2024 2023 2022 Flere år...
21-02-2013
Ilitsoqqussaralugu oqaatsit ulluat, 21. februar 2013
Februarip 21-at Naalagaaffiit Peqatigiit 1999-imi ataatsimeersuarneranni akuerineqartutut ilinniartitaanermut, inooqatigiinnermut piorsarsimassutsimullu immikkoortortaata UNESCO-p ilitsoqqussaralugu oqaatsinut ullorititaraa.
Ulloqartitsinikkut siunertarineqarpoq oqaatsit assigiinngitsut
amerlangaarsusaat nunarsuarmilu inuiaat tamarmik oqaatsimik
saniatigut allat oqaasiinik ilisimasaqarlernissaasa
siuarsarneqarnissaat.
Oqaatsit inuiappassuit tamatta pingaarnerpaatut atortussaraavut inuiattut naleqartitatut kingornussat pigisatta, tigussaasut tigussaanngitsullu, tammatsaalinissaannut ineriartortinnissaannullu. Tamatumuuna kulturikkut pigineqartorpassuit oqaatsillu assigiinngitsut atorlugit ilinniartitseriaatsip nukittorsarnissaat kisimi pineqanngillat. Ilanngullugumi siunertarineqarpoq nunarsuarmi tamarmi oqaatsitigut kulturikkullu pigisatoqqat ilisimaneqarnerulernissaat paaseqatigiinnikkut, akaareqatigiinnikkut isumasioqatigiinnikkullu ataatsimoorfigeqqullugu kaammattuutigineqassasoq.
UNESCO-p aalajangersagaa ilitsoqqussaralugu oqaatsinut ulloqartitsisalernermut tunuliaqutaasoq matumani pineqartoq nunatsinnut atuutissasoq Inatsisartut 2009-mi ukiakkut ataatsimiinnerminni akueraat.
Taassuma ilaatigut nassataraa nunatsinni oqaatsinut politikkip inatsisiliuullugu aalajangersaavigineqarnera.
Inatsimmi oqaatsitta pingaassusaasa ineriartortittuarnissaasalu
erseqqissaavigineqarnerisa saniatigut oqaatsitigut aporfiusartut
pinaveersaarumallugit oqaatsinik arlalinnik ilisimasaqarnerup
nakooqutitut pisuussutitullu inuiaqatigiinnit pigineqalernissaa
inatsisimmi aalajangikkat ilagaat.
Taama ilitsoqqussanik oqaaseqarnerup pingaartinneqarnera
nunarpassuit allat inuiassuini aamma atuuppoq. Oqaatsillu tamarmik
illersorneqarnissaannut
ineriartortittuarnissaannullu periarfissatsialaavoq inuiaat allat
oqaatsimikkut misilittagaannik paarlaasseqatigiumallugit
isumasioqatigisinnaanissaat. Tulluanngilaq qineqqusaarnerinnarni
qaatsiaannartumik oqaatsit sammineqaannarnissaat. Nunatsinnit nunat
tamat akornini aalajangersakkat maani
atuuttussanngorlugit akuerisarpavut nunarsuarmioqativut
peqatigerusukkatsigik. Oqaatsit pillugit apeqqut nunarsuup inuinut
tamanut tunngasoq ataatsimoorfissatsialaavoq. Aamma
taamaaliornitsigut nunatsinnit kulturikkut pisuussutitta ilaattut
oqaatsitsinnik suliaqarnermi inuiannut allanut
tunissutissaqarpugut.
Oqaatsinut inatsisip naleqqussaqqinnissaani oqaatsitta saniatigut oqaatsinik arlariinnik ilisimasartariaqarnermut aalajangersakamut ussersorluni oqaatsit oqaatsinut tamanut naligitinneqarnissaat ilanngullugu isummerfigineqartariaqarpoq.
Ilitsoqqussatut oqaatsit saniatigut inuiaat allat oqaasiinik ilisimasaqarneq pisuussutitut isigissavarput. Allamiut oqaasiinik ilinniassagutta soorunami pingaartuuvoq eqqaamajuassallugu nammineq ilitsoqqussatut oqaaseqarnissaq, taakku tassaammata oqaatsinik allanik ilinniarnitsinni naleqqersuutitut atugassat.
Kikkunnut tamanut, aamma qinigassanngortittunut, kaammattuutigaara ullumi ilitsoqqussaralugu oqaatsit ulluanni nunatsinni tamani tamaani malunnartitsiniarluni periarfissiissutit oqallinnermi torersumik sunniuteqanngitsoortussaanngitsutut atorluarniaqqullugit.
Josef Motzfeldt
Inatsisartut Siulittaasuat
Paasissutissat sukumiinerusut Inatsisartut Siulittaasuat Josef Motzfeldt angallattagaq 55 76 41 attaveqarfigalugu pissarsiarineqarsinnaapput.