2024 2023 2022 Flere år...
19-03-2012
Inuusuttut Inatsisartuinik aaqqissuussisanermut najoqqutassamik nutaamik Inatsisartut ineriartortitsiniarlutik suliaqarput
Inuusuttut Inatsisartuinik aaqqissuussisarnermut najoqqutassamik nutaamik ineriartortitsinissaq Inatsisartut Siulittaasoqarfiata martsip 14-ani 2012-imi aalajangiuppaa.
Najoqqutassami nutaami innuttaasut oqartussaaqataanerat Inatsisartullu pillugit inuusuttut paasisaqarnissaannut periarfissinnissaat, oqallisissiarlu aalajangersimasoq aallaavigalugu naalakkersuinikkut aalajangiiniartarnerup ingerlasarneranik misiliinissaat tunngaviupput. Taamatuttaaq najoqqutassami nutaami attaveqaatitigut teknikikkut atortut nutaaliat atorlugit peqataasut misigisassaqartinneqarnissaat anguniarneqarpoq, aaqqissuulluakkamik ingerlatsinissaq aamma qularnaarniarlugu. Taamaaliornikkut aamma inuusuttut inatsisartuinik aaqqissuussinerup samminissaanut inuusuttut siumut periarfissinneqassapput, tamannali peqataanissamut piumasaqaataassanngilaq.
Inuusuttut inatsisartuinik aaqqissuussinissami aggersumi matumani meeqqat atuarfianni klassit angajulliit marluk (9. aamma 10. klassit) peqataatinneqarnissaat eqqarsaataavoq.
Nutaamik najoqqutassiorluni sulineq maanna aallartinneqassaaq, taamaalilluni inuusuttut inatsisartuinik aaqqissuussineq qanoq aaqqissuunneqassanersoq, ukiamut erseqqinnerusumik nalunaarutigineqarsinnaassalluni. Matumani inuusuttut inatsisartuinik aaqqissuussinerup tulliup 2013-imi upernaakkut ingerlanneqarnissaa siunertaralugu.
Josef Motzfeldt
Inatsisartut Siulittaasuat
Paasissutissat allat Inatsisartut Siulittaasuat Josef Motzfeldt oqarasuaatikkut angallattakkakkut 55 76 41-kkut attaveqarfigalugu pissarsiarineqarsinnaapput.