2024 2023 2022 Flere år...
16-08-2013
2013-imi ukiaanerani ataatsimiinnissamut ullormut oqaluuserisassat naammassipput
2013-imi ukiaanerani ataatsimiinnissamut (UKA13) oqaluuserisassat ullumikkut nassiunneqarput. Tamanna pivoq ullup nalunaarfissap tallimanngorneq ulloq 9. august 2013 ullut arfineq marluk qaangiunnerisigut.
Inatsisartuni ukiaanerani ataatsimiinneq tallimanngornermi ulloq 13. september 2013-imi nal. 11.00 aallartittussatut pilersaarutigineqarpoq ullorlu 15. november 2013-imi naammassineqartussatut pilersaarutigineqarluni.
Katillugit ullut ataatsimiiffiusussat 26-iunissaat pilersaarutaavoq. Ullut ataatsimiiffiit ingerlaavartuussapput tassa immikkoortut ullormi suliarineqarsinnaanngitsut ullormi tullermi ataatsimiinnissami suliarineqartassallutik.
Inatsisartunut ilaasortat oqaluuseritikkumasaat 54-t Naalakkersuisullu oqaluuseritikkumassat 31-t oqaluuserineqassapput. Qinigaaffimmi matumani nalinginnaasumik ataatsimiinnissaq siulliummat siusinnerusukkut ataatsimiinnernit kinguartinneqarsimasunik oqaluuserineqartussanik soqanngilaq.
Sapaatit akunnerini ullut ataatsimiiffissat agguataanneri imaapput:
Sapaatit akunnerini 38-43 aamma 45 sapaatip akunneranut ataatsimiiffiusussat ullut pingasuusassapput nal. Ataatsinut aallartittassallutik (marlunngorneq, pingasunngorneq sisamanngornerlu).
Tamatuma saniatigut pingasunngornerit tamaasa nalunaaquttap akunnera ataaseq nal. 11.00-imiit nal. 12.00-imut apeqquteqarfiusassaaq, tamatuma kingorna unillatsiartoqartassaaq nal. 13.00-imiit ataatsimiinneq nanginneqartassalluni.
Sapaatip akunnera 44 inersuarmi ataatsimiittoqassanngilaq Nunat Avannarliit Siunnersuisoqatigiivini ataatsimiinnissaq pissutigalugu. Taamaattoq sapaatip akunnerani pineqartumi ataatsimiititaliat sulinerat allannguuteqaratik ingerlaannassapput.
Sapaatip akunnerani 46-mi ullut ataatsimiiffissat sisamaassapput nal. 13.00-imiit aallartittumik (marlunngorneq, pingasunngorneq, sisamanngorneq tallimanngornerlu).
UKA2013-imut atatillugu atortussat tamarmik Inatsisartut nittartagaanni inatsisartut.gl-imi takuneqarsinnaapput. Atortussat qarasaasiakkut ingerlaavartumik pisartagarineqarsinnaapput. Tamanna kissaatigigaanni Laila Kristiansen lkri@inatsisartut.gl attaveqarfigineqarsinnaavoq.
Lars-Emil Johansen
Inatsisartut Siulittaasuat
Paasissutissat annertunerusut Inatsisartut Siulittaasuat Lars-Emil Johansenimut angallattagaq +299 55 19 15 attaveqarfigalugu pissarsiarineqarsinnaapput.