2024 2023 2022 Flere år...
20-04-2012
Nunani avannarlerni inatsisartut allat assigalugit ulloq taannarpiaq killeqarfinni akimmiffiusartut Inatsisartut oqallisigaat
Nunat Avannarliit Siunnersuisoqatigiiffiat nunat avannarliit akornanni killeqarfinni akimmiffiusartut piiarneqarnissaat siunertaralugu suliniarnerup killiffiata oqallisigineqarnissaanik ullormi tassani nunani avannarlerni inatsisartuni tamani oqallittoqarnissaanik kaammattuuteqarsimavoq. Tamannalu pivoq ullumi tallimanngornermi ullaakkut Nunat avannarliit suleqatigiinnerannut Naalakkersuisup Palle Christiansenip (D) nassuiaateqarnera tunngavigalugu Inatsisartut pineqartoq pillugu oqallimmata.
Oqallinnermi qitiutinneqartut ilagaat nunatsinni suliffissanut nunatsinni sulisinnaasunut salliutinneqarnissaasa qularnaarneqarnissaanik kissaateqarneq. Tamanna oqallisigineqarpoq minnerunngitsumik ikummatissanik aatsitassanillu iluaquteqarniarluni suliffissuaqarnermi ingerlanniakkat annertuut eqqarsaatigalugit. Peqatigitillugu isumaqatigiissutigineqarpoq nunat avannarliit akornanni nioqqutissanik killilersugaanngitsumik niueqateqarsinnaanerup sulissutigineqarnissaa suli pisariaqartoq. Tamatuma saniatigut oqallinnermi tikinneqartut ilagaat nersutit nappaataasa siaruatsaaliorneqarnissaat siunertaralugu malittarisassat, marloqiusamik akileraannginnissamik isumaqatigiissutit ilinniartitaanermullu tunngasut, soorlu aamma nunani avannarlerni nunanut sanilerisatsinnut angallannikkut pissutsit oqallisigineqartut, tamatumani qanimut suleqateqarnerup nunatsinnut iluaqutaanera oqaatigineqarluni.
Siullermeerutaasumik ullormi tassanerpiaq nunani avannarlerni inatsisartut tamarmik immikkut qulequttamik aalajangersimasumik oqallisigisaqarlutik ataatsimiipput. Killeqarfinni akimmiffiusartut pillugit ataatsimiititaliaq nunani avannarlerni ministeriunernit 2007-imi pilersinneqartoq taamaalilluni aamma sulinerminik ingerlatsiinnartussaavoq ullumi ataatsimut oqallittoqarnera uniffiginagu.
Josef Motzfeldt
Inatsisartut Siulittaasuat
Paasissutissat sukumiinerusunut Inatsisartut Siulittaasuat Josef Motzfeldt angallattagaq nr. 55 76 41 sianerfigalugu pissarsiarineqarsinnaapput.