2024 2023 2022 Flere år...
29-08-2012
Ullumimiit meeqqat atuarfianni 9. aamma 10. klassini atuartut 2013-imi februaarimi Inuu-suttut Inatsisartuinut peqataaniarlutik qinnuteqarsinnaanngorput - nittartagarlu nutaaq inu.gl allakkarneqarsinnaalerluni
Ullumimiit Inuusuttunut Inatsisartuinut 2013-mi februaarip ulluisa 22-ianniit 24-annut ingerlanneqartussamut peqataaniarluni qinnuteqartoqarsinnaanngorpoq. Qinnuteqarsinnaasut tassaapput meeqqat atuarfianni 9. imaluunniit 10. klassini atuartut.
Inatsisartut Siulittaasoqarfiata nuannaarutigaa Inuusuttut Inatsisartuinik taallugit aaqqissuussisarnerit eqqarsaatigalugit siusinnerusukkut aaqqissuussisarsimanerit assiginagit nutaatut aaqqissuunneqarsimasumik saqqummiussaqarsinnaagami, innuttaasut oqartussaaqataanerata inat-sisartoqarnerullu isumaannik paasisaqarnerunissamik inuusuttut tunineqarnissaannik pingaartitsiviusumik. Tamanna siunertaralugu immikkut nittartakkamik inu.gl-imik pilersitsisoqarsimavoq, aaqqissuussineq pillugu inuusuttut soqutiginnittullu allat paasissutissanik tamanik aallarfigisinnaasaannik. Peqataasussatut toqqarneqartut Nuummi naapikkunik filmiliat, titartakkat nalorsitsaarinerlu aqqutigalugit innuttaasut qinikkat aqqutigalugit oqartussaaqataaneranni aalajangiiniartarnerit qanoq ingerlasarnerannik saqqummiivigineqartarumaarput.
Inuusuttut Inatsisartuinut qulequtaritinneqassaaq "Oqaatsit - Oqaatsitigut piginnaasassavut eqqarsaatigalugit pingaartitavut anguniakkanut naapertuuppat?".
Peqataasinnaasut katillugit 35-iussapput. Peqataaniarluni qinnuteqarneq pisinnaavoq toqqaannartumik nittartagaq aqqutigalugu imaluunniit qarasaasianut programmeeqqap App-imik taaneqartartup oqarasuaammut angallattakkamut iPhonemut Androidilimmulluunniit aaneratigut. Aaqqissuussineq pillugu allagartarsuarnik meeqqat atuarfiinut tamanut nassiussuisoqareerpoq, tassanilu titartagaq oqarasuaat atorlugu skannerneqarsinnaasoq aqqutigalugu toqqaannartumik App taanna aaneqarsinnaalluni. Tamatuma saniatigut sapaatit akunnerini tullerni arfinilinni KNR TV-kkut Inuusuttut Inatsisartuinut peqataanissaq kajumissaarutigalugu naatsumik ussassaarisoqartarumaarpoq.
Meeqqat atuarfianni 9. imaluunniit 10. klassini atuartut tamarmik 2012-imi oktobarip ulluisa 15-iat tikillugu peqataaniarlutik qinnuteqarnissaminnut periarfissaqarput.
Josef Motzfeldt
Inatsisartut Siulittaasuat
Paasissutissat sukumiinerusut Inatsisartut Siulittaasuat Josef Motzfeldt angallattagaq 55 76 41 attaveqarfigalugu pissarsiarineqarsinnaapput.