2024 2023 2022 Flere år...
12-03-2012
Sanaartornermut Avatangiisinullu ataatsimiititaliami ulapaarneq
Sanaartornermut Avatangiisinullu ataatsimiititaliaq ulluni 8.-9. marts 2012 Nuummi ataatsimiippoq, Ataatsimiititaliap susassaqarfiini sammisassat toqqarneqartut arlallit siunnersuutillu isummersorfiginiarlugit nalilersorniarlugillu. Sammisat assigiinngeqaat, CO2-mik aniatitsinerup annikillisinnissaanut suliniutit, isumalluutit uumassusillit aqunneqarnerat ilanngullugu kiisalu internetsip tungaatigut akilersueriaatsit nutaat ilaatigut sammineqarlutik.
Siullermik Ataatsimiititaliap Nunamut namminermut, Pinngortitamut Avatangiisinullu Naalakkersuisoq aamma Ineqarnermut, Attaveqarnermut Angallannermullu Naalakkersuisoq sisamanngormat ataatsikkut isumasioqatigaat. Isumasioqatigiinnermi sanaartukkani PCB-p passunneqartarnera sammineqarpoq.
Tamtuma kingorna Ataatsimiititaliap Nukissiorfiit pulaarpaat, tassani Ataatsimiititaliaq brinti pillugu suliniutip killiffianik aamma biilit innaallagiatortut pillugit misilittakkanik paasissutissinneqarpoq. Peqatigitillugu Nukissiorfiit innaallagissamik sipaaniarneq pillugu aamma CO2-mik aniatitsineq annikillisinniarlugu suliniutaat ingerlanneqartut pilersaarutaasullu pillugit Ataatsimiititaliaq paasissutissinneqarpoq.
Ulloq siulleq sammisaqarfiusoq Pinngortitaleriffimmi pulaarnermik naggaserneqarpoq. Tassani Ataatsimiititaliaq Pinngortitaleriffiup ataatsimut isigalugu suliniutai Ataatsimiititaliamut paasissutissiissutigineqarput, sila pillugu suliniutit nutaat kiisalu uumassusilinnik isumalluutinik aqutsinermi maanna killiffiugallartoq pillugu aamma paasissutissinneqarlutik. Pingaarnerit ilaattut uumasut mianersuutassat allattorneqarsimanerat, MSC-mit uppernarsaasiisarneq aamma Kalaallit Nunaata nunanut tamalaanut pisussaaffii saqqummiunneqarput.
Ullup sammisaqarfiusup aappaa Ineqarnermut, Attaveqarnermut Angallannermullu Naalakkersuisorlu paasissutissiilluni ataatsimeeqatigiinnermik aallarnerneqarpoq.
Tallimanngorneq nangillugu Tele Greenland A/S-imut pulaartoqarpoq. Internetsip tungaatigut akigititaasartut paasissutissiissutiginerisa saniatigut ulloq 17. Januar 2011 Skynet-imik ingerlatseqateqarneq pillugu Unammilleqatigiinnermi ataatsimiititaliap aalajangiinerata Tele Greenlandimut sunniutaa kiisalu Tele Greenlandimit suliniutit nioqqutillu nutaat pillugit Ataatsimiititaliaq paasissutissineqarpoq.
Ataatsimiinnermi kingullermi Ataatsimiititaliamit Aningaasaqarnermut ataatsimiititaliami sinniisut peqatigalugit Mittarfeqarfiit naapeqatigineqarput. Sammisat siamaseqaat, pineqarpullu Nuummi mittarfimmi sanaartukkanut aserfallatsaaliinermut kinguaattoorutit, mittarfinnut akitsuutit, Royal Arctic Line A/S-ip suleqatiginerani Mittarfeqarfiit misilittagai killiffillu, kiisalu mittarfinni piujuartitsineq.
Piffissami aggersumi Nuummi sammisaqarnermi suliat aamma isummersuutit Ataatsimiititaliamit malitseqartinneqassapput.
Inatsisartunut ilaasortat uku Nuummi sammisaqarluni ataatsimiinnerit ilaani arlalinniluunniit peqataapput: Ataatsimiititaliami siulittaasoq Naaja Nathanielsen (IA), siulittaasup tullia Justus Hansen (D), Olga. P. Berthelsen, Andreas Uldum (D), Knud Fleischer (KP) aamma Malik Berthelsen (S).
Sanaartornermut Avatangiisinullu ataatsimiititaliap piffissami kingullermi Kalaallit Nunaanni ineqarneq sanaartornerlu pingaarnerutillugit samminikuuai.
Taasaq kingulleq ulloq 13. aamma 14. marts 2012 nunat tamalaat ataatsimeersuarneranni EVENT 2012-imi Sisimiuni ingerlanneqartussami sammineqassaaq, tassani Ataatsimiititaliami ilaasortaq Knud Fleischer Ataatsimiititaliami sinniisutut peqataassalluni. Ataatsimeersuarnermi issittumi sanaartornermi unammilligassat qitiusumik sammineqassapput, ilaatinneqassallutillu sanaartukkat ilusaat, nutaaliorneq aamma piujuartitsineq tunngavigalugu sanaartorneq.
Paasisaqarnerorusunnermi Sanaartornermut Avatangiisinullu ataatsimiititaliami Siulittaasoq Naaja Nathanielsen, mobil 29 57 04, attavigineqarsinnaavoq.