2024 2023 2022 Flere år...
29-11-2012
Qaqortumi mittarfiliornissamut pilersaarutit misissuinerillu suliarineqarnerannik Sanaartornermut Avatangiisinullu ataatsimiititaliap ilisimatinneqarsimannginnini ajuusaarutigaa.
Assartuussineq pillugu Isumalioqatigiissitap inassutai pillugit piviusunngortitsiniarnermik suliaqarnerup ingerlaneranik, tamatumanilu soorlu mittarfinnik umiarsualivinnillu nutaanik sanaartornerit killiffii pillugit, Sanaartornermut Avatangiisinullu ataatsimiititaliap ataavartumik ilisimatinneqartarnissaminik Ineqarnermut, Attaveqarnermut Angallannermullu Naalakkersuisoq arlaleriarluni erseqqissaavigisarpaa.
Taamaattumik Qaqortumi mittarfiliornermut pilersaarutit misissuinerillu pillugit suliaqarnermik Ataatsimiititaliap ilisimatinneqarsimannginnini, paarlattuanillu suliap killiffia pillugu tusagassiuutitigut paasisaqartarnini kingornatigullu paasissutissanik attuumassuteqartunik Ineqarnermut, Attaveqarnermut Angallannermullu Naalakkersuisumut nammineq pissarsiniartarnini ajuusaarutigilluinnarpaa.
Ulloq 24. oktober 2012 Qanoruukkut aamma 25. oktober Sermitsiakkut Kujataani siunissami angallannermik aaqqissuussineq pillugu ilaatigut innuttaasunik Kommuni Kujallermilu kommunalbestyrelsimik oqaloqateqarnissaq siunertaralugu Ineqarnermut, Attaveqarnermut Angallannermullu Naalakkersuisoq Kujataaniissimasoq Sanaartornermut Avatangiisinullu ataatsimiititaliaq paasisaqarpoq. Sermitsiaq.gl-mi allaatigisami "Qaqortoq tuaviussaaq"-mi ilaatigut allassimavoq, marlunngornermi 23. oktober Naalakkersuisunut ilaasortaq Kommuni Kujallermilu kommunalbestyrelsimik ataatsimeeqateqarsimasoq, tassani Kommunalbestyrelsi Qaqortumi mittarfiliornissamut tigussaasumik siunnersuummik Air Greenland A/S-ip aqutsinermi pisortaanit Michael Binzerimit aamma Ineqarnermut, Attaveqarnermut Angallannermullu Naalakkersuisumit qinnuigineqarsimalluni.
Kingornatigut ulloq 25. oktober 2012 Naalakkersuisunut ilaasortaq tusagassiorfinnut nalunaaruteqarpoq, qulequtserlugu
"Qaqortumi mittarfiliorsinnaaneq", tassani Kujataani ataatsimiinnerit siunertai aamma Qaqortumi mittarfiliornissamut aalajangiinermi suliap ingerlaqqinneranik paasissutissiisoqarluni.
Misissuinerit suut ingerlanneqarsimanersut aamma suut aalajangerneqarsimanersut pillugit paasissutissat assigiinngitsuunerat pissutigalugu, ulloq 27. oktober 2012 Qaqortumi mittarfiliornissamut pilersaarutit killiffiat pillugu paasissutissinneqarnissamik Sanaartornermut Avatangiisinullu ataatsimiititaliap Ineqarnermut, Attaveqarnermut Angallannermullu Naalakkersuisumut qinnutigaa.
Ulloq 14. november 2012 akissut tunngavigalugu Ataatsimiititaliap paasisinnaavaa, mittarfiup nutaap Qaqortup eqqaani inissinnissaanut teknikkikkut misissueqqaarnerit ilaatigut ingerlanneqareersut, kisiannili pilersaarutit ingerlaqqinnissaannut Qaqortup eqqaani mittarfiup inissinnissaanut inaarutaasumik aalajangiinissamut tunngavissanut misissueqqissaarnerit arlallit suli amigaataasut.
Inatsisartut tamatumani aalangiinnginneranni misissueqqissaarnerit arlalissuit suli ingerlanneqartussaammata, Naalakkersuisut Narsarsuarmi mittarfiup Qaqortumut nuunneqarnissaanut atatillugu aalajangiisimasutut paasineqarsinnaasumik tusagassiuutitigut saqqummiunneqarsimanera Ataatsimiititaliap ajuusaarnarluinnartutut isigaa.
?
Juliane Henningsen
Sanaartornermut Avatangiisinullu ataatsimiititaliami siulittaasoq
?
Paasisaqarnerorusunnermi Ataatsimiititaliap siulittaasua Juliane Henningsen attavigineqarsinnaavoq, mobil + 299 48 81 48