2024 2023 2022 Flere år...
20-02-2012
Sermitsiami nr. 7-mi 17. februar 2012 saqqummersumi qupp. 34-imi Siumup Inuusuttunut Suleqatigiiffiata siulittaasuata Kaalinnguaq Siegstadip ilanngussaanut "Inuusuttut Inatsisartui ukiuni pingasuni naak" ammasumik akissut
Siumup Inuusuttunut Suleqatigiiffiata siulittaasua Kaalinnguaq Siegstad Sermitsiami saqqummersumi kingullermi ilanngussaqarluni oqaaseqarpoq Inuusuttut Inatsisartuinik taallugu ukiuni pingasuni aaqqissuisoqanngitsuulersoq. Ilanngussami Kaalinnguaq Siegstadip taamatuttaaq ersersippaa ernummatigigamiuk inuusuttut akornanni oqallittoqannginnerunera, isumaqarlunilu Inuusuttut Inatsisartui tamatumunnga aqqutissaagaluartut - imaappoq ukioq allortarlugu.
Inuusuttut Inatsisartuinik taallugu aaqqissuussisarnerup kinguartinneqarnissaanik siulittaasoqarfiup aalajangernera eqqarsaatigalugu Kaalinnguaq Siegstadip atuartartutut allagaanut kingullermik akissuteqarama ilisimatitsissutigaara - soorlu pineqartup ilisimariissagaa - tamatumunnga pissutaammat aaqqissuussinissap piareersarneqarneranut ilinniarfiit ataasiakkaat amigartumik peqataanerat (Sermitsiaq nr. 10/2011 quppernerit 54-55 imaluunniit /nyheder/2011/03/20110302-pm-ungdomsparlamentet.aspx?lang=kl takukkit). Taamaattumik tamatumani pineqanngilaq Inatsisartuni partiip aalajangersimasup arlaataluunniit Inuusuttut Inatsisartuinik taallugu aaqqissuussinissamik kinguarsaanera akornusersuineraluunniit. Inuusuttut Inatsisartuinik taallugu aaqqissuussineq ataasiaannarluni taamaatiinnarneqarsimasoq, tassalu 2011-mi. Inuusuttut Inatsisartuinik taallugit aaqqissuussisarnerit taamaalillutik aamma ukioq ataaseq allortarlugu taamaallaat ingerlanneqartarsimapput, tamannalu malinneqassagaluarpat taamaalilluni tullianik Inuusuttut Inatsisartuinik taallugu 2013-ip aallartinnerani aaqqissuisoqartussaassagaluarluni.
Ilanngullugu eqqaasitsissutigerusuppara kingullermik akissuteqarninni suliassaq inuusuttut suliniaqatigiiffiinut ingerlateqqikkakku taakku namminneq siuttooqqullugit inuusuttut akornanni oqallinnermik pilersitsinissami. Soorlu aamma Kaalinnguaq Siegstadip meeqqanut inuusuttunullu siunnersuisoqatigiiffimmi Sorlammi siulittaasutut ilisimariissagaa meeqqat inuusuttullu akornanni oqallinnermik pilersitsinissaq qularnaarniarlugu Aningaasanut inatsit aqqutigalugu nunatsinni inuusuttut suliniaqatigiiffiinut 999.000 kr.-inik ukiumoortumik tapiissuteqartoqartareerpoq. Taamatulli oqallinnermik pilersitsinissamut naammagittaalliuuteqartoq arlaannik iliuuseqarsimagunanngimmat sulilu Inatsisartut suliniuteqaqqaarnissaat utaqqillugu, taamatullu aamma Siumup Inuusuttunut Suleqatigiiffia Inuusuttut Inatsisartuinik taallugu aaqqissuussisarneq eqqarsaatigalugu tammartajaartutut pissuseqarsorinarmat, naalakkersuinikkut suliniaqatigiiffiit inuusuttaat Sorlaap siulittaasua peqatigalugu ataatsimeeqatigiinnissamut qaaqqorusuppakka, tassanilu Inuusuttut Inatsisartuinik taallugu aaqqissuussisarnermut isummanik tunngaviusunik siunissamilu taamatut aaqqissuussisarnerit qularnaarneqarnissaat siunertaralugu suliniutit suut aallartinneqarsimanerinik nassuiaateqarfigalugit. Isumaqarpunga tamanna pissarsiviunerullunilu iluaqutaanerussasoq tusagassiorfiit aqqutigalugit maanaannaq tigusanik inerititaqarfiunngitsunillu oqaaseqaateqartarnernut sanilliullugu, taamatummi oqaaseqartarnerit aamma taamatut aaqqissuussiisarnernut kukkusunik neriuuteqalersitsisinnaammata.
Maannangaaq naalakkersuinermik suliniaqatigiiffiit inuusuttaat immaqa pakatsisereersinnaavakka oqassaguma Inuusuttut Inatsisartuinik taallugit aaqqissuussisarnerit inatsisiliorfiuneq ajormata, naak immaqa inuusuttut ilaat taamatut isumaqalersinneqarsinnaagaluartut Siumup Inuusuttunut Suleqatigiiffiata siulittaasuata allaaserisaata kingulliup atuarneratigut. Inuusuttut Inatsisartuinik taallugit aaqqissuussisarnerit siullermik sallerpaamillu ilinniarnermut atatillugu aaqqissuussinertut eqqarsaataapput, taamatut aaqqissuussinikkut inuusuttut inatsisartut inatsisiliornerminni qanoq sulisarnerannik suleriaasiinillu ilisimasaqarnerulernissaat siunertaralugu.
Massakkorpiaq siunissami taamatut aaqqissuussisarnissanut najoqqutassiorniartoqarpoq, tassani ilinniarfiit kisiisa pinnagit inuusuttut soqutiginnittut tamarmik peqataatinneqarnissaat periarfissinniarneqarluni, peqatigitillugulu tunngavissiisoqarniarluni inuusuttut namminneq inuusuttut inatsisartuinik taallugu aaqqissuussinermut piareersarsinnaanissaannut. Taamaalilluni tamatuma inernerisinnaavaa nittartakkat aqqutigalugit imaluunniit Inatsisartut oqallittarfianni najuulluni peqataatitaqarnikkut Inuusuttut Inatsisartuinik taallugu aaqqissuussisoqarnera. Isumaliutit tamakku suli naammassivinneqanngillat, ingerlaavartumilli Inatsisartut Siulittaasoqarfiani pilersaarusiorneqarlutik.
Qulaani ilisimatitsissutigineqartut itisilernissaannut naalakkersuinikkut suliniaqatigiiffiit inuusuttaasa Sorlaallu siulittaasui naapissinnaagukkit nuannaarutigissaqaara, pisarnertullu matora ammajuarpoq.
Josef Motzfeldt
Inatsisartut Siulittaasuat
Paasissutissat sukumiinerusut Inatsisartut Siulittaasuat Josef Motzfeldt angallattagaq 55 76 41 attaveqarfigalugu pissarsiarineqarsinnaapput.