2024 2023 2022 Flere år...
02-11-2012
Nunat Avannarliit Siunnersuisoqatigiiffiata 64-issaannik ataatsimiinneranni misigisat - Justus Hansen aamma Kim Kielsen
Issittumut taamatullu Kalaallit Nunaannut soqutiginninnerup malunnartumik annertusiartornera, nunarsuarmi naalagaaffiit killeqarfii naalakkersuinikkullu suliaqarnikkut assigiinngissutsit akimorlugit oqallinnerit, kiisalu Ålandip, Savalimmiut, Kalaallit Nunaatalu suleqatigiinnerisa Nunat Avannarliit Siunnersuisoqatigiiffianni kiisalu Nunat avannarliit naalakkersuisuisa Siunnersuisoqatigiivini pisortatigoortumik ingerlanneqarnerat, tassaapput Nunat Avannarliit Siunnersuisoqatigiiffiata 64-issaannik ataatsimiinneranni Finlandip illoqarfiisa pingaarnersaanni Helsinkimi ulluni 30. oktober - 1. november 2012-imi ingerlanneqartumi peqataareernerminni Justus Hansenip aamma Kim Kielsenip paasisaqarfigisaat pingaarnerit.
Issittoq maannakkorpiaq soqutiginartuuvoq soqutigineqarlunilu, piviusut tunngavigalugit aamma naalakkersuinermik suliallit akornanni, tamannalu Justus Hansenip aamma Kim Kielsenip Nunat Avannarliit Siunnersuisoqatigiiffiata ataatsimiinneranni malugisinnaavaat. Naalakkersuinermik suliaqarnikkut suleqataasa isumaanni Kalaallit Nunaat initunerulersimavoq - maanna ilisimaneqalerpoq Kalaallit Nunaanni nannut, juulimaaq pinngortitarlu kisimik pineqanngimmata - Kalaallit Nunaat tassaavoq imaatigut angallannermi aqqutit nutaat, avatangiisit, mineralit, uulia, nunat allat pillugit kiisalu illersornissamut naalakkersuineq. Issittumi inunnik inuusoqarneranik pinngortitamillu eqqissisimatitsinerup kisimi pineqannginneranik, Nunat Avannarliit Siunnersuisoqatigiiffianni paasinninneq Kim Kielsenip aamma Justus Hansenip nuannaarutigaat. Issittumi isorartuumik sinerialimmi uuttortaavigineqarsimanngitsumillu imartalimmi, angallammik annaassiniartumit imaaliallaannaq tikinneqarfiusinnaanngitsumi imaluunniit napparsimaavimmi atortorissaarutit atorlugit ajornartorsiortunik ikiorsiisinnaanerup ajornarfiani, imaani angallannermi sillimaniarnerup pingaassusaa pillugu Kim Kielsen oqaluttarfimmiit oqalugiaateqarpoq. Islandip suleqatigiinneq pillugu naalakkersuisuanut Justus Hansen apeqquteqarpoq kiisalu piujuartitsineq tunngavigalugu ineriartornermut iliuusissap atuutilersinneqarneranut atatillugu suliaqarnermi siunniussanik tigussaasunik erseqqissunillu saqqummiuussaqaqqullugit Nunat Avannarliit Ministeriisa Siunnersuisoqatigiiffiannut kaammattuuteqarluni, taamaalilluni siunissaq qaninnerusoq ungasinnerusorlu eqqarsaatigalugit maanna sulineq kiisalu siumut suliniutissat takuneqarsinnaaniassammata.
Suleqatigiinnissamik isumaqatigiissutip nunat akornanni attaveqatigiinnermut suleqatigiinnermullu nukittorsaataanissaanik - assigiinngissutsillu tamatuma peqatigisaanik ataqqineqarnissaannik neriuuteqarlutik Kim Kielsen aamma Justus Hansen naggasiipput. Inuiaqatigiittut amerlanngitsunik innuttalittut ataatsimooraanni tusaaneqarnissaq ajornannginnerusarpoq.
Paasissutissat sukumiinerusut Kim Kielsen angallattagaq 54 86 92 aamma Justus Hansen angallattagaq 53 12 10 attaveqarfigalugit pissarsiarineqarsinnaapput.
Nunat Avannarliit Siunnersuisoqatigiiffiat inatsisartutigoortumik suleqatigiiffiuvoq Norgemit, Danmarkimit, Sverigemit, Finlandimit, Islandimit nunanillu namminersorfiusunit Ålandimit, Savalimmiunit Kalaallit Nunaanniillu inatsisartunut ilaasortanit 87-init ilaasortaaffigineqartoq. Inatsisartut Nunat Avannarliit Siunnersuisoqatigiiffianni marlunnik ilaasortaatitaqarput sinniisussalinnik. Inatsisartunut ilaasortat Justus Hansen Demokraatineersoq Kim Kielsenilu Siumumeersoq ilaasortaapput, Olga P. Berthelsen Inuit Ataqatigiinnersoq Akitsinnguaq Olsenilu Siumumeersoq sinniisussaralugit. Justus Hansen siunnersuisoqatigiiffiup Kultureqarnermut Ilinniartitaanermullu Ataatsimiititaliaanut ilaasortaavoq Kim Kielsenilu Avatangiisinut Pinngortitamilu pisuussutinut Ataatsimiititaliaanut ilaasortaalluni.