2024 2023 2022 Flere år...
15-05-2012
Taamungaannaq...
Ilumut Atassut siulittaasoqarfimmit kamaanneqarpa? Taamatut isumaqartoqalersinnaagaluarpoq Sermitsiaq kingulleq atuarlugu.
"Atassut eqqartuussaanikkut peersitaasutut misigisimasoq" qulequtsiullugu allaaserisaq Knud Kristiansenip - Atassutip Inatsisartuni ilaasortaatitaasa aappaata - oqaaseqaataanik akullattaarlugu oqaluttuarineqarpoq Inatsisartut Siulittaasoqarfiata Knud Kristiansen piffissami maajip ulluisa 15-ianniit 30-iannut Inatsisartunit sulinngiffeqarnissaa akuerisimagaa Knud Kristiansenillu sinniisussaanik aggersaanissaq itigartissimallugu.
Knud Kristiansen soorunami sinniisussamik aggersaasinnaannginnerminut suut tunngavilersuutaanersut ilisimatinneqareerpoq, tunngavilersuutigineqartulli annerusumik paasisimagunarnagit. Ajornerusorli aana: Knud Kristiansen pisortatiguunngitsumik tunngavilersuummik aamma pissarsisimanerarneqarpoq siulittaasoqarfiup ilisimanngisaanik, maannali aviisimi atuarsinnaasatsinnik.
Knud Kristiansen tunngavilersuummik pisortatiguunngitsumik kimit pissarsisimanersoq Sermitsiami allaaserisami oqaluttuarineqanngilaq. Ilisimatitsissutigisinnaavarali uanninngaanniinngimmat Inatsisartulluunnit allattoqarfianeerani. Soorlulusooq kinannguugaluarnersoq paasissutissanik eqqoqqissaanngitsunik siammarterisimasoq imaluunniit qallunaat oqartarnerattut "silaannarmik kissartumik" siammarterisimasoq! Oqaluttuarineqartormi amigaateqaqaaq.
Pissutissaqavillunga oqaaseqarniarnangalu oqaaseqarsinnaanngilanga sinniisussaq aalajangersimasoq qinigaasinnaanerminik annaasaqarsimanersoq. Kisiannili Knud Kristiansenimut sinniisussamik aggersaanissamik Siulittaasoqarfik itigartitsisimasoq oqaatigissallugu isumaqanngilluinnarpoq, tassami sulinngiffeqarsinnaanissaq akuerineqarmat aamma aalajangerneqarmat sinniisussamik ataatsimiigiaqqusisoqassanngitsoq. Taamaalilluni sinniisussamik ataatsimiigiaqqusinissaq siunnertaasimanngisaannarpoq.
Siulittaasoqarfiup sinniisussamik ataatsimiigiaqqusiniannginneranut pissutaasoq taannarpiaavoq aamma Siulittaasoqarfimmit Knud Kristiansenimut ilisimatitsissutigineqartoq. Piffissami maajip ulluisa 15-ianniit 30-annut Inatsisartuni ataatsimiititaliani sulinerup annerssaa naammassereersimassaaq ataatsimiittarfimmilu ullut ataatsimiiffiusussat sinneruttut arfiniliinnaallutik. Tamatumunnga ilanngunneqassapput ataatsimiinnerup ilaanut piffissamut sivikitsumut suliassat annertunerpaat naammassineqareerneranni sinniisussamik ataatsimiigiaqqusissagaluaraanni inuiaqatigiit aningaasartuutigisassaat.
Soorunami paasisinnaavara Atassup inatsisartunut ilaasortaatitaata aappaata ajorinavianngikkaluarmagu Knud Kristiansenip sinniisussaanik ataatsimiigiaqqusisoqartuuppat. Piffissamili Knud Kristiansenip peqanngiffigisassaani siunnersuutinik siullermeerinnittarnerit takisuunillu partiit oqaaseqarfigisartagaat tamarluinnarmik naammassereerneqarsimasussaapput, taamatullu aamma ataatsimiititaliat amerlanerit sulinerat naammassilereerluni. Tamatumunnga atatillugu Knud Kristiansen ataatsimiititalianut marluinnarnut ilaasortaavoq.
Tamannaana tassa pissutaasoq. Pissutivik silaannarmit tigusaanngitsoq! Naggataatigut aamma Knud Kristiansen eqqissisaannarsinnaavara oqarfigalugu Atassut uanniit siulittaasoqarfimmilluunniit kamaanneqanngimmat, naak Sermitsiami allaaserisaq atuaqqaarakku kaffissara tupputigingajakkaluarlugu.
Josef Motzfeldt
Inatsisartut Siulittaasuat
Paasissutissat sukumiinerusut Inatsisartut Siulittaasuat Josef Motzfeldt angallattagaq nr. 55 76 41 attaveqarfigalugu pissarsiarineqarsinnaapput.