2024 2023 2022 Flere år...
26-10-2013
Professor Arne Villumsen sølviusumik Nersornaaserneqarpoq
Inatsisartut Siulittaasuata Lars-Emil Johansenip ullumi Københavnimi Bryggenimi nalliuttorsiorpaluttumik katerisimaarnermi professor Arne Villumsen sølviusumik Nersornaaserpaa.
Inatsisartut Siulittaasoqarfiata professor Arne Villumsen sølviusumik Nersornaaserpaat piffissami sivisuumi annertuumillu Sisimiuni Issittumi Teknikkikkut Paasisimasat pillugit Ilinniarfimmi Danmarks Tekniske Universitet suleqatigalugu issittumi ingeniøritut ilinniartitaanermik ineriartortitsisimanermigut nersortarialimmik sullissisimanera pissutigalugu.
Inatsisartut Siulittaasuata Arne Villumsenimut oqaaseqarnermini ilaatigut makku erseqqissarpai:
"2006-imi Danmarks Tekniske Universitetimi (DTU) pisortaatillutit Sisimiuni issittumi teknikikkut paasisimasat pillugit ilinniarfimmi ARTEK-imi ulluinnarni aqutsisunngorputit, tamatumalu kingorna ARTEK-ip nunat tamalaat akornanni unammillersinnaasutut inissisimalernissaa annertuumik sulissutigisimallugu.
Ullumikkut takusinnaavarput ilinniarfik ingerlalluartoq suliniummullu naatsorsuutigisimasat allaat sipporneqarsimasut. Ilinniarfik ullumikkut ingerlalluarpoq ilisimatusarnikkut paasisat nutaaliornerillu ulluinnarni atorneqarsinnaasunngortinneqartarlutillu inuussutissarsiornikkut ingerlateqqitassanngortinneqaqqittarlutik piujuarsinnaasut. Sanaartornerup, nukissiornerup avatangiisillu eqqarsaatigalugit nutaaliorsinnaassuseq qaffassarniarlugi Nutaaliorfik ilinniarfimmut atasoq Kalaallit Nunaanni suliffeqarfinnik, aallarnisaasartunik, nassaartortunik ilisimatusartunillu suleqateqarpoq siunissamut neriulluarnartumik."
Lars-Emil Johansen
Inatsisartut Siulittaasuat
Paasissutissat sukumiinerusut Inatsisartut Siulittaasuat Lars-Emil Johansen, angallattagaq 55 19 15, attaveqarfigalugu pissarsiarineqarsinnaapput.