2024 2023 2022 Flere år...
10-06-2012
Eqqaaniut
Piniartoq Inatsisartut siulittaasorisimasaat Bendt Frederiksen nunaqarfimmini Nuussuarmi 8. juni toqusoq ilaqutaanit kalerrinneqarpunga.
Bendt Frederiksen nunatta oqaluttuarisaanerani nutaajunerusumi innuttaasut qinigaanni nuimasut sunniuteqangaarsimasut ilagaat.
1975-imi landsrådimut qinigaavoq Namminersornerulernermilu 1979-imit 1995 tikillugu Inatsisartuni ilaasortaalluni. 1991-imit 1995 Inatsisartuni siulittaasuuvoq.
Inatsisartuni siulittaasuuneq qinikkatut inissisimaffik 1991-imi inuttalerneqartussanngormat nalaatsornerinnaanngilaq Bendt Frederiksenimit inuttalerneqarmat.
Bendt Frederiksen qanilaartuunermigut ilisarnaatilik, unneqqarissaarnermik suliamullu ilisimasaqarusunnermik pingaartitsilluinnartoq qanimut Inatsisartuni ataatsimiititalianilu suleqatigineratigut ilisarisimalersimavara. Inatsisartuni sulinermini pingaartilluinnagaraa inatsisiliortutut suliassat misigissutsit qalliinnakkorsiortut atorlugit suliassaanngitsut. Taamaattumik suliaminut tunngasut iternga tikillugu nammineq paasisassarsiornermigut ilisimasaqarfiginissaat nersortarialimmik piginnaaneqarfigaa.
Inoqamminut mianerinnittoq, allat isumaannik naalaarsinnaasoq, isummaminik ersarissunik illersuisinnaasoq, Bendt Fredriksen aamma taama ilisarisimavara. Taamalu sulisunit qinikkatullu peqatiminit ataqqisaasoq.
Inatsisartut siulittaasuattut atuuffiup Bendt Frederiksenimik inuttaqarsimanini ataqqinaatigaa.
Bendt Frederiksen qaammat tulleq 73-iliisussaagaluarpoq.
Marianne qitornasilu inuiaqatigiit Inatsisartuni qinigaat sinnerlugit atukkassinni iluunngarma misiginneqatigaassi nakussatsinneqarnissassinnillu kissaappassi.
Bendt Fredriksen qujaniarluta aamma ataqqinnilluta eqqaamassavarput.
Josef Motzfeldt,
Inatsisartut Siulittaasuat