2024 2023 2022 Flere år...
18-10-2012
Inatsisartut Siulittaasuat Josef Motzfeldt Korea Kujalliup ambassadørianik ulloq 15. oktober naapeqateqarpoq
Koreap Kujalliup ambassadøriata Byung H. Kimip Københavnimeersup Naalakkersuisut Siulittaasuata Koreamut Kujallermut tikeraarnissaanut piareersaajartuutigaluni Nuummut tikeraarnerminut atatillugu Inatsisartut Siulittaasuannik ilisimateqatigiiffiusumik naapeqateqarnissaminik kissaateqarsimavoq.
Ambassadørip Inatsisartut Siulittaasuannit tusarusussimavaa aatsitassanut ikummatissanullu tunngasut saniatigut qulequttat suut Kalaallit Nunaata Koreallu Kujalliup akornanni suleqatigiiffiusinnaasutut siulittaasup isiginerai.
Inatsisartut Siulittaasuata ambassadøri piffissap ingerlanerani Kalaallit Nunaata Koreallu Kujalliup akornanni atassuteqaataasarsimasunik ilisimatippaa, naak tamakku nunat pineqartut akornanni toqqaannartumik attaveqarnerusimanngikkaluartut. Assersuutitut siulittaasup Koreami sorsunnerup nalaani Narsarsuarmi mittarfiup qanoq inissisimasimanera eqqaavaa ambassadørip uppernarsaan-narsinnaasaanik, soorlu aamma nunatsinnit inuusuttut ilinniartitaanikkut paarlaasseqatigiittarnerit atorlugit sumiiffinnut siusinnerusukkut annerusumik soqutigineqarneq ajortunut, soorlu Asiap kuja-taanut kitaanut noqasulersimasut. Tamatuma saniatigut siulittaasup innersuussutigai korea kujallermiunut nunarsuatsinni angalasarnermini naapittakkaminut issittumullu tunngasunik suliaqartunut attaveqaatini. Tamatuma naatsumik oqaatigalugu uppernarsaannarpaa ulluinnarni immaqa naat-sorsuutigineqanngikkaluartumik nunat pineqartut marluk akornanni attaveqaatit annertoreersut.
Inatsisartut siulittaasuata siusinnerusukkut Aningaasaqarnermut naalakkersuisuusimanermini misilittakkani tunngavigalugit aamma ilisimatitsissutigaa pissusissamisoortorujussuusoq ilinniartitaaneq eqqarsaatigalugu Korea Kujallermi suliniutaasimasut Kalaallit Nunaata ilinniarfigisinnaassappagit, tamannami aqqutigalugu Korea Kujallermi sukkasuumik aningaasaqarniarnikkut ineriartorneq Asiallu kujataani kangiani nukittuutut inissisimalersimanera qularnaarneqarsimammat. Ambassadørip ilisimatitsissutigaa innuttaasut ilinniartitaanerat eqqarsaatigalugu ukiut ingerlanerini pitsaasumik mi-silittaqarlutillu annertuumik iluatsitsisimagaluarlutik massakkut aamma uunga killissimallutik inuussutissarsiutinut ilinniartitaanernut akunnattumik sivisussusilinnut ilinniartunngortartut ikippallallaalersimallutik. Universitetini ilinniartitaanerit sivisunerusut eqqarsaatigalugit suliniuteqarneq assut iluatsissimavoq, maannalu aamma taamatut iluatsissisimaneq inuussutissarsiunut ilinniartitaaner-nut akunnattumik sivisussusilinnut nuunneqarniarluni. Tamatuma saniatigut ambassadørip ilisimatitsissutigaa Korea Kujallermi ilinniagaqarsimassutsip qaffassarneqarnissaanik iliuuserisat kinguaa-riinnut ataatsinuinnaq sammisinnginnamikkit kisiannilu ukiut untritilinut suliniutitut isigigamikkit.
Ilinniartitaanermut tunngasutigut Inatsisartut siulittaasuata aamma pissusissamisoortutut isigivaa qaffasinnerusumik ilinniarfinni ilinniartunik siunissami paarlaasseqatigiittoqartalerpat, ambassadøri isumaqarmat tamatumani siunissami qaninnermi suliniutinik aallartitsisoqareersinnaasoq.
Tamatuma saniatigut Inatsisartut siulittaasuata pissusissamisoortorujussuartut isigivaa niuernermut tunngasutigut suleqatigiittoqarpat, Kalaallit Nunaat aalisakkatigut pisuussuteqarmat Korea Kujaller-milu piserusussinnaasut amigaataanngimmata. Ambassadørip immikkut siunissami puisip neqaa-nik niueqatigiittoqarsinnaanera assut soqutigaa, qularutiginnginnamiuk koreamiut assut nuannarissagaat puisip amiata iluaqutiginiarneqarnerata saniatigut neqaata iluaqutiginiarneqartarnera aamma ileqquummat, tamannalu korea kujallermiunut oqaluttuassaqqimmat puisip neqaanik tuniniaanermut. Ambassadøri allaat ingerlaqqippoq oqarlunilu isumaqarluni pitsaasumik aaqqissuussiso-qarsinnaappat siunissami puisip amia allaat tapertatut tunisassiaannartut isigineqalersinnaasoq.
Ambassadørip Korea Kujallermit isigalugu Kalaallit Nunaata siunissaanut kissaateqarpoq, tassalu siunissami Kalaallit Nunaata ineriartornissaa piumaartoq ineriartornerup avatangiisinillu innarlitsaaliuinerup akornanni pitsaasumik oqimaaqatigiissitsinissaq puigunngilluinnarlugu.
Josef Motzfeldt
Inatsisartut Siulittaasuat
Paasissutissat sukumiinerusut Inatsisartut Siulittasuat Josef Motzfeldt oqarasuaat 55 76 41 attaveqarfigalugu pissarsiarineqarsinnaapput.
