2024 2023 2022 Flere år...
29-10-2012
Inatsisartut Siulittaasuat Josef Motzfeldt Saamit inatsisartuisa siulittaasuannik Egil Ollimik naapeqateqarpoq
Naalagaaffiit Peqatigiit nunarsuarmioqatigiinnit tamanit peqataaffigineqartumik nunat inoqqaavi pillugit ataatsimeersuartitsinissaannut piareersaataasumik Issittumi nunat inoqqaavisa Nuummi ulluni 23. - 24. oktober ataatsimeersuarnerannut siulittaasup peqataaneranut atatillugu Norgemi Saamit inatsisartuisa, Sametingip, siulittaasuat Egil Olli kissaateqarsimavoq Inatsisartut Siulittaa-suannik ulloq 24. oktober naapeqateqarnissaminik ataatsimut naalakkersuinikkut soqutigisat oqaloqatigiissutiginiarlugit.
Josef Motzfeldt Egil Ollilu naapeqatigiinnerminni Saamit inatsisartuinut maanilu Inatsisartunut qinersinermut peqataasinnaaneq qinigaasinnaassuseqarnermullu najoqqutat eqqarsaatigalugit pissutsit atuuttut pillugit ilisimateqatigiipput.
Egil Ollip ilisimatitsissutigaa Saamit inatsisartuinut qinigassanngortissinnaassagaanni piumasaqaataasoq siulit, tassa angajoqqaat, aanaap aataalluunniip imaluunniit aanaqqiutip aataqqiutilluunniip saamiusimanissaat, tassa saamit inuussutissarsiutaannik inuussutissarsiuteqarsimanissaat. Tamatuma saniatigut saamit ataasiakkaat saamiunertik uppernarsarlugu atsiorlutik nalunaaruteqartartussaapput.
Saamiussagaanni saamitut inuussutissarsiuteqarsimasunik siuaasaqarnissanik inatsit 1989-imi akuersissutigineqarpoq, piumasarineqarluni angajoqqaat imaluuniit aanaap aataalluunniip saamiusimanissaat. 1994-imi tamanna annertusineqarpoq aanaqqiutit aataqqiutilluunniit saamiusimappata aamma saamiusutut nalunaarsortittoqarsinnaalerluni.
Saamit inatsisartuini norskit saamilluunniit oqaasii atorneqarsinnaapput, saamilli sumiorpaluutaat pissutigalugit saamit kujasinnerusumiittut oqaasiiniit saamit avannarpasinnerusumiittut oqaasiinut nutserisoqartariaqartarluni. Inatsisartut siulittaasuata ilisimatitsissutigaa nunatsinni kalaallit oqaasii pisortatigoortumik oqaasiusut tamannali killiliinngitsoq oqaatsit allat aamma atorneqarsinnaanerinut.
Saamit inatsisartui norgemi aningaasanut inatsit aqqutigalugu aningaasalersorneqarput, namminerisaminnilli inatsisiliorsinnaatitaanatik akileraartitsisinnaanatillu. Saamit inatsisartui piginnaatitsut tunngavigalugu namminerisaminnik aqutaqarput, soorlu aamma aalajangiinissani saaminut tunngasuni attuumassutilinnilu annertuumik sunniuneqarsinnaatitaasut. Saamit akornanni naalakkersuinikkut oqallinnermi pinngortitami pisuussutinut oqartussaaneq pingaarnerut sammineqartarpoq.
Josef Motzfeldtip ilisimatitsissutigivaa nunatsinniit inerniliunneqarsinnaasoq namminersornerulluni namminersorluni oqartussaaneq pillugit inatsisiliornerni Danmarkimik suleqateqarneq maligassiuilluarnerusimasoq. Soorlu aamma nunarput EF-imit ilaasortaajunnaarnissamik kissaateqarmat Danmark pitsaasumik suleqatigineqarsimasoq. Danmarkip EF-imut 1972-imi ilaasortanngornera namminersornerulerniarnermik suliniarnermik siumut ajatsisut pingaarnerit ilagisimavaat, ullumikkullu danskit Naalagaaffeqatigiiffianni tunngaviusumik inatsimmi ataatsimi killiliussat iluanni pingasunik inatsisartoqarluta inatsisiliorsinnaatitaasunik.
Saamit inatsisartuisa siulittaasuata Egil Ollip naapeqatigiinneq naammassillugu Inatsisartut Siulittaasoqarfiat 2013-imi februaarimi tikeraarsarpaa. Egil Ollip nammineq saamit inatsisartuini ukiuni 24-ni ilaasortaareerluni 2013-imi tullianik qinersisoqarnissaani tunuarnissani naatsorsuutigaa.
Josef Motzfeldt
Inatsisartut Siulittaasuat
Paasissutissat sukumiinerusut Inatsisartut Siulittaasuat Josef Motzfeldt angallattagaq 55 76 41 attaveqarfigalugu pissarsiarineqarsinnaapput.
