2024 2023 2022 Flere år...
18-04-2012
Inuttut pisinnaatitaaffiit pillugit Inatsisartut isumasioqatigiissinneqarput
Inuttut pisinnaatitaaffiit siuarsarniarlugit suliniarnerup danskit naalagaaffianni qanoq aaqqissuussaanera pillugu Inatsisartunut ilaasortanut ulloq 17. april Katuami Inatsisartut isumasioqatigiissitsipput. Isumasioqatigiinneq innuttaasunut tamanut ammasumik ualikkut nal. 14.00-imiit ingerlateqqinneqarportaaq.
Danmarkimi inuttut pisinnaatitaaffiit siuarsarniarlugit suliffeqarfiup Institut for Menneskerettigheder sulinermini ullumikkut tunngavigisai nunatsinnilu inuttut pisinnaatitaaffiit eqqarsaatigalugit suliffeqarfik sutigut isumaginnittarnersoq isumasioqatigiinnermi aallaavigineqarput.
Inatsisartut suliffeqarfiup nunatsinnut takkulluni Inatsisartunik isumasioqatigiissitsinissaanik kissaateqartuusimapput, taamaattumillu nuannaarutissaavoq suliffeqarfiup qaaqqusissut pingaartillugu tigu ilassilluarsimammagu sulisuminillu sisamanik nunatsinnut aallartitsilluni, inatsisartunik isumasioqatigiissitsinerup saniatigut aamma maani susassaqartunik allanik naapeqateqarnissaq siunertaralugu.
Isumasioqatigiinnermi suliffeqarfik sinnerlugu peqataapput suliffeqarfiup pisortaa Jonas Christoffersen, siunnersortaaneq Christoffer Badse, suliniutinut pisortaq Theresia Kirkemann Boesen nakkutilliinermullu pisortaq Louise Holck.
Inatsisartut Siulittaasuata Josef Motzfeldtip isumasioqatigiinneq ammarpaa Inatsisartunullu ilaasortat affaat sinnilaarlugit takkussimasut peqataanerannut qujassuteqarfigalugit. Siulittaasup erseqqissarpaa qularutissaanngitsoq ullormi tassani aaqqissuussinermi paasissutissat saqqummiunneqartut ilaasortat pissarsivigiumaaraat, soorlu aamma siulittaasup takoreersinnaagaa inuttut pisinnaatitaaffiit suliassaqarfittut annertussusia eqqarsaatigalugu qularnanngitsumik suliffeqarfimmik malitsitut naapeqateqaqqinnissaq pisariaqassasoq.
Suliffeqarfiup pisortaa qaaqquneqarsimanermut qujassuteqarpoq, oqaatigalugulu ataqqinaatissaallunilu nuannaarutissaasoq inuttut pisinnaatitaaffiit pillugit isumasioqatigiinnissamut inatsisartunit qaaqquneqarsimaneq. Nunani allani akerlianik pissutsit imaapput inatsisartunut ilaasortanik aatsaat naapitsisisoqartarluni suliffeqarfik tamatuminnga kissaateqaraangat. Inatsisartunit namminermit siornatigut qaaqquneqarsimanngillat, taamaattumillu aamma qaaqquneqarsimanertik assut nuannaarutigeqalugu.
Isumasioqatigiinnermi Danmarkimi inuttut pisinnaatitaaffiit siuarsarneqarnissaannut suliffeqarfiup Institut for Menneskerettigheder suliassaqarfii aammalu sooq suliffeqarfimmik taamaattumik pilersitsisoqarsimanersoq sukumiisumik nassuiaateqarfigineqarput, tassungalu ilanngullugu oqaatigineqarluni pilersinneqarsimallutik nunat tamalaat akornanni inuttut pisinnaatitaaffittut akuerineqarsimasut, danskit naalagaaffiannut inuiaqatigiillu danksit aaqqissuussaanerannut naleqqusakkamik, nunagisami sorlaninnissaat qularnaarniarlugu, suliassamillu ilagigaat inuttut pisinnaatitaaffiit eqqarsaatigalugit Danmarkip nunallu tamalaat akornanni taamatullu aamma naalagaaffiup innuttaasullu akornanni atassusiinissaq.
Suliffeqarfiup pisortaata saqqummiinermini ilanngullugu oqaatigaa inatsisissatut siunnersuut ulloq taannarpiaq Folketingimi siullermeerneqartussaq naapertorlugu suliffeqarfiup aaqqissuussaanera allanngortinneqartussaammat, taamaalillunilu inuttut pisinnaatitaaffiit siuarsarniarlugit suliffeqarfik Institut for Menneskerettigheder nunat tamalaat akornanni pissutsinik ilisimatusarfimmit avissaartinneqassalluni ombudsmandeqarfik naalagaaffiullu kukkunersiuisui assigalugit suliffeqarfittut immikkoortutut avissaartinneqassalluni.
Inatsisissatut siunnersuutip maanna Folketingimi oqallisigineqartup nunatsinnut sunniutissai eqqarsaatigalugit Danmarkimi akuersissutigineqareernermi kingorna kunngip peqqussutaatigut nunatsinnut atuutsinneqalersinnaassappat Inatsisartuni taamaaqataa nik oqaluuserineqaqqaartussaassaaq.
Tamannali aamma imatut isumaqanngilaq tamanna kisiat aqqutigalugu nunatsinni inuttut pisinnaatitaaffiit siuarsarniarlugit suliffeqarfimmik, nunatsinnimi suliffeqarfimmik taamaattumik suli peqanngimmat, pilersitsinissaq qularnaarneqassasoq. Suliassaq tamanna aallartinneqartussaavoq suliffeqarfillu nunatsinni sorlanitsinneqarluni, nunatsinni inuttut pisinnaatitaaffiit nakkutigineqarnerannik namminerisatsinnik suliffeqarfitsinnut innersuussisarsinnaalerniassagatta. Tamanna pitinnagu Danmarkimi taamatut suliffeqarfiup nunatsinni pissutsinik nakkutilliineranut apeqqutaasassaaq suliffeqarfiup Danmarkimi nakkutilliisussaatitaaneranut sanilliullugu suliffeqarfiup siulersuisuisa pingaarnersiuinerminni isumaqarnersut nunarput immikkut suliniuteqarfiusaqariaqarnersoq.
Taamaattumik nunatsinni inuiaqatigiit eqqarsaatigalugit angisuumik suli suliassaqarpugut ullormiit ullormut ukiulluunniit ataatsip ingerlanerani naammassineqarsinnaanngitsumik. Aallartittariaqarpugulli timitalimmik suliniuteqarnitsigut namminerisatsinnik suliffeqarfimmik taamaattumik pilersitsinitsigut imaluunniit tamanna pillugu Danmarkimi suliffeqarfimmik pisortatigoortumik suleqatigiinnissamik isumaqatigiissuteqarnikkut. Suliassarli annertooq tamanna suli Naalakkersuisuniippoq, taakku naliligassaralugu suliassaq qanoq ingerlateqqinneqassanersoq.
Maannakkuugallartoq inunnik pisinnaatitaaffiit siuarsarniarlugit suliffeqarfiup nunatta namminersulersimanera nunallu inoqqaavisa pisinnaatitaaffiinut killigititat eqqarsaatigalugit taakku nalilersorneqarnerannik danskit naalakkersuisuisa nassuiaateqarnissaat amigaatigaa, taakkumi sunniuteqartussaammata inuttut pisinnaatitaaffiit nunatsinni atuutsinneqarnissaannut nakkutigineqarnissaannullu.
Unammilligassat taakku allarpassuillu siunissami utaqqipput, isumasioqatigiinnermilu Inatsisartunut ilaasortat innuttaasullu soqutiginnittut periarfissinneqarput suliassap paasisaqarfiginerunissaanut taamatullu aamma sukumiisumik paasissutissinneqarneq tunngavigalugu nalinginnaasumik oqallinnermut peqataasinnaanissaminnut.
Suliassaqarfiup pissanganartup soqutiginartullu tamatuma oqallisigineqaqqinneqarnissaanut suliffeqarfiup tikilluaqqoqqinneqarnissaanut qilanaarpunga.
Josef Motzfeldt
Inatsisartut Siulittaasuat
Paasissutissat sukumiinerusut Inatsisartut Siulittaasuat Josef Motzfeldt angallattagaq nr. 55 76 41 attaveqarfigalugu pissarsiarineqarsinnaapput.