Nutaarsiassat

29-07-2013

Ane Hansen aamma Augo Davidsen Aasianni sølviusumik Nersornaaserneqarput

Inatsisartut Siulittaasuata tulliata siulliup Agathe Fontainip Aasiaat ulloq 28. juli 2013 illoqarfittut ukiunik 250-inngortorsiorlutik nalliuttorsiorneranni peqataanerminut atatillugu Ane Hansen aammalu Augo Davidsen Aasianni nalliuttorsiualaarnermi sølviusumik Nersornaaserpai.

Nersornaat sølviusoq Ane Hansenimut (1961)

Inatsisartut Siulittaasoqarfiata Ane Hansen sølviusumik Nersornaaserpaa piffissami sivisuumi annertuumillu piffissami 1997-imiit 2001-imut Aasianni
borgmesteritut kingullermillu piffissami 2009-miit 2013-imut Aalisarnermut, Piniarnermut Nunalerinermullu naalakkersuisutut ukiorpassuarnilu Inatsisartunut ilaasortatut nersortarialimmik suliaqarsimanera tunngavilersuutigalugu.

Inatsisartut Siulittaasuata tulliata siulliup Ane Hansenimut oqaaseqarnermini ilaatigut makku erseqqissarpai:

"2002-mi Inatsisartunut qinigaaqqaarputit mannalu tikillugu suli ilaasortaallutit. Taamatuttaaq piffissami sivisuumi Aasianni kommunalbestyrelsimut ilaasortaasimavutit, soorlu aamma maanna kommunit kattunnerisa kingorna Qaasuitsup kommuniani kommunalbestyrelsimut ilaasortaalersimasutit. 1989-imi Aasianni kommunalbestyrelsimut qinigaaqqaarputit. Borgmesteriusimanerpit saniatigut aamma qinigaaffinni arlalinni borgmesterip tulliatut siullertut aappaatullu inissisimasarsimavutit. 1999-imi Inuit Ataqatigiit siulersuisuunerinut ilaasortatut malunnaatilittut Namminersorneq pillugu isumalioqatigiissitamut siullermut, 2003-imi marsimi isumaliutissiissuteqarnikkut suliaminik naammassinnittumut, ilaasortatut toqqarneqarputit.

Aasiaani borgmesteriuninnit taamatuttaaq eqqaamavatsigit ersarissunik qarsarissunillu oqaaseqartarnikkut, minnerunngitsumik illoqarfimmut maanga suliffissat qularnaarniarneqarnerat eqqarsaatigalugu.

Taamatut aamma qularnanngitsigaaq inuttut malunnaatilittut inuiaqatigiinnilu oqallinnermut peqataanikkut nunatta ilaa manna saqqummilaarnerulersissimagakku. Naalakkersuinikkut suliaqarninni illoqarfiup ineriartornissamut periarfissaasa ineriartortittuarnissaat qasujuillutit sulissutigisimavat, qularnanngitsumillu maanna kommunerujussuanngorsimasumi sulissutigeqqissallugu."

Nersornaat sølviusoq Augo Davidsenimut (1926)

Inatsisartut Siulittaasoqarfiata Augo Davidsen sølviusumik Nersornaaserpaa piffissami sivisuumi annertuumillu aalisartorsuartut ataqqineqarluni
nersortarialimmik suliaqarsimanera aammalu nunatsinni silap pissusaatigut unammilligassat pillugit annertuumik ilisimasaqarnera tunngavilersuutigalugu.

Inatsisartut Siulittaasuata tulliata siulliup Augo Davidsenimut oqaaseqarnermini ilaatigut makku erseqqissarpai:

"Aasianni piniartutut peroriartorputit aammalu eqeersimaarnerpaat ilagalutit. Saarulliit takkummata aalisartunngorputit inuusuttuullutillu Aasianni amerlanngitsut ilaattut angisuumik angallateqalereerlutik. Tunumi paasisassarsiorluni angalanermi ukioq ataaseq sinnerlugu  qimussertutut peqataanerpit kingorna angallatisinissannut aningaasanik katersivutit. Qeqertarsuup Tunuani arsaalluni assammillu arsarluni pokalinnanniulluni unammisoqartarnerani timersortartut amerlassuut angallatit atorlugu Aasiannit angallattarpatit.

Aamma Tunumi misilittakkatit atorfilittat danskit niuertoqarfiup Aasiaat eqqaani nunaqarfippassuarnut ungasinnerumullu soorlu Sisimiut angullugu
ukiukkut angalanerini qimussimik angallassisarnerni atorluartarpatit. Aasianni piffissami nutaaliortoqarnerani tamarmi peqataavutit. Kingusinnerusukkut illoqarfimmi namminersortutut suliffiuteqalerputit.

Pinngortitamik silallu pissusaanik ilisimasatit annertuut ilisimatusarnermik suliaqartunit tunngavigineqartarput, ilaatigut silap pissusiisa allanngornera pillugu suliniummut Sila Inuk atatillugu nalinginnaasumillu ilisimasani."

Inussiarnersumik inuulluaqqusillunga 

Agathe Fontain

 Inatsisartut Siulittaasuata tullia siulleq

Annertunerusumik paasisaqarusukkaanni Inatsisartut  Siulittaasuata tullia siulleq Agathe Fontain oqa: +299 48 45 31 saaffigineqarsinnaavoq.

Assit: Else Olsvig