Nutaarsiassat

18-10-2013

Nunat Avannarliit Killiit Siunnersuisoqatigiiffiat pillugit isumasioqatigiinneq iluatsilluartoq

Inatsisartut Siulittaasuat Lars Emil Johansen qaaqqusisoralugu Nuummi Hotel Hans Egedep ataatsimeersuartitsisarfiani nutaami Nunat Avannarliit Killiit Siunnersuisoqatigiiffiata sulinera pillugu ullumi isumasioqatigiittoqarpoq.

Lars Emil Johansenip tikilluaqqusilluni oqaaseqarnermini nunat avannarliit killiit suleqatigiinnerata, Kalaallit Nunaannut, Savalimmiunut Islandimulllu assut iluaqutaasup, pingaariteqassusia erseqqissarpaa - ilaatigut Savalimmiuni Kalaallillu Nunaanni politikkikkut ineriartornermut iluaqutaanera erseqqissarlugu.

Tikilluaqqusisoqareermat Nunat Avannarliit Killiit Siunnersuisoqatigiiffiata allattaanera Thordur Thorarinsson siunnersuisoqatigiiffiup sulinera, aaqqissuussaanera sakkugisinnaasaalu pillugit peqataasunut sukumiisumik nassuiaateqarpoq.

Isumasioqatigiinnermut Inatsisartunut ilaasortat, partiini siunnersortit atorfillillu nunat avannarliit killiit suleqatigiinnerannik soqutigisallit peqataapput. Islandip Nuummi aallartitaqarfittaassaani generalkonsulinngortussaq isumasioqatigiinnermut aamma peqataavoq.

Siunnersuisoqatigiiffiup aalajangersakkatut kaammattuutigisartagai qitiutillugit saqqummiinermi apeqquteqartarnerup takutippaa nunat avannarliit killiit suleqatigiinnerat eqeersimaarfigineqarluni annertuumik soqutigineqartoq, siunissamut isumallualersitsisumik.

Siunnersuisoqatigiiffiup sulineranik soqutiginninneq annertooq tamanna Nunat Avannarliit Killiit Siunnersuisoqatigiiffiata kaammattuutitut aalajangersagaasa marluk, Inatsisartut ukiakkut ataatsimiinneranni oqaluuserineqartussat, suliarineqarneranni qularnanngitsumik aamma saqqummerumaarpoq.

Siunnersuisoqatigiiffiup allattaanerata tikeraarnera Nunat Avannarliit Siunnersuisoqatigiiffiata qanittukkut ataatsimiittarnissaanut kiisalu Nunat Avannarliit Killiit aalajangersimasumik qulequtaqartitsilluni ataatsimeersuartitsinissaanut tullermut 2014-imi januaarimi Savalimmiuni ingerlanneqartussamut piareersarnernut ilaavortaaq. Aalajangersimasumik qulequtaqartitsilluni ataatsimeersuartitsinissami Nunani avannarlerni killerni inuussutissanik imminnut pilersornitta annertusarneqarnissaanut periarfissat sammineqassapput.

Lars-Emil Johansen

Inatsisartut Siulittaasuat

NAKS pillugu:

Nunat Avannarliit Killiit Siunnersuisoqatigiiffiat Islandip, Kalaallit Nunaata Savalimmiullu akornanni inatsisartutigoortumik suleqatigiiffiuvoq 1985-imi pilersinneqartoq. Siunnersuisoqatigiiffimmut ilaasortaapput nunanit ilaasortaasunit inatsisartunut ilaasortat 18-it. Siunnersuisoqatigiiffik ukiumut marloriarluni naapittarpoq, aalajangersimasumik ataatsimeersuarnermut ukiumoortumillu ataatsimeersuarnermut. Ukiumoortumik ataatsimiinnermi ukiumi aggersumi siunnersuisoqatigiiffiup naalakkersuinikkut allaffissornikkullu suliassai aalajangersarneqartarput. Island 2014-imi tullianik ukiumoortumik ataatsimiinnissap tungaanut Siunnersuisoqatigiiffimmi siulittaasuutitaqarpoq. Ataatsimiinnerit nunani ataasiakkaani paarlakaajaalluni ingerlanneqartarput. Paasissutissat sukumiinerusut www.vestnordisk.is-imi takuneqarsinnaapput.

Paasissutissat sukumiinerusut Inatsisartut Siulittaasuat, angallattagaq 55 19 15, attaveqarfigalugu pissarsiarineqarsinnaapput.