2024 2023 2022 Flere år...
15-05-2013
Tusagassiorfinnut nalunaarut - Nunanut allanut Sillimaniarnermullu Ataatsimiititaliaq
Nunanut allanut Naalakkersuisoq ulloq 14. maj "Issittumi Siunnersuisoqatigiinni sulineq Naalakkersuisut unitsikkallaraat" tusagassiorfinnut nalunaaruteqarpoq. Tusagassiorfinnut nalunaarummi ilisimatitsissutigineqarpoq aalajangerneq Nunanut allanut Sillimaniarnermullu Ataatsimiititaliami oqaluuserineqarsimasoq.
Paatsoortoqaqqunga ataatsimiititaliap matumuuna taamatut paasissutissiineq erseqqissarlugulu ilassuteqarfigerusuppaa:
Nunanut allanut Naalakkersuisoq ukioq manna ulloq 5. maj Nunanut allanut Sillimaniarnermullu Ataatsimiititaliami ilisimateqatigiiffiusumik ataatsimiinnermi Kirunami Issittumi Siunnersuisoqatigiit ataatsimiinnissaannut peqataatitaqarniaratik nalunaaruteqarnissaminnut isumaliuteqarnerminnik tamatumunngalu tunuliaqutaasunik nassuiaateqarpoq.
Ataatsimiititaliap paasissutissiissutit tusaatissatut tiguai, peqatigitillugu oqaatigalugu kissaatigalugu isumaqatigiinniarnerit tamanut naammaginartumik inerneqarnissaat. Taamaalilluni ataatsimiititaliap paasinninnera unaavoq ataatsimiititaliaq taamaallaat ilisimatinneqartoq, ataatsimiititaliarlu qinnuigineqarsimanngitsoq peqataatitaqarniannginnermik aalajangersinnaanermut tapersiinissaanik. Taamaalilluni matumani aalajangerneq Naalakkersuisut ataatsimiititaliallu peqatigiillutik aalajangernerinngilaat, ataatsimiititaliarli pissusissaatut ilisimatinneqaannarsimalluni isumaliutillu oqaaseqarfiginissaanut periarfissinneqarsimalluni.
Tamatuma saniatigut Nunanut allanut Sillimaniarnermullu Ataatsimiititaliaq aalajangernerup tamanut nalunaarutigineqarnissaa sioqqullugu ilisimatinneqarpoq.
Paasissutissat sukumiinerusut Nunanut allanut Sillimaniarnermullu Ataatsimiititaliap siulittaasua Per Berthelsen, oqarasuaat 55 33 61, attaveqarfigalugu pissarsiarineqarsinnaapput.
Nunanut allanut Sillimaniarnermullu Ataatsimmiititaliaq tallimanik ilaasortaqarpoq, siulittaasoq Per Berthelsen (Siumut), siulittaasup tullia Anders Olsen (Siumut), Kim Kielsen (Siumut), Kuupik Vandersee Kleist (Inuit Ataqatigiit) aamma Sara Olsvig (Inuit Ataqatigiit).