Nutaarsiassat

13-08-2013

Nunat Avannarliit Killiit Siunnersuisoqatigiiffiat ulluni 17. - 22. august Narsarsuarmi ukiumoortumik ataatsimiissaaq

Inatsisartut Siulittaasuattut Nunallu Avannarliit Killiit Siunnersuisoqatigiiffianni siulittaasutut qaaqqusisoralunga Nunat Avannarliit Killiit Siunnersuisoqatigiiffiat sapaatit akunnerini 33-mi 34-milu Narsarsuarmi ukiumoortumik ataatsimiissaaq. Ukiumoortumik ataatsimiinnissamut ilagissavakka siunnersuisoqatigiiffimmut nunatta aallartitai ukuusut: Finn Karlsen, Anders Olsen, Karl Kristian Kruse, Kalistat Lund Ane Hansenilu.

Nunat Avannarliit Killiit Siunnersuisoqatigiiffiata ukiumoortumik ataatsimiinnera piffissami arfininngornermit aggustip ulluisa 17-iannit 20-iannut 2013 ingerlanneqassaaq, kiisalu aggustip ulluisa 21-ianni norskit inatsisartui Stortingi Folketingilu suleqatigalugit Nunat Avannarliit Siunnersuisoqatigiiffiat peqatigalugu ataatsimut ataatsimeersuartitsisoqassalluni.

Siunnersuisoqatigiiffimmut nunatsinnit aallartitat saniatigut Islandip inatsisartuinit Althing-imit Nunat Avannarliit Killiit Siunnersuisoqatigiiffiannut nutaamik qinikkat kiisalu Savalimmiut inatsisartuinit Lagtingimit ilaasortat tallimat peqataassapput. Tamatuma saniatigut nunatsinni naalakkersuisunit Naalakkersuisoq Nick Nielsen qaaqquneqarsimavoq, nunanillu avannarlernit allanit Nunat Avannarliit Siunnersuisoqatigiiffiata Norgemilu inatsisartut Stortingip sinniisaanik Narsarsuarmut peqataasoqassalluni.

Nunat Avannarliit Killiit Siunnersuisoqatigiiffiata ukiumoortumik ataatsimiinnermini Siunnersuisoqatigiiffiup kaammattuutit aalajangersagassaatut siunnersuutit oqallisigissavaat. Siunnersuisoqatigiinnut ilaasortat taamatuttaaq Siunnersuisoqatigiiffiup kaammattuutitut aalajangersagarisimasaa malitseqartinneqarnerat pillugu suleqatigiinnissamut ministerit nalunaarutaat isummerfigissavaat. Nunat Avannarliit Killiit Siunnersuisoqatigiiffiata Issittumi Siunnersuisoqatigiinnut alaatsinaatsutut inissisimalernissaanik qinnuteqarsinnaanera taamatuttaaq siunnersuisoqatigiiffiup oqallisigissavaa.

Taamatuttaaq nunani avannarlerni killerni peqqinnissakkut ingerlatsinerit assigiinngitsut pillugit Nunat Avannarliit Killiit Siunnersuisoqatigiiffiata ukioq manna januaarimi Islandimi ataatsimeersuartitsineranit angusat nalilersorneqassapput. Tamatumunnga nangissutitut siunnersuisoqatigiiffimmut aallartitat aappaagu aalajangersimasumik qulequtaqartitsilluni ataatsimeersuartitsinissamut Savalimmiuni ingerlanneqartussamut sammineqarsinnaasut oqallisigissavaat. Tamatuma saniatigut Naalakkersuisunut ilaasortaq Nick Nielsen Nunat Avannarliit Siunnersuisoqatigiiffiannit Norges inatsisartuinit Stortingimit tikeraartit peqatigalugit qaaqqusatut saqqummiussaqarumaarput.

Nunat Avannarliit Killiit Siunnersuisoqatigiiffiannut siulittaasuutitaqarneq nunat avannarliit killiit siunnersuisoqatigiiffiata pilersinneqarneramik isumaqatigiissut malillugu ukiumoortumik ataatsimiinnermi Islandip tigusussaavaa, taamaalillunilu Islandimit aallartitat siulittaasuat ukiumi siunnersuisoqatigiiffiup suliffissaani tullermi siulittaasuutitaqassalluni. Islandimit aallartitat siulittaasorivaat Unnur Brá Konráðsdóttir, namminersulivinniat partiiannut ilaasortaq Islandimilu qanittukkut inatsisartunut qinersisoqarnerani nutaamik qinigaasoq.

Pisuussutit uumassusillit iluaqutiginiarneqarnerat pillugu Nunat Avannarliit Siunnersuisoqatigiiffiat peqatigalugu ataatsimut ataatsimeersuarneq

Nunat Avannarliit Killiit Siunnersuisoqatigiiffiata ukiumoortumik ataatsimiinneranut nangissutitut Nunat Avannarliit Siunnersuisoqatigiiffiat peqatigalugu ataatsimut ataatsimeersuartitsisoqassaaq qulequtaralugu "Atlantikup Avannaani pisuussutit uumassusillit - ataatsimut aalisarneqartartut ilanngullugit - iluaqutiginiarneqarnerata ataatsimut paaseqatigiissutigineqarnissaa".

Pisuussutinik iluaquteqarniarnermik aqutsineq pillugu ataatsimeersuarmut atatillugu nunatsinnit Naalakkersuisunut ilaasortaq Karl Lyberth kiisalu Nunat Avannarliit Siunnersuisoqatigiiffiannut EU-llu inatsisartuinut ilaasortat, taamatullu aamma ataatsimeersuarnermut saqqummiussisussatut immikkut ilisimasallit assigiinngitsut peqataassapput.

Nuummi Nunat Avannarliit Killiit kulturikkut ulloqartinneqarnerat

Nunat avannarliit killiit suleqatigiinnerat taamatuttaaq malunnartinniarneqassaaq Nunat Avannarliit Killiit kulturikkut ulloqartinneqarneratigut. Ulloq taanna pilersinneqarsimavoq nunat avannarliit killiit siunnersuisoqatigiiffiata ukiumoortumik ataatsimiinnerata nanginneratut ingerlanneqartartussatut, ukiormannali ulluni 13. aamma 14. september Nuummi kultorip illorsuani Katuami pisussatut pilersaarutigineqarluni. Aaqqissuussinissaq taanna pillugu paasissutissat sukumiinerusut Katuap nittartagaani uani http://www.katuaq.gl/kl/pisussat/Pisussat-allat/Nunat-Avannarliit-Killiit-Ullui-2013 takuneqarsinnaapput.

http://www.katuaq.gl/kl/pisussat/Pisussat-allat/Nunat-Avannarliit-Killiit-Ullui-2013 

Lars-Emil Johansen

Inatsisartut Siulittaasuat

Paasissutissat sukumiinerusut Inatsisartut Siulittaasuat Lars-Emil Johansen oqarasuaat 55 19 15 attaveqarfigalugu pissarsiarineqarsinnaapput.