2024 2023 2022 Flere år...
26-09-2012
Nunat EU-mut ilaasortanit nunasiaataasimasut OLT-t suleqatigiiffiata Ilulissani ataatsimiinnerani Inatsisartut Siulittaasuat peqataavoq
Inatsisartut Siulittaasuat Josef Motzfeldt nunat EU-mut ilaasortanit nunasiaataasimasut suleqatigiiffiata Ilulissani ulluni 25. - 27. september ataatsimiinnerani oqaaseqartussatut qaaqqusaasimavoq.
Suleqatigiiffimmi 2002-mi pilersinneqartumi, taamalu ukioq manna aamma ukiunik qulinngortorsiorsinnaasumi, nunarput aappassaa siulittaasuutitaqarpoq. Piffissami nunatta siulittaasuutitaqarfiani siullermi Josef Motzfeldt nunatsinni nunanut allanut tunngasunut naalakkersuisutut suleqatigiiffimmut 2006-imi siulittaasuuvoq, taamanikkullu ilaatigut Nuummi suleqatigiiffiup ataatsimiinneranik aaqqissuisuulluni.
Inatsisartut Siulittaasuata taamaalilluni suleqatigiiffik taanna qanittumik ilisimasaqarfigereerpaa. Inatsisartut Siulittaasuat ulloq 26. september ataatsimiinnermi oqaaseqarpoq, ilaatigullu ima oqaaseqarluni:
"Iluarisimaarlugu paasivara "avatangiisit silap pissusiisalu allanngoriartorneri" qulequtaralugu suliniarneq peqatigiilluta 2006-imi aallartitarput - illerngit nutaat atorlugit ingerlaqqittoq "avatangiisinik innarliinngitsumik ineriartornertut". Qulequttat taakku tamarmik siusinnerusukkut nunarsuatsinni naalakkersuinikkut oqallinnermi assut sammineqartarsimapput sulilu aamma uagutsinnut tamanut ukiuni aggersuni aamma naalakkersuinikkut unammilligassatta qularnanngitsumik ilagiuasssallugit.
Piffissap ingerlanerani taamatuttaaq silap pissusii pillugit nunarsuatsinni naalakkersuinikkut siuttut ataatsimeersuartarsimapput, kissaatiginarsimagaluarluni ataatsimeersuarnerni angusat siuttullu aalajangiinerisa tigussaanerusimanissaat silap pissusiisa allanngoriartornerisa sunniutaasa ilaatigut ilungersunarnerat eqqarsaatigalugu.
Issittumi pisuussutit iluaqutiginiarneqarnissaat ineriartortinniarlugu aningaasalersueriaatsit assigiinngitsorpassuit aamma pisariaqartussaapput, ingerlatassat inuilaamiinnerat kisiat pissutiginagu, kisiannili aamma tamaani iluaquteqarniarnissaq eqqarsaatigalugu teknik nutaaliaanerpaaq pisariaqartussaammat, taamatut ingerlataqarneq sulisunut, avatangiisinut Issittumi innuttaasunut sapinngisamik isumannaanerpaamik, minnerunngitsumillu avatangiisinik innarliinnginnerpaamik, ingerlanneqarsinnaaqqullugu.
Nunat OLT-mut ilaasortaasut sulinissaminnut tunngavissiarisimasaat qularutiginngilara OLT-t EU-mi suliffeqarfinnik suleqateqarneranik nukittorsaataajumaartoq. Nunat OLT-mut ilaasortaasut akornanni avatangiisinik innarliinngitsumik ineriartortitsinissamut periarfissat eqqarsaatigalugit oqaloqateqaqqittarnissanut tunngavissiaq alloriaqqinnissanut sukumiisumik naalakkersuinikkut suleqatigiinnermut tunngavissiivoq, minnerunngitsumik nunagisatsinni innuttaasut eqqarsaatigalugit avatangiinik innarliinngitsumik ineriartortitsinissaq tamatta kissaatigisarput peqataasussarlu silap pissusiisa allanngoriartornerinut naleqqussarnissamut innuttaasut periarfissagissaarnerulernissaannut.
Nammineq qularutiginngisaannarsimavara inuiaqatigiinnut uagutsinnut innuttaasunullu ataasiakkaanut ilinniartitaaneq tunngavissat pingaarnerpaat ilagigaat. Ilinniartitaanikkut innuttaasut siunissami unammilligissat nutaat naapinnissaannut periarfissagissaarnerulertarput, silap pissusiisa allanngoriartorneri nunarsuarluunniit tamaat aningaasaqarniarnikkut ajornartoorneq pineqarnersut apeqqutaatinnagu. Innuttaasullu tamakkununnga piareersimanerugaangata tamanna soorunami aamma inuiaqatigiinnut tamanut iluaqutaasarpoq.
Kiisalu maanna maani ataatsimiinnermi katersuussimavugut ilaatigut EU-p OLT-llu akornanni nutaamik isumaqatigiissuteqarnissap ineriartortinneqarnissaa oqaluuserisassanut ilaatillugu, tamannalu soqutigalugu malinnaavigiumaarpara.
Qularutiginngilara maani sulinersi inaarutaasumik nalunaarummik kimittuumik inerneqarumaartoq."
Josef Motzfeldt
Inatsisartut Siulittaasuat
Paasissutissat sukumiinerusut Inatsisartut Siulittaasuat Josef Motzfeldt angallattagaq 55 76 41 attaveqarfigalugu pissarsiarineqarsinnaapput.