2024 2023 2022 Flere år...
03-10-2012
Inatsisartut Siulittaasuata Josef Motzfeldtip folketingip ulloq 2. oktober ammarneqarnerani peqataanera
Inatsisartut Siulittaasuat Josef Motzfeldt folketingip ulloq 2. oktober ammarneqarnerani peqataavoq, tamatumani Savalimmiut lagtingianni siulittaasoq kiisalu folketingimut siusinnerusukkut siulittaasuusarsimasut peqatigalugit Inatsisartut Siulittaasuat ileqqoq malillugu peqataavoq.
Folketingip ammarneqarnerani pisortatigoortumik peqataanermut atatillugu folketingip siulittaasua siulittaasoqarfialu kiisalu folketingimut siulittaasuusarsimasut ullup qeqqasioqatigineqarput, tamatumanilu nalagaaffeqatigiinnerup iluani naalakkersuinikkut inissisimaneq pillugu ilisimateqatigiinnissamut periarfissaqarluni.
Folketingip ukiuata ammarneqarnera, folketingimi sulineq persuarsiutigalugu aalajangersimasunik periuseqarluni ingerlanneqartartoq aamma isumassarsiorfiuvoq Inatsisartullu Siulittaasuat isumaqarpoq Danmarkimi ukiorpassuarni ileqqorineqartoq taanna Nunatsinni Inatsisartunit aamma ilinniarfigineqarsinnaasoq Inatsisartullu ukiuani sulinissap siunissami taamatut ammarnersiorneqarnissaanut pitsanngorsaanissamut periarfissaqartoq.
Kunngissakkut marluliaasa kuisinneranni Inatsisartunit kingusikkaluamik tunissutit
Folketingip ammarneqarnerani peqataaneq iluatsillugu Kunngissakkut marluliaasa kuisinneranni Inatsisartut tunissutaat, tassaasut puisit amiinik atallaaliat ukiorsiutit aappaluttut tungujortullu puisit amiinik nasartallit aaqqatitallillu, Siulittaasumit tunniunneqarput.
Atallaat Nuummi mersortarfimmi Tikermi Maren Clasenimit mersorneqarput teriannissallu amií atallaani aaqqatinilu aamma atorneqartut Ikuo Oshimamit Siorapalummeersumik pisarineqarlutillu suliarineqarput.
Josef Motzfeldt
Inatsisartut Siulittaasuat
Paasissutissat annertunerusut Inatsisartut Siulittaasuannut Josef Motzfeldtimut mobil 55 76 41-imut saaffiginninnikkut pissarsiarineqarsinnaapput.
