2024 2023 2022 Flere år...
08-05-2013
Aatsitassanut Ataatsimiititaliaq aamma Aningaasaqarnermut Akileraartarnermullu Ataatsimiititaliaq ulluni 6. - 8. maj 2013 isumasioqatigiittut
Inatsisartut Aningaasaqarnermut Akileraartarnermullu Ataatsimiititaliaannut kiisalu Aatsitassanut Ataatsimiititaliaannut ilaasortat ulluni 6. - 8. maj 2013 nunatsinni aatsitassarsiornerup ineriartornera pillugu inuiaqatigiillu kalaallit ineriartornermit tamatuminnga qanoq annertunerpaamik pissarsiaqarsinnaanerannut paasisaqarnerorusullutik Nuummi isumasioqatigiipput.
Isumasioqatigiinnermi siunertarineqarpoq ataatsimiititaliamut ilaasortat nutaat qinigaaffimmut matumunnga minnerunngitsumillu ukiakkut ataatsimiinnermut aggersumut atatillugu ataatsimiititaliat suliassaannut unammilligassaannullu tunngaviusumik piareersareernissaat. Isumasioqatigiinneq taamatuttaaq Københavnimut ataatsimiititaliat marluk qaammatip naalernerani paasisassarsiorlutik angalanissaannut piareersarneruvoq.
Isumasioqatigiinnermi ataatsimiititaliat Naalakkersuisut sinniisaannik kiisalu nunatsinni aatsitassarsiornermik immikkut ilisimasalinnik arlalissuarnik naapeqateqarput. Isumasioqatigiinneq assut pissarsiviuvoq, taamaalillunilu aatsitassarsiornermik aallartitsinissami periarfissat unammilligassallu itinerusumik assigiinngisitaarnerusumillu paasisaqarfigineqarlutik. Tamatumunnga peqataasut tamaasa ataatsimiititaliap qujaffigiumavai.
Taamaalilluni akileraartarnermut pissutsit, nunarsuarmi niuerfiit aammalu nunatsinni suliniutit aalajangersimasut ataqatigiinnerat ataatsimiititaliat ilisimasaqarfigilerpaat. Isumasioqatigiinnermi ataatsimiititaliat pingasunik maluginiagaqarput malitseqartinneqalersaartunik:
- Akileraarutinik akitsuutinillu Kalaallit Nunaata ingerlatseqatigiiffinnit pisassarisaanik nakkuttilliinerup ukiuni qaninnerni pitsanngorsaavigineqarnissaa pisariaqartoq.
- Siunissami akileraartitseriaasissap paasinarsisinneqarnissaata pisariaqartinneqarnera arlalinnit tikkuarneqartoq. Royaltiesit atorneqalernissaannik pilersaarutit inatsisitigut akornutissaqanngitsutut aatsitassarsiorfinnit akuersaarneqartut, taakkuli peqatigitillugu tikkuaraat inaarutaasumik qanoq iluseqartinneqarnissaat apeqqutaalluni suliniutit aalajangersimasut arlallit aallarnisarnerannut atatillugu aningaasanik tigoriaannarnik ajornartorsiuteqalersinnaanermut peqataaqataasinnaammaata. Pingaarnerpaarli tassaasoq akitsuutinut tunngatillugu ersarissumik naalakkersuinikkut anguniagaqarnissaq, taamaaliornikkut nunatsinni aningaasaliinissaq nalorninartutut ingerlatseqatigiiffinnit misinnaqqunagu.
- Arlalinnit erseqqissarnerqartoq aatsitassat soqutiginaatillit arlallit nunarsuarmi niuerfinni akingat maanna qaffasinnerpaaffimminniittut aammalu akit appariartulernissaat aarleqqutigineqarsinnaasoq. Allatut oqaatigalugu ullumikkut suliniutigilersaagaq ataaseq arlallilluunniit piaartumik aallartinneqarnissaat pingaaruteqartoq, taamaaliornikkut aamma takutinneqarsinnaaqqullugu Kalaallit Nunaat aatsitassarsiornermut aningaasaliisartunut suleqatigissallugu tatiginartuusoq.
Suliassaqarfiup tamatuma nunatsinni naalakkersuinikkut assut pingaaruteqartup ineriartortinneqarneranik siunissami sulinermi Inatsisartut ataatsimiititaliaasa Naalakkersuisunit akuutinneqarnissaat ataatsimiititalianit assut pingaartinneqarpoq, tamatumani aamma eqqarsaatigineqarlutik aatsitassat pillugit periusissaq, akileraarusersuineq, akileraartarnermik nakkutilliineq il.il.
Kiisalu isumasioqatigiinneq malitseqartillugu itisiliisoqarnissaa siunertaralugu ataatsimiititaliat Naalakkersuisunut arlalinnik apeqquteqalersaarput aammalu qaammatip naalernerani Danmarkiliassallutik Folketingimi ataatsimiititalianik assigiinngitsunik, Nationalbankenimik aammalu ingerlatsivinnik suliffeqarfinnillu aatsitassarsiornermik ingerlatsisunik arlalinnik naapeqateqariartorlutik.
Ukununnga saaffiginninnikkut paasissutissat amerlanerusut pissarsiarineqarsinnaapput:
Kim Kielsen
Aatsitassanut Ataatsimiititaliap siulittaasua
Mobil: (+299) 54 86 92
Finn Karlsen
Aningaasaqarnermut Akileraartarnermullu Ataatsimiititaliap siulittaasua
Mobil: (+299) 54 71 52
