2024 2023 2022 Flere år...
15-03-2012
Inatsisartut Siulittaasoqarfiata 2012-imi upernaakkut ataatsimiinnissamut oqaluuserisassat ulluni 21-ini ataatsimiiffiusussani suliarineqartussat saqqummiuppai
Inatsisartut Siulittaasuata Josef Motzfeldtip nuannaarutigaa siulittaasoqarfiup ippassaq ataatsimiin-nermini 2012-imi inatsisartut upernaakkut ataatsimiinnissaannut oqaluuserisassatut siunnersuutit ilalermagit. Aammaarluni nuannaarutissaavoq immikkoortut oqaluuseritikkusutat taama siusitsigisukkut siunnersuutinillu tunniussinissamut killissarititaasumit ullut arfiniliinnaaq qaangiuttut saqqummiunneqarsinnaammata, tassami taamaaliornikkut ilaasortat allaffeqarfiillu pitsaanerpaamik periarfissaqartinneqassammata ataatsimiinnerup aallartinnissaanut piareersarnissaminnut.
Taamaalilluni Inatsisartut upernaakkut ataatsimiinnerat tallimanngornermi ulloq 13. april aallartis-saaq pingasunngornermilu ulloq 30. maj 2012 naammassineqarnissaa naatsorsuutigineqarluni.
Oqaluuserisassatut siunnersuutit ullut ataatsimiiffiusussat 21-it ingerlanneranni oqaluuserineqassapput. Ulluni ataatsimiiffiusuni ataasiakkaani oqaluuserisassat ingerlaavartussaapput, taamaalillunilu oqaluuserisassani immikkoortut ataasiakkaat ullormi suliarineqarfissaminni angumerineqan-ngitsoortut ullup ataatsimiiffiusussap tulliani oqaluuserineqartassallutik.
Sapaatit akunnerini arfineq-pingasuni ataatsimiiffiusussani ullut ataatsimiiffiusussat imatut agguataarsimapput, ataatsimiinnerit nal. 13:00-imiit 18:00-ip tungaanut ingerlanneqartassallutik:
- Sapaatit akunneranni 15-imi ulloq ataatsimiiffik ataasiussaaq, tassa tallimanngornermi upernaakkut ataatsimiinneq nal. 13.00 aallartissalluni.
- Sapaatit akunneranni 16-imi ataatsimiittarfimmi ullut sisamat ataatsimiiffiussapput - ataasinngorneq, pingasunngorneq, sisamanngorneq tallimanngornerlu - tallimannngornermi piffissami nal. 10.00-imiit 12.00-imut ataatsimiittoqassalluni aalajangersimasumik qulequtaqarluni nunanilu avannarlerni inatsisartuni tamani ingerlanneqartussamik. Tamatuma saniatigut Inatsisartunut ilaasortat marlunngorneq isumasioqatigiiffittut atussavaat inuttut pisinnaatitaaffiit qulequtaralugu. Isumasioqatigiinneq Katuami ingerlanneqassaaq.
- Sapaatit akunnerini 17-imi, 19-imi 21-milu sapaatit akunneri tamaasa ullut ataatsimiiffiit pingasuusassapput (marlunngornerit, pingasunngornerit sisamanngornerillu).
- Sapaatit akunnerisa 18-ianni ullut ataatsimiiffiit sisamaassapput - ataasinngorneq, marlunngorneq, pingasunngorneq sisamanngornerlu - akunneq Naalakkersuisunut apeqquteqartarfik nalinginnaasumik pingasunngornikkut ingerlanneqartaraluartoq sapaatip akunnera taanna kisiat marlunngornermut maajip aallaqqaataanut ullullu affaa sulinngiffiusussamut nal. aqqanerniit ullup qeqqata tungaanut nuunneqassammat.
- Sapaatit akunneranni 20-mi ullut ataatsimiiffiit marluussapput (marlunngorneq pingasunngornerlu).
- Sapaatit akunnerat 22 2012-imi upernaakkut ataatsimiinnermi sapaatit akunnerisa ataatsimiiffiusut kingullersarissavaat ulloq ataaseq ataatsimiiffiussalluni.
Oqaluuserisassanut ilaasortat siunnersuutaat nutaat 48-t ilanngunneqarsimapput Naalakkersuisullu oqaluuserisassatut immikkoortunik nutaanik 26-nik nalunaaruteqarlutik. Nunat Avannarliit Killiit Siunnersuisoqatigiiffiat kaammattuutinik arfinilinnik oqaluuserisassanngortitsivoq.
Siunnersuutit arfinillit siusinnerusukkut ataatsimiinnerni siullermeerneqareersimapput 2012-imilu upernaakkut ataatsimiinnermut suliareqqinneqartussatut innersuunneqarsimallutik, soorlu aamma apeqquteqaat aallaavigalugu oqallinnissamik siunnersuutit arfinillit siusinnerusukkut ataatsimiinnernit kinguartinneqarsimasut oqaluuserisassanut ilanngunneqarsimasut.
Suleriaatsimi § 37, imm. 5 naapertorlugu sapaatip akunneranut akunnermik aalajangersimasumik immikkoortitsisoqartassaaq naalakkersuisunut apeqquteqarfiusinnaasumik. Akunneq apeqquteqarfiusinnaasoq pingasunngornerit tamaasa ullaakkut aqqanerniit ullup qeqqata tungaanut ingerlanneqartassaaq, tamatumalu kingorna unillatsiartoqartassalluni inatsisartut ataatsimiinnerata ualikkut nalunaaqutaq ataatsinut aallarteqqinneqarnissaata tungaanut. Malugeqquneqassaaq pingasunngornikkut akunneq apeqquteqarfiusinnaasoq maajip ulluisa aappaanni ingerlanneqartussaagaluaq marlunngornermut maajip ulluisa aallaqqaataannut aqqanerniit ullup qeqqata tungaanut nuunneqarsimammat.
2012-imi upernaakkut ataatsimiinneq UPA2012 pillugu atortussat tamarmik inatsisartut nitttartagaanni www.inatsisartut.gl-imi aqagu ualikkumiit takuneqarsinnaassapput. Atortussat tamarmik ingerlaavartumik qarasaasiakkut pissarsiarisalernissaannut periarfissaqarpoq. Tamanna kissaatigigaanni Laila Kristiansen lkri@inatsisartut.gl attaveqarfigineqarsinnaavoq.
Josef Motzfeldt
Inatsisartut Siulittaasuat
Paasissutissat sukumiinerusut Inatsisartut Siulittaasuat Josef Motzfeldt angallattagaq 55 76 41 attaveqarfigalugu pissarsiarineqarsinnaapput.