2024 2023 2022 Flere år...
21-08-2013
Inatsisartut suleriaasiat pillugu oqallinneq Siulittaasoqarfimmi aallartittariaqarpoq
Partii Inuit siulittaasuat, Nikku Olsen, ulloq 20. august 2013 tusagassiorfinnut nalunaaruteqarpoq. KNR-ip imaqarniliaa naapertorlugu partiip siulittaasua ilaatigut ima oqarpoq ".Inatsisartut suleriaasiat nalilersoqqinneqartariaqarpoq, tassami inatsisartut ullumikkut kipparilluinnaqqissaartumik sulisussaatitaasut takuneqarsinnaavoq."
Inatsisartut Siulittaasuattut erseqqissaatigissavara Inatsisartut suleriaasiata qanoq iluseqartinneqarnissaa aammalu qinikkat sulinerminni atugassarisaat oqaluuserissallugit sukkulluunniit ammaffigigakku.
Tamatumali peqatigisaanik erseqqissassavara taamatut oqaluuserinninnerup Inatsisartut Siulittaasoqarfiannit aallarnerneqarnissaa pissusissamisoorlunilu pisariaqarmat. Inatsisartut Suleriaasiat inuiaqatigiinni inatsisiliorluni sulinerup ilagaa pingaarutilik, taamaattumillu Suleriaatsimik allannguinerit sukumiilluinnartumik piareersaqqaarlugit isumaliutigilluaqqaarlugillu aatsaat ingerlanneqartariaqarlutik.
Inatsisartut Suleriaasianni allanngortitsinissaq pillugu Partii Inuit saaffiginnissutaanik siunnersuutaanilluunniit Siulittaasoqarfik ulloq manna tikillugu tigusaqanngilaq. Taamaattumillu Partii Inuit siulittaasuata takorluugaatut ittunik Inatsisartut Suleriaasiata allanngortinneqarsinnaanera pillugu Siulittaasoqarfik isummerfiginnissimanngilaq.
Taamaattumillu partii suleriaatsimi allannguutissanik aalajangersimasunik kissaateqarpat naggasiutigalugu Partii Inuit kaammattorusuppara suliassaq pillugu Siulittaasoqarfimmut saaffiginneqqullugu.
Lars-Emil Johansen
Inatsisartut Siulittaasuat
Paasissutissat sukumiinerusut Inatsisartut Siulittaasuat angallattagaq +299 55 19 15 attaveqarfigalugu pissarsiarineqarsinnaapput.