2024 2023 2022 Flere år...
20-06-2012
Sanaartornermut Avatangiisinullu ataatsimiititaliami siulittaasoq Rio+20 pillugu ataatsimeersuarnermi peqataavoq
Ulluni makkunani piujuartitsineq tunngavigalugu ineriartortitsineq pillugu, mingutsitsinertaqanngitsumik aningaasarsiorneq pillugu aamma piitsuuneq akiorniarlugu Naalagaaffiit Peqatigiit ataatsimeersuartitsineranni - Rio+20 pillugu ataatsimeersuarnermi Inatsisartunut sinniissuutitaq peqataavoq.
Inatsisartut Sanaartornermut Avatangiisinullu ataatsimiititaliaata Ataatsimiititaliami Siulittaasuni Naaja Nathanielsen ataatsimeersuarnermut aallartippaa. Naalakkersuisunit kalaallit sinniisuutitat allat, qallunaallu aallartitai angalaqatigai, kiisalu sammisassat aalajangersimasut peqataaffigalugit.
Isumaqatigiinniarnernut naalagaaffinni naalakkersuisunit ingerlanneqartunut peqataanissaq Sanaartornermut Avatangiisinullu ataatsimiititaliamut apeqqutaanngilaq. Najuunnerup takutinnissaa, attaveqaatinik pilersitsinissaq kiisalu kalaallit isumaannik issittumilu soqutigisanik saqqummiussinissaq Ataatsimiititaliamut pingaaruteqartuuvoq. Nunagisami inuussutissanik piujuartitsineq tunngavigalugu atuinerup pingaaruteqarneranik, angutit arnallu silap allanngoriartorneranik qanoq assigiinngitsumik sunnigaasarnerannik, nunap inoqqaavini allani pissutsinik, kiisalu inuussutissarsiutit mingutsitsinertaqanngitsumik aaqqiissutaasinnaasutut isiginiarneqarnerannik, minnerunngitsumilllu naggataatigut nalinginnaasumik aningaasarsiornikkut ineriartornermi annertusaaneq kisiat iluatsitsiffiusutut isiginiarnagu mingutsitsinertaqanngitsumik aningaasarsiornermut annertunerusumik ikaarsaariarnissaq pillugu isummersornernut sapaatip akunnerata ingerlanerani Naaja Nathanielsen peqataavoq.
Kalaallit isuutaat maannamut soqutigineqartorujussuupput. Ataatsimut isigalugu tamanut naleqquttumik piumasaqaasiorsinnaannginnermut kalaallit aallartitaat erseqqissaasunut ilaapput. Assersuutigalugu Europamut sanilliullugu inooqatigiinnikkut avatangiisitigullu Issittumi allaanerusunik unammilligassaqarpugut. Tamanna ima paasisariaqarpoq aningaasarsiorneq mingutsitsinnginnerusoq anguniarlugu maanna siunissamilu periutsit assigiinngitsut immaqa atulissagigut. Nunarsuaq amerlaqisutigut assigiinngissuseqarfiuvoq, aaqqissutillu aamma taamaattariaqarput. Taamaattorli piviusut assigiit pituttorsimavaatigut, pinngortitarmi avatangiiserpullu tamatta pigisarput kinguaassatsinnut siunissami isumannaarniassagutsigu aningaasarsiorneq piujuartitsinermik tunngaveqassaaq.
Paasisaqarnerorusunnermi Sanaartornermut Avatangiisinullu ataatsimiititaliami Siulittaasoq Naaja Nathanielsen attavigineqarsinnaavoq, mobil+45 26 29 35 12.