2024 2023 2022 Flere år...
20-07-2013
Naalakkersuisut siulittaasuat Aleqa Hammond Uummannami kuultiusumik Nersornaaserneqarpoq.
Naalakkersuisut siulittaasuat Aleqa Hammond Uummannami kuultiusumik Nersornaaserneqarpoq.
Inatsisartut Siulittaasuata Lars-Emil Johansenip Uummannap ulloq 20. juli 2013 illoqarfittut ukiunik 250-inngortorsiorluni nalliuttorsiornerani peqataanerminut atatillugu Naalakkersuisut Siulittaasuat Aleqa Hammond (1965) Uummannami nalliuttorsiualaarnermi kuultiusumik Nersornaaserpaa.
Inatsisartut Siulittaasoqarfiata Naalakkersuisut Siulittaasuat
Aleqa Hammond kuultiusumik Nersornaaserpaa maanna Naalakkersuisunut
siulittaasuunera aammalu piffissami sivisuumi annertuumillu
nersortarialimmik Kalaallit Nunaannik sullissisimanera
tunngavilersuutigalugu.
Siulittaasup Aleqa Hammondimut oqaaseqarnermini ilaatigut makku
erseqqissarpai:
"Arnaavutit inuusuttoq piukkunnarseruttortoq, inuusukkaluarlutilli assigiinngitsorpassuarnik annertoorujussuarmik angusaqareerputit. Ilimmarfiup pilersinniarnerani aningaasanik katersiniartuuvutit, takornarianik angallassisartutut nuannarineqartuullutit, ICC sullissimallugu tamakkulu ingerlannerini Kalaallit Nunaanni nunanilu allani najugaqarneq misilissimallugu.
2005-imi Inatsisartunut qinigaaqqaarputit Ilaqutariinnermut Inatsisinillu Atortitsinermut Naalakkersuisunngorlutit 2007-imilu Aningaasaqarnermut Nunanullu allanut Naalakkersuisunngorlutit. Aamma partii Siumumi siulittaasuni arnanit siullersaavutit, soorluttaaq oqaatigineqariaqartoq partii Siumumi 2009-imi siulittaasunngortutit.
Kalaallit Nunaat namminersortoq pillugu kissaativit piviusunngortinnissaanut tunniusimallutit suliaqarnerit ilisimavarput aammalu qamannga pimoorussillutit pissutsinik allannguerusupputit. Suliassaq tamanna pingaartippat assigiinngissutsit naligiinnerulerseqqinniarlugit aammalu Kalaallit Nunaanni innuttaasut sullinneqarnerata tunngaviusumik qaffasissuseqarnissaa qulakkeerniarlugu. Inuuvutit ammasuullutit ilakkuminartorujussuaq inuunermillu nuannarinnittoq, nuannaartuunerillu pissutigalugu innuttaasut nalinginnaasut pilertortumik attaveqarfigisarlugit. Taamaattumillu pisunut malinnaalluartuuvutit aammalu innuttaasut ataasiakkaat nunap immikkoortuini najukkaminni pissutsit unammilligassaat paasisinnaallugit.
Iggarissuuvutit aammalu ilaquttavit ilaginissaat nuannarisuullugu."
Lars-Emil Johansen
Inatsisartut Siulittaasuat
Annertunerusumik paasisaqarusukkaanni Inatsisartut Siulittaasuat Lars-Emil Johansen mobil +299 55 19 15 saaffigineqarsinnaavoq.
Assit: Else Olsvig