2024 2023 2022 Flere år...
18-02-2013
Inuusuttut Inatsisartui sapaatip akunnera una ingerlanneqassaaq
Sapaatip akunnerani uani tallimanngorpat Inuusuttut Inatsisartuinik taallugu aaqqissuussineq aallartissaaq. Ulluni pingasuni meeqqat atuarfianni 9. aamma 10. klassini atuartut aaqqissuussinermut peqataassapput. Peqataasussanit 35-iusunit 29-it illoqarfinnit nunaqarfinnillu Nuup avataaneersuupput. Inuusuttuaqqat peqataasussat 14-it 16-illu akornanni ukioqarput.
Inuusuttut ullut pingasut ingerlaneranni Inatsisartut innuttaasullu oqartussaaqataanerat pillugu sammisaqassapput ulluinnarnilu qinikkat aqqutigalugit innuttaasut oqartussaaqataanerata ulluinnarni qanoq ingerlanneqartarneranik misiliissallutik. Kingullermik februaarimi 2009-mi Inuusuttut Inatsisartuinik taallugu aaqqissuussisoqarpoq, ukioq mannali Inuusuttut Inatsisartoqartinneqarnissaat nutaarluinnarmik tunngaveqarluni ingerlanneqartussaalluni. Aaqqissuussinermi qitiutinneqarpoq inuusuttut Inatsisartoqarneq pillugu ilisimasassanik immersorneqarnissaat peqatigitillugulu nammineq isummersinnaanerminnik isummaminnillu illersuisinnaanerminnik ilinniartinneqarnissaat innuttaasut oqartussaaqataaneranni nalinginnaasumik malittarisassat isiginiarlugit.
Ukioq manna Inatsisartut Inatsisartuinik taallugu aaqqissuussinermi qulequttatut sammineqassaaq " Oqaatsit - Oqaatsitigut piginnaasassavut eqqarsaatigalugit pingaartitavut anguniakkanut naapertuuppat?".
Inuusuttut Inatsisartui sapaatiuppat Inatsisartut ataatsimiittarfianni tamanut ammasumik oqallinnermik naggaserneqassapput. Oqallinneq sapaatiuppat nal. 14.00-imiit KNR-ip KNR 2-kkut toqqaannartumik aallakaatissavaa.
Tamatuma saniatigut kikkut tamarmik toqqaannartumik malinnaasinnaanngitsut isiginnaagassiaq "Inatsisartut innuttaasullu oqartussaaqataanerat" inu.gl-imi isiginnaarsinnaavaat. Isiginnaagassiami ilaatigut nassuiaatigineqarpoq Inatsisartut sunik suliassaqarnersut, innuttaasut qinikkat aqqutigalugit oqartussaaqataanerat qulliunerusumik suunersoq, taamatullu aamma Inatsisartut Naalakkersuisullu akornanni suleqatigiinneq ulluinnarni qanoq ingerlanneqartarnersoq. Isiginnaagassiaq naqitaaqqamik tapertaqartinneqarpoq atuartitsinermi ilinniartitsinermilu aamma atorneqarsinnaasumik.
Inuusuttut Inatsisartuinik taallugu aaqqissuussineq pillugu pisussanut pilersaarut sukumiisoq paasissutissallu attuumassutillit allat inu.gl-imi aamma ina.gl/inu-mi takuneqarsinnaapput.
Josef Motzfeldt
Inatsisartut Siulittaasuat
Paasissutissat sukumiinerusut Inatsisartut Siulittaasuat Josef Motzfeldt angallattagaq 55 76 41 attaveqarfigalugu pissarsiarineqarsinnaapput. Aaqqissuussineq pillugu teknikikkut paasissutissat Attaveqaqatigiinnermik suliutinillu sulialik Nils Baum 34 61 14 attaveqarfigalugu pissarsiarineqarsinnaapput.