginnermini. Aammami immaqa naatsorsuutigineqarsinnaasi-magaluarpoq aamma tusagassiortup pissutsinik tamakkuninnga paasiniaaqqaarsimanissaa.