2024 2023 2022 Flere år...
30-01-2013
Nunat Avannarliit Siunnersuisoqatigiiffiata Reykjavikimi ulluni 28. aamma 29. januar 2013-imi ataatsimiinnerani Kim Kielsen aamma Justus Hansen Inatsisartut sinnerlugit peqataapput
Inatsisartunut ilaasortat Kim Kielsen (S) aamma Justus Hansen (D) Sverigemi, Danmarkimi, Islandimi, Savalimmiuni Ålandimilu naalakkersuinermik suliaqartut peqatigalugit Nunat Avannarliit Siunnersuisoqatigiiffiata januarimi ataatsimiinnerani, tamatumuuna Islandimi Reykjavikimi ingerlanneqartumi peqataapput.
Islandimiunit nuannaarutigineqartumik tamatumalu peqatigisaanik nunat avannarliit tapersersuinerat pillugu qujassuteqarfigineqartumik aningaasat Islandimi internetikkut aningaaseriviup Icesavep ajalusoornerani annaaneqartut utertinneqarnissaannut Island inatsisitigut pisussaaffeqanngitsoq Eftap eqqartuussivianit aalajangerneqarnerata nalaani ataatsimiinnerit ingerlanneqarput.
Ataatsimiinnerit akornanni unikkallartarnerni Eftap eqqartuussiviata aalajangiinera naalakkersuinermik suliaqartunit kisimi oqaluuserineqanngilaq. Suliniutit annertuut pillugit Kalaallit Nunaanni inatsisitaaq aammalu aatsitassanik atorluaasinnaanermut periarfissat naalakkersuinermik suliaqartunit atorfilittanillu assut soqutigineqarput. Kiniserit, Kalaallit Nunaata Danmarkillu akornanni pissutsit (kikkut sunik aalajangiisinnaatitaanersut) aammalu uran pillugit apeqqutit amerlaqisut Kim Kielsenip aamma Justus Hansenip akissuteqarfigaat. Suliniutit annertuut pillugit inatsit, taassuma imarisai pingaaruteqassusialu pillugit ilisimasat tigussaasut nunanit avannarlernit amigaatigineqartut apeqqutit takutippaat.
Inatsisartunut ilaasortat taakku marluk Nunat Avannarliit Siunnersuisoqatigiiffianni parteeqatimik ataatsimiinneranni ataasinngornermi ulloq 28. januar peqataapput, tamatumani Kim Kielsen socialdemokraatit gruppianni ilaasortaavoq Justusilu qiterliit gruppianni (midtergruppen) ilaasortaalluni. Partiit ataatsimiinnitik marlunngornermi ulloq 29. januar ullaap tungaani nangippaat.
Tamatuma kingorna immikkoortut arlallit, tamarmik nunanut Nunani Avannarlerni Siunnersuisoqatigiinnut ilaasortaasunut tunngasut, isummerfigissallugit ataatsimiititaliat ataatsimiipput. Kalallit Nunaat Kultureqarnermut Ilinniartitaanermullu Ataatsimiititaliami, Justus Hansenip ilaasortaaffigisaani, aammalu Avatangiisinut Pinngortitamilu Pisuussutinut Ataatsimiititaliami, Kim Kielsenip ilaasortaaffigisaani, sinniisoqarpoq.
Paasissutissat annertunerusut Kim Kielsenimut mobil 54 86 92-imut aamma Justus Hansenimut mobil 53 12 10-mut saaffiginninnikkut pissarsiarineqarsinnaapput.
Nunat Avannarliit Siunnersuisoqatigiiffiat inatsisartutigoortumik suleqatigiiffiuvoq Norgemeersunit, Danmarkimeersunit, Sverigemeersunit, Finlandimeersunit, Islandimeersunit nunanilu namminersortunit; Ålandimeersunit, Savalimmiuneersunit Kalallillu Nunaanneersunit 87-inik ilaasortaqartoq.
Inatsisartut Nunat Avannarliit Siunnersuisoqatigiiffiani marlunnik ilaasortaqarlutillu marlunnik sinniisussaqarput. Inatsisartunut ilaasortat Justus Hansen Demokraatineersoq aamma Kim Kielsen Siumumeersoq ilaasortaapput, taakkulu sinniisussaraat Olga P. Berthelsen Inuit Ataqatigiinneersoq aamma Akitsinnguaq Olsen Siumumeersoq.