2024 2023 2022 Flere år...
07-09-2012
Danmarkimit Kinamut pisortatigoortumik tikeraarnissami Kalaallit Nunaata peqataanissaa pissusissamisoorpoq
Statsminister Helle Thorning-Schmidt ulluni 10.-13. september Kinamut pisortatigoortumik tikeraassaaq.
Nunanut allanut Sillimaniarnermullu ataatsimiititaliaq isumaqarpoq Danmarkimit Kinamut pisortatigoortumik tikeraartoqarnissaani tikeraarnermi pisussanut pilersaarummi apeqqutit Kalaallit Nunaata soqutigisaanut tunngasut sammineqassappata ajornanngippat danskit naalakkersuisuisa Kalaallit Nunaannit sinniisut qaaqqusariaqarai.
Aatsitassanut, Issittumut, umiarsuit ingerlaarfissaannut imaluunniit Issittumi Siunnersuisoqatigiinni aalajangersimasumik alaatsinaatsitaqalernissamik Kinap kissaatigisaanut tunngasut Statsminister Helle Thorning-Schmidtip aamma Præsident Hu Jintaosip oqaluuserissappatigit Kalaallit Nunaata peqataanissaa pissusissamisuussasoq.
Danskit angalatitaanni Kalaallit Nunaata peqataatinneqarnera Namminersorluni Oqartussaanermut ataqqinninnermik takutitsinerussaaq, kiisalu"Kunngeqarfiup Danmarkip Issittoq pillugu iliuusissaa 2011 -2020"pillugu naalakkersuinikkut nalunaarutigineqartumut tulluartuussalluni.
Taamaattumik ataatsimiititaliaq neriuppoq Igalikumi ungasinngitsukkut naalagaaffeqatigiit ataatsimiinneranni Naalakkersuisut Siulittaasuata Kuupik Kleistip aamma Statsminister Helle Thorning-Schmidtip pineqartoq oqaluuserisimassagaat, kiisalu Kinamut pisortatigoortumik tikeraarnissaq siunissamilu ataatsimiittarnissat pillugit ataatsimoorlutik isumaqatigiissimassasut. Naalagaaffeqatigiit akornanni naligiinnitsinnik tamanna ersersitsinerussaaq.
Justus Hansen
Nunanut allanut Sillimaniarnermullu ataatsimiititaliaq sinnerlugu
Paasisaqarnerorusunnermi ataatsimiititaliap siulittaasua Justus Hansen attavigineqarsinnaavoq, mobil nr. +299 52 12 10.
Nunanut allanut Sillimaniarnermullu ataatsimiititaliami uku ilaasortaapput: Siulittaaasoq Justus Hansen (D), Olga P. Berthelsen (IA), Hans Aronsen (IA), Aleqa Hammond (S) og Knud Kristiansen (A).