2024 2023 2022 Flere år...
23-10-2013
Aalisarnermut, Piniarnermut Nunalerinermullu Naalakkersuisup Inatsisartut suleqatiginerusariaqarpai
Aalisarnermut, Piniarnermut Nunalerinermullu Naalakkersuisup Karl Lyberthip Inatsisartunik suleqateqarnerup annertusarnissaanut aallartittariaqarpoq.
Aalisarneq inuiaqatigiinni kalaallini tunngaviulluinnartuuvoq. Piorsarsimassutsitsinnut kinaassutsitsinnullu ataatsimoorussaraarput. Peqatigitillugulu inuussutissarsiutitta pingaarnersaraat, aningaasarsiornitsinnilu ingerlatsisuulluni, ingerlalluarnissaalu tamatta pingaartipparput.
Aalisarnermut ataatsimiititaliap arlaleriarluni siunissami aalisarneq pillugu Naalakkersuisup takorluugaanik saqqummiusseqqullugu qinnuiginikuuaa. Naammaginartumik nassuiaateqarnissaa suli utaqqivarput. Tamanna ajuusaarnarpoq, taamaallaammi aalisartunut ataasiakkaanut toqqissisimajunaartitsinngilaq, aammami Ataatsimiititaliap Naalakkersuisullu akornanni suleqatigiilluarneq innarlerpaa. Siunissami aalisarneq qanoq ineriartussanersoq aalisartup paasissallugu pisariaqartippaa. Tamatumani pineqarput pisassat agguaanneqartarnerat aamma malittarisassat nalunaarutillu allanngortarnerat.
Aalisarnermut ataatsimiititaliap Naalakkersuisoq suleqatigerusuppaa. Taamaattumik aamma pakatsinarpoq Naalakkersuisup Ataatsimiititaliamik akuutitsinerunissaq suleqateqarnerunissarlu - assersuutigalugu paasissutissanik avitseqatigiinnissaq - annerusumik iliuuseqarfiginianngimmagu.
Naalakkersuisut aalisarnermut inatsit maanna misissormassuk Aalisarnermut ataatsimiititaliap arajutsisimanngilaa. Inatsimmut allannguutit nutarterinerillu 2014-imi upernaakkut saqqummiunniarneqartut Naalakkersuisup oqaatiginikuuaa. Ataatsimiititaliaq taamatut suliaqarnermut ilapittuuteqarusuppoq. Kisiannili suliamik killiffik pillugu paasisaqarnissaq ajornakusoortuuvoq.
Aalisarnermut ataatsimiititaliap ilaatigut suliassaraa aalisarnermi ineriartorneq malinnaaffigissallugu, kiisalu Naalakkersuisut inatsisitigut killissaritaasut iluanni ingerlatsinikkulluunniit ileqqorissaarnermut tunngatillugu killigititat iluanni ingerlatsinissaat nakkutigissallugu.
Taakku tunngavigalugit Ataatsimiititaliamik suleqateqarnerup annertusarnissaanik, tamatumanittaaq suliani aalisarnermut, piniarnermut nunalerinermullu attuumassuteqartuni piffissaatillugu Ataatsimiititaliap ilaasortaanik akuutitsinissap tusarniaasarnerullu isumannaarnissaannut Aalisarnermut ataatsimiititaliap Naalakkersuisoq kaammattorpaa.
Inuiaqatigiit soqutigisarivaat Ataatsimiititaliap aamma Naalakkersuisut akornanni pitsaasumik tatigeqatigiiffiusumillu suleqatigiinnissaq, tamatumanimi peqatigiilluta aalisarneq - nunatsinni inuiaqatigiinni tunngaviusoq - nukittorsarlugulu siuarsarsinnaavarput.
Nikolaj Jeremiassen
Aalisarnermut, Piniarnermut Nunalerinermullu Ataatsimiititaliap siulittaasua
Paasissutissat annertunerusut Nikolaj Jeremiassen mobil +299 53 32 63-imut saaffiginninnikkut pissarsiarineqarsinnaapput.