Nutaarsiassat

14-06-2013

Nunat Avannarliit Killiit Siunnersuisoqatigiiffianni siulittaasoq Svalbardimi Longyearbyenimut ataatsimiigiarpoq

Nunat Avannarliit Killiit Siunnersuisoqatigiiffianni siulittaasoq Svalbardimi Longyearbyenimut ataatsimiigiarpoq

Nunat Avannarliit Killiit Siunnersuisoqatigiivisa siulittaasoqarfiani siulittaasoq Lars Emil Johansen juunip pingajuanit tallimaanut Issittumi Siunnersuisoqatigiit kingullermik ataatsimiinnerannut atatillugu issittumi inatsisartut (SCPAR) ataatsimiinneranni peqataavoq.   

SCPAR tassaavoq The Standing Committee of Parliamentarians of the Arctic Region (Issittumi Inatsisartunut Ataavartumik Committee), nunallu issittumiittut arfineq pingasut inatsisartui aamma EU-miut inatsisartui tassani sinniisuutitaqarput. Kalaallit Nunaanni Inatsisartut SCPAR-imi
aalajangersimasumik ilaasortaatitaqaratillu ilaasortaanngillat. Kalaallit Nunaat nunat avannarliit killerni suleqatigiit sinnerlugit peqataagaangat Nunat
Avannarliit Killiit Siunnersuisoqatigiivisa siulittaasoqarfiat aqqutigalugu Inatsisartut ukioq allortarlugu taamaallaat sinniisuutitaqartarpoq. Nunat
Avannarliit Killiit Siunnersuisoqatigiivi taassuma saniatigut SCPAR-imi taamaallaat ataatsimik sinniisuutitaqarpoq.

Svalbardimi ataatsimiinnermi Kirunami Issittumi Siunnersuisoqatigiit ataatsimiinneranni nalunaarut kingullerpaaq SCPAR-ip eqqartorpaa.

Issittumi Siunnersuisoqatigiinni Canadap siulittaasuunerata nalaani Issittumi Siunnersuisoqatigiinni EU-p alaatsinaatsutut ilaasarnissamut qinnuteqaataa aaqqiivigineqarumaassasoq SCPAR-imi peqataasut neriuutigaat, taamatuttaaq Kalaallit Nunaata Issittumi Siunnersuisoqatigiinnut peqataannginnissamik nalunaaruteqarnerata kingunerisaanik Issittumi Siunnersuisoqatigiit siunissami aamma peqataatitsisartussaasut ajattuisuussaanngitsullu SCPAR-imi ataatsimiittut nalunaaruteqarput.

SCPAR-ip tulliani ataatsimiinnissaanut sammisaq "Economic development and capacity building in the North" ("Avannaani aningaasatigut ineriartortitsineq aamma piginnaanngorsaaneq") suliniuteqarfigineqassasoq SCPAR-imi ataatsimiittut akuersissutigaat. Taamatut suliniuteqarnermi sammisassat uku pillugit nalunaarusiamut paasissutissiisoqassasoq misissueqqissaartoqassasorlu ataatsimeeqataasut kissaatigaat: sanaartornermi piujuartitsinermut tunngavigisat, issittumi inuuniarnikkut akissaajaatit qaffakkaluttuinnartut, suiaassutsimut tunngasut aamma najukkami innuttaasunik peqataalersitsineq kiisalu Corporate Social Responsibility (CSR) - Suliffeqarfiit Inooqatigiinnermut Akisussaaffii.    

Taamatuttaaq silap allanngornera Issittumi Siunnersuisoqatigiinnit suli salliutinneqarluinnarluni pingaartinneqassasoq SCPAR-imi peqataasut ataatsimiinnerminni erseqqissaatigaat. Silap allanngornera issittumi nunat aningaasarsiornikkut unammiligassaannut sanilliullugu siulliullugu aaqqiiviginiarneqassanersoq Issittumi Siunnersuisoqatigiit ukiuni tulliuttuni unammilligassarissavaat, kiisalu unammilligassat taakku akornanni qanoq tulleriiaarisoqarsinnaanersoq sulissutigineqassalluni. Taamaattumik 2014-imi White Horse-mi tulliani ataatsimeersuarnissami taaneqartumi "Conference of the Parliamentarians of the Arctic Region" (CPAR) - "Issittumi Inatsisartut Ataatsimeersuarnerat"-ni nalunaarusiassami saqqummiunneqartussatut naatsorsuutigineqartumi pissutsit taakku qiutiutinneqassapput.

Kiisalu Folketingimi ilaasortaq Sara Olsvig issittumi inatsisartut suleqatigiinneranni Danmarkimut/Naalagaaffeqatigiinnut sinniisuusoq SCPAR-imi siulittaasutut nutaatut toqqagaavoq, septembarimilu SCPAR-ip Murmanskimi piffissami 18. - 20. september ataatsimiinnissaani siulittaasutut ivertinneqassalluni.

Kirunami Issittumi Siunnersuisoqatigiit ataatsimiinneranni Kalaallit Nunaata peqataannginneranut pissutaasoq annertunerusumik tusagaqarfigissallugu russit inatsisartuinit peqataasoq immikkut soqutiginnilluinnarpoq. Inatsisartunut Siulittaasup pissutsit tassunga tunuliaqutaasut ilisimatitsissutigai,
taamatuttaaq Kalaallit Nunaata pisortatigoortumik tassunga isumaa pillugu saqqummiussilluni:

"Naalagaaffeqatigiinnit naqissuserneqarpoq Issittumi Siunnersuisoqatigiinni sulinermi Issittumi inuit sallerpaatinneqarnissaat isumaqatigiissutigineqarpat, tamanna pissusiviusutigut ima aamma paasineqassasoq, Danmarkimit, Kalaallit Nunaannit aamma Savalimmiunit
sinniisuutitat naligiimmik peqataasinnaasariaqartut, soorlu tamanna taamaassimasoq svenskit siulittaasuutitaqarnerisa tungaanut. Naalagaaffimmi ilaasut pingasut erseqqissarpaat, Kalaallit Nunaat aamma Savalimmiut issittup 20 %-ianik nunataqarlutillu imartaqartut Issittumi Siunnersuisoqatigiinni pissutsini tamani isumaqatigiinniarnernut toqqaannartumik peqataasinnerat akuerineqarsinnaajunaarmat naammaginanngitsuusoq. Naalagaaffeqatigiit neriupput, Canadap siulittaasuutitaata tamanna ilumoorullugu sulissutigissagaa, aamma ajornartorsiummut tassunga peqatigiilluta aaqqiissutissamik naammaginartumik nassaarsinnaassasugut.    

Nunat Avannaarliit Killiit Siunnersuisoqatigiivisa Siulittaasoqarfiata Issittumi Siunnersuisoqatigiinni suleqatigiinnerup pingaaruteqassusia erseqqissaatigaa, taamatullu suleqatigiinnerup pingaaruteqassusianut aamma ujaasisarnermi annaassiniartarnermilu upalungaarsimanissamut pingaaruteqartumik suleqatigiinnissamut isumaqatigiissut aamma nutaanerpaatut uuliaarluerneq pillugu isumaqatigiissut ersersitsisuusut, taamatuttaarlu aalajangiiniarnermi issittumi nunat innuttaasa peqataatinneqartarnissaat pingaartinneqarluni. 

SCPAR pillugu paasisaqarnerorusunnermi una nittartagaq alakkarneqarsinnaavoq: http://www.arcticparl.org/committee.aspx, taamatuttaaq Nunat Avannarliit Killiit Siunnersuisoqatigiivisa SCPAR-imik suleqateqarnera pillugu paasissutissat amerlanerusut uani nassaarineqarsinnaapput: www.vestnordisk.is

Lars-Emil Johansen

 Inatsisartut Siulittaasuat

Paasisaqarnerorusunnermi Inatsisartut Siulittaasuat Lars-Emil Johansen oqarasuaammut angallattakkamut uunga sianerluni attavigineqarsinnaavoq: +299 55 19 15.