2024 2023 2022 Flere år...
21-09-2012
Inatsisartut Siulittaasuat Josef Motzfeldt qinigaaqqippoq
Ullaaq naalagiaqatigeereernerup kingorna Inatsisartuni sivisunerpaamik ilaasortaasimasut utoqqaanersaata Josef Motzfeldtip 2012-imi Inatsisartut ukiakkut ataatsimiinnerat nalunaaqutaq aqqaneq qaangilaaraa ammarpaa.
Inatsisartut ataatsimiinnerat Inatsisartut nutaamik siulittaasussaannik qinersinermik aallartinneqarpoq.
Inatsisartut Siulittaasussaattut Josef Motzfeldt qinigaaqqippoq.
Siulittaasussamik qinersisoqareermat siulittaasoqarfimmut ilaasortassat allat qinerneqarput, taamaalillunilu siulittaasoqarfik ukuninnga ilaasortaqalerluni:
|
Siulittaasoq Josef Motzfeldt (IA) |
Sinniisussaq Aqqaluaq B. Egede (IA) |
|
Siulittaasup tullia siulleq Per Berthelsen (S) |
Sinniisussaq Malik Berthelsen (S) |
|
Siulittaasup tulliisa aappaat Olga P. Berthelsen (IA) |
Sinniisussaq Debora Kleist (IA) |
|
Siulittaasup tulliisa pingajuat Finn Karlsen (S) |
Sinniisussaq Karl Lyberth (S) |
|
Siulittaasup tulliisa sisamaat Justus Hansen (D) |
Sinniisussaq Astrid Fleischer Rex (D) |
Inatsisartut siulittaasussaannik tullissaanillu qinersinermi taamaattoq ajuusaarnartumik pisoqarpoq, partiit arlaata persuarsiorfiusumik ammaanersiorfik innuttaasut oqartussaaqataanerannik nalliussiviorpiartoq atormagu Inatsisartut siulittaasussaattut amerlanerussuteqartunit inassutigineqartup tusagassiorfinnut apersorneqarluni oqaaseqarsinnaaneranik apeqqusiinermut.
Piffissaq sumiiffillu eqqarsaatigalugit taamatut Inatsisartut ataatsimiinnerata ammarneqarnera oqaluttarfillu pasilliinernut atussallugit pissusissamisuunngilaq, siulittaasummi tusagassiorfinnut oqaaserisimasai siulittaasoqarfimmulluunniit naammagittaalliutigineqarsimanngimmata, soorlu aamma siulittaasussatut inassutigineqartut tamarmik suleriaatsimi § 3-mi siulittaasutut qinigaasinnaanermut piumasaqaatit naammassisimagaat. Taamaalilluni suleriaatsimi § 3 naapertorlugu siulittaasussamik qinersisoqaannartussaavoq inassuteqartunit qinigassanngortinneqartunilluunniit oqallisigineqanngitsumik. Taamaatut apeqqusiineq qinikkanut inatsisiliortussanut tulluanngilaq.
Inatsisartut siulittaasussaannik siulittaasoqarfimmillu qinersisoqareermat Naalakkersuisut siulittaasuat ileqquusoq malillugu ammaanersiorluni oqalugiarpoq. Ammaanersiorluni oqalugiaat Inatsisartut marlunngorpat ulloq 25. september nal. 10.00 oqallisigissavaat.
Naalakkersuisut siulittaasuat ammaanersiorluni oqalugiareermat 2013-imi upernaakkut ataatsimiinnerup ulloq 8. marts 2013 aallartinnissaa Inatsisartut nutaatut aalajangerpaat, taamaalilluni upernaakkut ataatsimiinnermi oqaluuserisassat eqqarsaatigalugit pilersaarusiornerit piffissaagallartillugu allaffeqarfinni aallartereersinnaaniassammata.
Ataatsimiititaliat nutaamik qinikkat katitigaanerat pillugit passissutissat sukumiinerusut ualimut kingusinnerusukkut inatsisartut nittartagaanni www.inatsisartut.gl-imi takuneqarsinnaalissapput.
2012-imi ukiakkut ataatsimiinnermi ullut ataatsimiiffiusut katillugit 26-iunissaat pilersaarutaavoq. UKA11-mi ullut ataatsimiiffiusut 24-iusimapput. Ulluni ataatsimiiffiusuni ataasiakkaani oqaluuserisassat ingerlaavartussaapput, taamaasillunilu immikkoortut ullormi oqaluuserineqarfissaminni angumerineqanngitsut ullormi ataatsimiiffiusumi tullermi siulliullugit oqaluuserineqartassallutik.
Ukiakkut ataatsimiinnerup ulloq 27. november naammassineqarnissaa naatsorsuutigineqarpoq.
Paasissutissat sukumiinerusut Inatsisartut Siulittaasuat Josef Motzfeldt angallattagaq 55 76 41 attaveqarfigalugu pissarsiarineqarsinnaapput.
