2024 2023 2022 Flere år...
06-09-2012
Josef Motzfeldt ullumi Nunat Avannarliit Killiit Siunnersuisoqatigiiffiata siulit-taasoqarfiani siulittaasutut qinerneqarpoq
Inatsisartut Nunat Avannarliit Killiit Siunnersuisoqatigiiffianut aallartitaat
Nunat Avannarliit Killiit Siunnersuisoqatigiiffiata aallartitat tassaasut siulittaasoq Josef Motzfeldt ilaasortallu allat Ruth Heilmann, Olga P. Berthelsen, Aleqa Hammond, Astrid Fleischer, Sivert K Heilmannilu ulluni 3. - 7. sept 2012 Nunat Avannarliit Killiit Siunnersuisoqatigiiffiata 28-issaanik ukiumoortumik ataatsimiinnerani Savalimmiuni Gjøgvimi Torshavnimilu ingerlanneqartumi peqa-taapput.
Kaammattuutitut aalajangersakkat nutaat
Siunnersuisoqatigiiffiup ukiumoortumik ataatsimiinnermini ukioq Ilulissani aalajangersimasumik qulequtaqarluni ataatsimeersuartitsineq qanoq malitseqartinneqassanersoq oqaluuseraa, soorlu aamma siunnersuisoqatigiiffiup kaammattuutitut aalajangersakkat ingerlasut inatsisartunit ataa-siakkaanit ukiuni kingullerni akuersissutigineqartarsimasut taamalu aamma nunani avannarlerni killerni pingasuni naalakkersuisuni suli suliarineqarlutilluunniit malitseqartinniarneqartut killiffii oqa-luuseraat.
Siunnersuisoqatigiit kaammattuutitut aalajangersakkanik nutaanik marlunnik nunani avannarlerni killerni inatsisartunut saqqummiunneqartussanik akuersissuteqarput, siunnersuisoqatigiiffiup oqaluttuarisaanera eqqarsaatigalugu aatsaat taamak ikitsigisunik. Tamanna pivoq ukiut ingerlanerini ukiumoortumik ataatsimiinnerni kaammattuutitut aalajangersagarpassuit naalakkersuisunillu timitalerneqartussatut inatsisartunut saqqummiunneqartartut eqqarsaatigalugit misilittagarine-qarmat piffissarujussuaq ilaatigut ukiut arlallit atorneqartariaqartartut kaammattuutitut aalajangersakkat naammassineqarsimanngitsut malitseqartinneqarnerinut. Taamaattumik Siunnersuisoqatigiiffimmi isumaqatigiissutigineqarpoq siunissami sapinngisamik ukiumoortumik ataatsimiinnerni kaammattuutitut aalajangersagassanik amerlanerpaamik pingasunik saqqummiussisoqartalissasoq, qularnaarniarlugu kaammattuutitut aalajangersakkat akuersissutigineqartut aamma nunani ilaasortaasuni pingasuni naalakkersuisunit aamma pisariaqartumik suliarineqarlutillu malitseqartinneqartassatut.
Kaammattuutitut aalajangersakkani nutaani marlunni nunani pingasuni naalakkersuisut atuakkior-tunut atuakkiortunngorniartunullu allannermik pikkorissartitsinernik neqerooruteqartalernissamik kaammattoorneqarput kiisalu naalakkersuisut aamma kaammattorneqarlutik ataatsimut issittoq eqqarsaatigalugu ilioriusissioqqullugit. Kaammattuutit taakku 2013-imi upernaakkut ataatsimiin-nermi nunatsinni Inatsisartunut saqqummiunneqarumaarput.
Nunat Avannarliit Killiit Siunnersuisoqatigiiffiannut siulittaasumik nutaamik qinersineq
Ukiumoortumjk ataatsimiinneq ileqquusoq malillugu naggaserneqarpoq ukiup affaani tullerni aggersuni marlunni 2012/2013 siunnersuisoqatigiiffiup ingerlatsinissaanut siulittaasumik nutaamik qinersinermik. Josef Motzfeldt Siunnersuisoqatigiiffiup siulittaasussaatut nutaatut qinerneqarpoq Henrik Old Savalimmiuneersoq taarserlugu. Tamanna aamma isumaqarpoq aappaagu nunat avannarliit killiit siunnersuisoqatigiiffiata 29-issaanik ukiumoortumik ataatsimiinnissaanut nunarput qaaqqusisuussaaq. Ukiumoortumik ataatsimiinneq piffissami 2. - 6. September 2013 nunatsinni ingerlanneqassaaq.
Josef Motzfeldt siunnersuisoqatigiinnut siulittaasutut nutaatut oqaaseqarnermini oqaatigaa siunnersuisoqatigiiffiup ataatsimiittarnerisa suli nutarternerunissaat sulissutiginiarlugu, siunissami ataatsimiinnerit eqeersimaarnerusumik naammassisaqarfiunerusumillu ingerlanneqarsinnaalerni-assammata. Nunat avannarliit killiit siunnersuisoqatigiiffiat 28-eriarluni ukiumoortumik ataatsimeereerpoq piffissanngorsorinarlunilu siunnersuisoqatigiiffiup ataatsimiinnerisa ingerlanneqartarnerisa pisariaqalersimasumik nutarterneqarnissaat.
Siunnersuisoqatigiiffiup taamatuttaaq Islandimi tullianik aalajangersimasumik qulequtaqartitsilluni ataatsimeersuartitsinissami qulequtassaq akuersissutigaa. "Nunani avannarlerni killerni peqqinnissaqarfiit qaangerniagassaat periarfissaallu" ataatsimeersuarnermi qulequtarineqassaaq.
Siunnersuisoqatigiiffimmut nunatsinnit aallartitat ukiumoortumik ataatsimiinnermut peqataareerlutik Savalimmiunit Island aqqusaarlugu angerlarnerminni Reykjavikimi nunat avannarliit killiit kulturikut ulloqartinneqarnerannut peqataassapput.
Josef Motzfeldt
Inatsisartut Siulittaasuat
Nunat Avannarliit Killiit Siunnersuisoqatigiiffiannut aallartitat siulittaasuat
Paasissutissat sukumiinerusut Inatsisartut Siulittaasuat Josef Motzfeldt angallattagaq 55 76 41 attaveqarfigalugu pissarsiarineqarsinnaapput.