2024 2023 2022 Flere år...
04-11-2012
Kalaallit Nunaanni siunissami ujaasisarnermut annaassiniartarnermullu upalungaarsimanerup piaartumik aaqqiivigineqarnissaa Sanaartornermut Avatangiisinullu ataatsimiititaliap eqqummaariffigaa
Siunissami ujaasisarnermut annaassiniartarnermullu upalungaarsimanerup piaartumik aaqqiivigineqarnissaanut Sanaartornermut Avatangiisinullu ataatsimiititaliaq piffissami kingullermi eqqummaarissimavoq.
2011-mi januarimi Kalaallit Nunaanni siunissami ujaasisarnermut annaassiniartarnermullu upalungaarsimanermik inassuteqarnissamut saqqummiussinissaq siunertaralugu Suleqatigiissitaq Kalaalit Nunaannit Danmarkimillu inuttaqartoq pilersinneqarpoq. Ataatsimiititaliap piffissami sivisuumi Suleqatigiissitap suliaata ineriartornera malinnaaffigisimavaa.
Pineqartoq pillugu ataatsimoorussamik isumaqatigiissutip atorunnaarsinneqarsimanera, kiisalu qulimiguulimmik upalungaarsimaneq pillugu isumaqatigiissummik ataatsimoorussamik nutaamik Naalakkersuisut kissaateqanngitsut Ataatsimiititaliap maanna ilisimalersimavaa.
Taamaalilluni siunissami ujaasisarnermut annaassiniartarnermullu aaqqiissummik nassaarnissamut naalagaaffimmi oqartussaasut kisimik pisussaalerput.
Ataatsimiititaliaq kingullermik ataatsimiikkami Ineqarnermut, Attaveqarnermut Angallannermullu Naalakkersuisoq isumasioqatigiinnissamut aggersassallugu aalajangersimavoq. Isumaliutersuutit iliuutsillu suut tunngavigalugit ujaasisarnermut annaassiniartarnermullu upalungaarsimanermik ataatsimoorussamik isumaqatigiissutip atorunnaarsinneqarneranut pissutaanersut ilaatigut paasissallugit Ataatsimiititaliap kissaatigaa.
Tamatuma saniatigut Folketingimi Grønlandsudvalg-imut aamma Forsvarsudvalg-imut kiisalu Folketingimi ilaasortanut Kalaallit Nunaanneersunut Ataatsimiititaliaq saaffiginnissuteqarsimavoq, Kalaallit Nunaanni ujaasisarnermut annaassiniartarnermullu upalungaarsimanerup piaartumik aaqqiissuteqarfiginissaanut taakku suliniuteqarnissaannik kaammattorlugit.
Juliane Henningsen
Sanaartornermut Avatangiisinullu ataatsimiititaliami siulittaasoq
Paasisaqarnerorusunnermi Sanaartornermut Avatangiisinullu ataatsimiititaliami siulittaasoqattavigineqarsinnaavoq; mobil +299 48 81 48.