2024 2023 2022 Flere år...
30-03-2012
Nunat Avannarliit Killiit Siunnersuisoqatigiiffiata aalajangersimasumik qulequtaqarluni Ilulissani ataatsimeersuarnera
Nunat Avannarliit Killiit Siunnersuisoqatigiiffianni aallartitat, tassaasut siulittaasoq Josef Motzfeldt, siulittaasup tullii Ruth Heilmann, Aleqa Hammond, Jane Petersen, Astrid Fleischer Rex aamma Sivert K Heilmann Nunat Avannarliit Killiit Siunnersuisoqatigiiffiata Ilulissani ataatsimeersuartitsinerani ulluni 27. - 30. marts ingerlanneqartumi peqataapput. Kiisalu Knud Fleischer Kattusseqatigiit Partiiat aallartitanit alaatsinaatsutut qaaqquneqarsimavoq, partii Inatsisartut aallartitaanni arfiniliusuni sinniisuutitaqanngimmat.
Taamatuttaaq Naalakkersuisut siulittaasuat nunatsinni naalakkersuisut issittumi politikiat pillugu saqqummiussisussatut qaaqquneqarsimavoq.
Aalajangersimasumik qulequtaqarluni ataatsimeersuarnermi Kalaallit Nunaat ukioq manna qaaqqusisuuvoq ataatsimeersuarnerlu ima qulequtaqarluni ingerlanneqarpoq: Nunat tamalaat akornanni nunat avannarliit killiit inissisimanerat, Issittoq immikkut pingaartillugu. Qulequtarititassaq Nunat Avannarliit Killiit 2011-mi ukiumoortumik ataatsimiinnerani aalajangersarneqarpoq. Oqaatigineqassaaq ullut Ilulissaniiffissat sioqqullugit Issittoq nunat tamalaanit pilerigineqaqisoq qulequtaralugu ataatsimeersuarnernik allanik ingerlatsisoqarsimammat.
Innuttat issittumi najugaqartut sinniisaattut nunat avannarliit killiit inatsisartuisa ataatsimoorullugu kissaatigaat issittup annertuumik sammineqarnerani saqqummersut eqikkaaviginissaat, taamaaliornikkut ataatsimoorluni suussuserniarneqarlutik issittumi nunat tamalaat politikikkut anguniagaqarneranni aammalu issittumi pisuussutinik taamatullu nunatat ilaannik nunat tamalaat pissarsiniarlutik sorsuutiginninneranni nunat avannarliit killiit ataatsimoorullugit soqutigisaat.
Issittoq pillugu ilisimatusarnernit assigiinngitsunit angusanik kusanartunik eqqarsarnartunillu amerlasuunik saqqummiisorpassuit tunniussipput.
Innuttaasut, avatangiisit pinngortitarlu, silap pissusia, nungusaataanngitsumik inuussutissarsiutitigut ineriartortitsineq kiisalu ilinniartitaaneq piginnaasanillu ineriartortitsineq pillugit taagorneqarnerisut tulleriinnilerlugit ilisimatusarnerit ataatsimoorullugit soqutigineqarsorinarput. Qulequttallumi taakku taagorneqarnerisut tulleriinnerlugit sammineqarnissaat tunngavissaqarluarsorinarpoq, tassami silap allanngoriartornerata kingunerisa aningaasatigut periarfissanik nutaanik nassataqarlutillu aningaasaqarnikkut aqutseriaatsit piusut unammillerneqarnerannik nassataqartut innuttaasunut kinguneqaatai ilisimatusarfigineqartariaqarmata.
Tamatuma saniatigut issittumi allannguutit illersornissakkut kinguneqaataat aamma ilisimatusarfigineqartariaqarput.
Taamaattumik ataatsimoorullugit ilisimatusarnikkut suliniutit ingerlaavartut nunat avannarliit killiit pingaarnertut soqutigisariaqaraat isumaqarnarpoq, taamaaliornikkut issittoq pillugu soqutiginninneq annertoqisoq siunnersimaneqarsinnaaqqullugu.
Aalajangersimasumik qulequtaqarluni ataatsimeersuarnerup kingorna nunat avannarliit killiit aallartitaasa ukiumoortumik ataatsimiinnerminni ataatsimoorussamik inerniliinissaq sulissutigissavaat. Siunnersuisoqatigiit inerniliinerat nunani pingasuusuni naalakkersuisunut kaammattuutitut aalajangersakkatut ilusilerneqarsinnaavoq imaluunniit nunat pingasuusut naalakkersuisuinut ataatsimoorluni oqaaseqaatitut ilusilerneqarsinnaalluni.
Angusanik paasissutissanillu ilisimatusarnermik tunngaveqartunik amerlasuunik pissanganartunillu ataatsimeersuarneq imaqartoq ataatsimeersuarnermi peqataasut isumaqatigiissutigaat, taakkulu siunnersuisoqatigiit assut iluarisimaarpaat sulinerminnilu ingerlateqqilersaarlugit.
Josef Motzfeldt
Inatsisartut Siulittaasuat
Paasissutissat allat Inatsisartut Siulittaasuat Josef Motzfeldt oqarasuaatikkut angallattakkakkut 55 76 41-kkut attaveqarfigalugu pissarsiarineqarsinnaapput.