Nutaarsiassat

06-12-2012

Inatsisartut Siulittaasuat Ambassadør Mr Kemal Siddiquemik naapeqateqarpoq

Inatsisartut Siulittaasuata Josef Motzfeldt Singaporip Danmarkimi Ambassadørianik Mr Kemal Siddique ulloq 5. december naapeqateqarpoq.

Ambassadøri Inatsisartut siulittaasuannik ilisimateqatigiiffiusumik ataatsimeeqateqarnissaminik kissaateqarsimavoq ilaatigut Inatsisartuni naalakkersuinikkut sulineq pillugu paasisaqarusulluni kiisalu nunatsinnut tikeraarnerminut tunuliaqutaasut pillugit ilisimatitsissuteqarusulluni.

Tunuliaqutitut paasissutissatut ilisimatitsissutigisinnaavara Singapore Issittumi Siunnersuisoqatigiinni ilaatsinaatsutut inissisimalerumalluni qinnuteqarnikuummat. Singapore asiap kangiani nuna-rujussuarnut allanut sanilliulluni nunavarannguatut imminut isigivoq asiallu kangiani nunarujussuit issittumik soqutiginninnerannut sanilliullugu nalilerneqannginnissartik pingaartillugu. Singapore illoqarfittut naalagaaffiuvoq 710,2 km2-inillu annertussuseqarluni. Innuttaasut 4,1 mio-iupput.

Siulittaasup ambassadørimut apeqqutigaa suliartortut avataaneersut eqqarsaatigalugit Singapore qanoq politikkeqarnesoq. Ambassadørip siulittaasumut ilisimatitsissutigaa Singapore sulisunik avataaneersunik ukiorpassuarni misilittagaqartoq, tamannalu aamma innuttaasut naatsorsorneqar-neranni ersersinneqartartoq nunaqavinngitsut naatsorsuinermut ilaatinneqartarmata, naak aamma nunaqavinngitsut sivisunerpaamik ukiut pingasukkaaginnarlugit Singaporemiissinnaagaluartut. Ambassadørip ilisimatitsissutigaa inuit Singaporermiuittut taaneqarsinnaasut inuit 3 mio. missigigaat.

Ambassadørip taamatuttaaq ilisimatitsissutigaa sulisartut avataaneersut sulisinnaanermut akuersissutaat eqqarsaatigalugit Singapore qangaaniilli sukangasuunik piumasaqaateqartarsimasoq. Sivisunerpaamik ataannartumik ukiuni pingasuni Singaporemiittoqarsinnaavoq tamatumalu kingorna Singapore qimanneqartariaqartarluni, apeqqutaatinnagu assersuutigalugu Singaporemi aalajangersimasumik najugalimmik ilaqutaqalersimaneq, soorlu aamma sulisussat avataaneersut ilaqutaat tamaasa ilanngullugit Singaporemiissinnaanermut akuersissummik tunineqarneq ajortut. Ambassadørip isertuutinngilaa tamanna ukiut ingerlanerini sukangasumik nunanut allamiunut politikkeqarnertut isigineqarsimammat, tamannali aalajangiusimaneqartoq Singaporimi innuttaasut ikereernerat pissutigalugu.

Siulittaasup apeqqutigaa issittumi ineriartortitsinermut Singapore sunik tunniussaqarsinnaasutut imminut isiginersoq. Ambassadørip ilisimatitsissutigaa tikeraarnerminut annerusumik pissutaasoq Singapore kissaateqarmat paasitissallugu issittumi nunat inoqqaavi eqqarsaatigalugit Singaporip tunniussinnaasai pillugit ilisimatitsinissani. Ambassadørip ilisimatitsissutigaa Singapore suliassa-qarfippassuarni sullissinerni assigiinngitsuni ilisimasassat eqqarsaatigalugit nunarsuarmi mesteriummat. Singapore aatsitassarsiornermi il.il. taakkuninngalu iluaquteqarniarnermi immini soqutigi-saqanngilaq. Akerlianik inuussutissarsiornikkut periarfissat taakku iluanni sullissinerni ilisimasaminnik neqerooruteqarsinnaapput. Tamatumunnga atatillugu anbassadørip assersuutitut taavai uuliasiorluni qillerivinnik sanaartornermik ineriartortitsinermillu annertuumik immikkut ilisimasaqa-lersimanertik, inuussutissarsiutinik teknikkut atortunik nutaaliaasunik annertuumik atuiffiusumik sullissisinnaanertik minnerunngitsumillu uuliaarluertoqartillugu akiuiniarnermik inuussutissarsiummik immikkut ineriartortitsisimanertik.

Ambassadørip malugeqquaa Issittumi Siunnersuisoqatigiinnut alaatsinaatsutut inissisimalernissamut piumasaqaatit naammassisimallugit nalileritsik, taamatullu aamma isumaqarlutik issittumi nunani nunat inoqqaavisa soqutigisaasa ineriartortinneqarnerannut tunniussaqarsinnaallutik.

Josef Motzfeldt

Inatsisartut Siulittaasuat

Paasissutissat sukumiinerusut Inatsisartut Siulittaasuat Josef Motzfeldt angallattagaq 55 76 41 attaveqarfigalugu pissarsiarineqarsinnaapput.