2024 2023 2022 Flere år...
13-11-2012
Nunat Avannarliit Killiit Siunnersuisoqatigiiffiata Siulittaasuata Josef Motzfeldtip Nunat Avannarliit Killiit kulturikkut ulloqartinneqartarnerannik aaqqissuussineq Naalakkersui-sumut Mimi Karlsenimut ingerlateqqippaa
Nunat Avannarliit Killiit Siunnersuisoqatigiiffiata siulittaasuata Josef Motzfeldtip Nunat Avannarliit Killiit kulturikkut ulloqartinneqartarnerannik aaqqissuussineq ulloq 9. november Kultureqarnermut Naalakkersuisumut Mimi Karlsenimut ingerlateqqippaa.
Nunat Avannarliit Killiit Siunnersuisoqatigiiffiata ukiumoortumik ataatsimiinnerinut nalinginnaasumik aggustip naalernerani septembarilluunniit aallartilaarnerani ingerlanneqartartunut atatillugu nunani avannarlerni killerni nunat pingasut paarlakaajaallutik nunat avannarliit killiit kulturikkut ulloqartinneqarnerannik aaqqissuisarnissaannik Nunat Avannarliit Killiit Siunnersuisoqatigiiffiata 2008-mi kaammattuuttaa nunani pingasuni inatsisartunit tamanit akuerineqarnikuuvoq. Kulturikkut ulloqartitsineq ukioq manna Islandimi Reykjavikimi ingerlanneqarpoq Nunat Avannarliit Killiit Siunnersuisoqatigiiffiata Savalimmiuni ukiumoortumik ataatsimiinneranut nangissutitut.
Reykjavikimi kulturikkut ulloqartitsineq illoqarfimmi sumiiffinni assigiinngitsuni assigiinngitsorpassuarnik pisoqarfiusumik ingerlanneqarpoq Reykjavimi innuttaasut takornarniallu eqqumiitsuliornermi, nerisassiornermik qangaanerusumik nutaaliaanerusumilu, nipilersornermi allarpassuarnilu nunani avannarlerni killerni ileqqunik misigisaqarnissaannut periarfissillugit. Ingerlatarpassuarnut nunani avannarlerni killerni suliffeqarfiit annertuumik tapersersueqataapput. Soorlu aamma kulturikkut ulloqartitsineq iluatsillugu Nunat Avannarliit Killiit meeqqanut atuakkianut nersornaasiuttagaannik ajugaasoq nalunaarutigineqarpoq taamatullu aamma nunat avannarliit killiit ataatsimut oqaluttuarisaanerannik atuakkiaq "Naboer i Nordatlanten" ("Atlantikup avannaani sanileriit") saqqummersinneqarluni.
Taamaalillu Nunat Avannarliit Killiit Siunnersuisoqatigiiffiannut siulittaasutut nunarpullu sinnerlugu Josef Motzfeldtip tullianik kulturikkut ulloqartitsinissamut katinngat ingerlateqqittagaq tiguaa nunatsinni Kultureqarnermut Naalakkersuisumut innuttaasunullu soqutiginnittunut ingerlateqqitassatut.
Maanna tassa Kultureqarnermut Naalakkersuisup akisussaaffigilerpaa nunatsinni kulturikkut ulloqartitsinissap tulliata aallartinnissaa Nunanilu avannarlerni killerni suliffeqarfinnut kulturikkullu suliniuteqarfinnut assigiinngitsunut attaveqarnissap qularnaarneqarnissaa, qulaarniarlugu taamatut ulloqartitsinerup Nunani avannarlerni killerni kulturikkut periarfissanik tunngaveqarluarluni ingerlanneqarsinnaanissaa Nunat avannarliit killiit kulturikkut ataatsimoorfissaqarsinnaanerannik innuttaasut misigisillugit.
Josef Motzfeldt
Inatsisartut Siulittaasuat
Paasissutissat sukumiinerusut Inatsisartut Siulittaasuat Josef Motzfeldt angallattagaq 55 76 41 attaveqarfigalugu pissarsiarineqarsinnaapput.
