2024 2023 2022 Flere år...
12-06-2013
2014-imi Naalagaaffiit Peqatigiit nunat inoqqaavi pillugit ataatsimeersuartitsinissaan-nut piareersaataasumik nunat inoqqaavisa ataatsimeersuarnerat Alta 2013
2014-imi Naalagaaffiit Peqatigiit nunat inoqqaavi pillugit ataatsimeersuartitsinissaannut piareersaataasumik nunat inoqqaavisa ataatsimeersuarnerat Alta 2013
2014-imi Naalagaaffiit Peqatigiit nunarsuarmioqatigiinnik nunat
inoqqaavi pillugit ataatsimeersuartitsinissaannut nunarsuaq
tamakkerlugu nunat inoqqaavisa piareersaataasumik
ataatsimeersuarnerannut ulluni 10. - 12. juni ingerlanneqartumut
Inatsisartut Nunanut allanut Sillimaniarnermullu
Ataatsimiititaliap sinniisai Per Berthelsen, Kim Kielsen aamma
Sara Olsvig peqataapput.
Ataatsimeersuarneq, Alta 2013, Finnmarkimi illoqarfiit anginersaanni Altami ingerlanneqarpoq nunarsuarlu tamakkerlugu nunat inoqqaavisa katersuuffigalugu. Ataatsimeersuarnerup takutippaa nunat tamalaat akornanni suliniarneq sivisusinnaasoq, taamatullu aamma isummanik allanngortitsiniaraanni angusaqarniaraannilu tamanna ingerlaavartumik ataqatigiissumillu suliniuteqarnissaq pisariaqartoq.
Alta 2013-ip siunertaraa septembarimi 2014-imi Naalagaaffiit
Peqatigiit 68-issaannik ataatsimeersuarnissaanni, nunallu inoqqaavi
pillugit nunarsuarmioqatigiit ataatsimeersuarnera
ingerlanneqarfissaani, nunat inoqqaavisa annertunerpaamik
sunniuteqarnissaata
qularnaarneqarnissaa. Altami minnerunngitsumik
anguniarneqarsimavoq ataatsimut nalunaarummik - Altamit Nalunaarut
- isumaqatigiissuteqarnissaq, naalagaaffinnut Naalagaaffinnut
Peqatigiinnut ilaasortaasunut nunat inoqqaavisa pingaarnertut
kaammattuutaannik toqqartuisumik.
Nunat inoqqaavisa pisinnaatitaaffii siuarsarniarlugit suliniarneq Alta 2013-mi uninnavianngilaq. 2014-mi nunarsuarmioqatigiit ataatsimeersuarnissaat tikillugu sunniiniarluni suliniarnerit isumaqatigiinniarnerillu, nunani ataasiakkaani nunallu tamalaat akornanni, ingerlaqqissapput, soorlu aamma ataatsimeersuarnissamik aaqqissuussineq piareersaanerlu ingerlaqqissasut - nunat inoqqaavisa pisinnaatitaaffiisa sulissutigineqarnissaat Altamillu Nalunaarutip saqqumilaartinneqarnissaa anguniarlugu.
Nunanut allanut Sillimaniarnermullu Ataatsimiititaliaq 2014-imi
Naalagaaffiit Peqatigiit nunarsuarmioqatigiinnik nunat inoqqaavi
pillugit ataatsimeersuartitsinissaannut qilanaarput,
takorusunnerusimagaluarluguli nunarsuarmioqatigiit
ataatsimeersuarnerat immikkut nunarsuarmioqatigiit
ataatsimeersuarnerattut aaqqissuunneqarsimasuuppat, Naalagaaffiit
Peqatigiit nalinginnaasumik 68-issaanik ataatsimeersuarneranut
ilagitiinnarnagu.
Nunat inoqqaavisa pisinnaatitaaffii soqutigisaallu siuarlugit nunat tamalaat akornanni suliniarneq ingerlaavartuuvoq, maannamut pitsaasunik erseqqissunillu angusaqarfiusimasoq, ass. Nunat inoqqaavisa pisinnaatitaaffii pillugit Naalagaaffiit Peqatigiit Nalunaarutaata akuersissutigineqarneratigut, Nunat inoqqaavi pillugit Naalagaaffiit Peqatigiit immikkut nalunaaruteqartartoqalerneratigut, Nunat inoqqaavisa pisinnaatitaaffii pillugit Naalagaaffiit Peqatigiit immikkut ilisimasalinnik suleqatigiissitaqalerneratigut minnerunngitsumillu Apeqqutit nunat inoqqaavinut tunngasut pillugit Naalagaaffiit Peqatigiit aalajangersimasumik oqallittarfeqalerneratigut. Kalaallit Nunaat ukiorpassuarni nunat inoqqaavisa pisinnaatitaaffii siuarsarniarlugit suliniarnermi nunallu inoqqaavi pillugit Naalagaaffinni Peqatigiinni suliniutit assigiinngitsut pilersinneqarnerinut timitalimmik peqataasimavoq.
Ataatsimiititaliap pingaartippaa aaqqissuussinerni nunanit tamalaanit peqataaffigineqartuni, ass. Alta 2013-imi 2014-imilu Naalagaaffiit Peqatigiit nunat inoqqaavi pillugit nunarsuarmioqatigiinnik ataatsimeersuartitsinissaannut, Kalaallit Nunaata sinniisuutitaqartarnissaa, tamannalu tunngavigalugu Naalakkersuisut kaammattorlugit Altamit Nalunaarut ilaleqqullugu, kiisalu nunarsuarmioqatigiit ataatsimeersuarnissaannut piareersaarnernut naalakkersuinikkut peqataallutillu aningaasatigut tapersersueqqullugit.
Per Berthelsen
Nunanut allanut Sillimaniarnermullu Ataatsimiititaliap siulittaasua
Paasissutissat sukumiinerusut Nunanut allanut
Sillimaniarnermullu Ataatsimiititaliamit ataatsimeersuarnermut
peqataasut attaveqarfigalugit
pissarsiarineqarsinnaapput:
Per Bertehelsen +299 553361, Kim Kielsen +299 548692 og Sara Olsvig, +45 33375404
