2024 2023 2022 Flere år...
22-11-2012
Inuussutissarsiornermut Ataatsimiititaliap Suliat angisoorsuit pillugit inatsimmik aamma Atsitassat pillugit inatsimmik suliaqarnera
Inuussutissarsiornermut Ataatsimiititaliaq inatsisartut ataatsimiinneranni matumani inatsisinik aalajangiiffigisassatullu siunnersuutinik arlalippassuarnik suliaqarpoq, tamarmik peqqissaartumik suliarineqartunik. Inatsisit ilaat suliarineqartoq tassaavoq, suliniutit angisuut pillugit inatsisissaq. Inuussutissarsiornermut Ataatsimiititaliap maluginiarpaa suliniutit angisuut pillugit inatsisissap ataatsimiititaliamit suliarineqarnera assut soqutigineqartoq.
Inatsisissatut siunnersuutip tamatuma innuttaasuniit soqutigineqarluarnera ataatsimiititaliap paasilluarsinnaavaa, taamaattumillu manna iluatsillugu ataatsimiititaliap sulinerata killiffia pillugu aamma naatsumik paasissutisseerusulluni ilutigitillugulu inatsisartut ataatsimiititaliaasa qanoq suleriaaseqarnera aamma pillugu paasissutissiilluni.
Suliniutit angisuut pillugit inatsisip suliarineqarnera aammattaaq ataatsimiititaliami suleriuserineqartartut allat malillugit suliarineqarpoq. Inatsisissatut siunnersuutip taassumalu immikkuualuttortai suliap aallarnisarneqarnerani ataatsimiititaliap peqqissaarullugit oqallisigisarsimavai. Tamanna tunngavigalugu ataatsimiititaliaq Naalakkersuisunut arlalinnik apeqqusiortarsimavoq, akissuteqarfigineqartunik. Ilutigitillugulu soqutigisaqaqatigiinnik kattuffinnillu arlalinnik ataatsimiititaliaq ataatsimeeqateqartarsimavoq, tamarmik inatsisissatut siunnersuutip imarisaanut soqutiginnittut.
Naalakkersuisut akissuteqaataat tunngavigalugu kiisalu kattuffinnit, immikkut ilinniagalinnit allaniillu paasissutissiissutigineqartut tunngavigalugit ataatsimiititaliaq allanittaaq apeqquteqartarpoq, Inuussutissarsiornermut Aatsitassanullu Naalakkersuisumik kiisalu Naalakkersuisut Siulittaasuannik apersuinermik malitseqartunik.
Taamaalilluni Inuussutissarsiornermut Ataatsimiititaliaq inatsimmi immikkoortut tamaasa pillugit taamaalilluni siammasissumik ilisimasaqarfigai, aamma inatsisissatut siunnersuummut attuumassuteqartut tunngaviusumik siunertaasut ajornartorsiutaasinnaasullu, aammalu inatsisissatut siunnersuummut isornartorsiuinerit malinnaavigalugit. Ilisimalikkat tamakkua ataatsimiititaliap suliaminut ilaatillugit suliareqqissavai.
Maannagaaq aalajangiusimaneqarpoq, Inuussutissarsiornermut Ataatsimiititaliap inatsisissatut siunnersuummut allannguutissatut siunnersuusiornissaa. Paasissutissat katersorneqartut imaqqortoorujussuit Inuussutissarsiornermut Ataatsimiititaliap suliarereerpagit aammalu inatsisissatut siunnersuutip politikkikkut soorlutaaq aamma inatsisitigut imarisai aaqqissuutereerpata, ataatsimiititaliap isumaliutissiissutissani saqqummiutissavaa.
Ataatsimiititaliap inatsisissamik suliarinninni aatsaat naammassereeruniuk aammalu apeqqutit nalornissutaasut qulaajarneqareerpata isumaliutissiissutissani saqqummiutissavaa. Allannguutissatut siunnersuutip qanoq imaqarumaarnissaa, imaluunniit qaqugu saqqummiunneqarnissaa kiisalu isumaliutissiissutissaq qanoq imaqassanersoq maannagaaq ataatsimiititaliap oqaatigerusunngikkallarpaa.
Naggasiutigalugu ataatsimiititaliap erseqqissaatigerusuppaa, tassalu inatsisissamik suliarinninneq pimoorulluinnarlugu pisariaqanngitsumillu nukingiunnagu suliarineqarmat.
Naja Nathanielsen
Inuussutissarsiornermut Ataatsimiititaliap siulittaasua
Paasisaqarnerorusukkaanni Inuussutissarsiornermut Ataatsimiititaliap siulittaasua Naja Nathanielsen saaffigineqarsiinaavoq angallattagaq 29 57 04 aqqutigalugu.