2024 2023 2022 Flere år...
29-10-2013
Juliane Henningsen aamma Kim Kielsen Inatsisartut sinnerlugit Oslomi ulluni 29-31. oktober 2013 Nunat Avannarliit Siunnersuisoqatigiiffiata ataatsimiinneranut peqataapput
Inatsisartut Nunat Avannarliit Siunnersuisoqatigiiffiannut ilaasortaatitaat Juliane Henningsen aamma Kim Kielsen Oslomi ataatsimiittarnissarpassuit ulloq 28. oktober 2013 ullaakkut aallartereerpaat, siunnersuisoqatigiiffiup ataatsimiinnissaa sioqqullugu partiikkaarluni ataatsimiittarnerit aallartinneqarmata. Ualikkut marluullutik Savalimmiunit, Ålandimit Kalaallit Nunaannillu inatsisartunut ilaasortat naalakkersuisullu sinniisaasa ataatsimut ataatsimiinneranni peqataapput. Ulloq naggaserneqarpoq Nunat Avannarliit Siunnersuisoqatigiiffiata aamma Nunat Avannarliit Killiit Siunnersuisoqatigiiffiata siulittaasoqarfiisa ataatsimeeqatigiinnerannut peqataanermik.
Ullumikkut marluullutik Avatangiisinut Pinngortitamilu Pisuussutinut Ataatsimiititaliami ataatsimeeqataassapput, siunnersuisoqatigiiffiup ualimut ataatsimiilernissaa sioqqullugu suliassaat kingulliit isumagalugit. Ataatsimiinnermi ilaatigut aalajangerneqassaaq ukiup kingulliup ingerlanerani ataatsimiititaliap suliarisimasai pillugit ilaasortat kikkut oqaaseqartartuussanersut. Rio + 20 malitseqartillugu piujuaannartitsinermik tunngavilimmik ineriartortitsineq pillugu nassuiaat siunnersuisoqatigiiffiup ataatsimiinnermi naggaserneqassaaq. Tamatuma saniatigut piujuaannartitsinermik tunngavilimmik ineriartortitsinissamut aalajangersimasumik suliniutissanut Ministerit Siunnersuisoqatigiiffiata siunnersuutai oqaaseqarfigineqassapput, soorlu aamma sananeqaatit qinersit aqqutigalugit timitsinnik innarliisinnaasut ulorianaataat annikillisinniarlugit nunat avannarliit suliniutissaattut ataatsimiititaliap siunnersuutai oqaaseqarfigineqarnissaat naatsorsuutigineqartoq.
Nunat Avannarliti Siunnersuisoqatigiiffiata ataatsimiinnera pisarnertut aamma nunat avannarliit kulturikkut suleqatigiinnerannik malunnartitsiniaaviusussaavoq, tamannalu tunngavigalugu ataatsimiinnermut peqataasut tamarmik aqagu Nunat Avannarliit nersornaasiinissaarsuannut qaaqqusaapput, tassani 2013-imut Nunat Avannarliit Siunnersuisoqatigiiffiata filmiliornermut, meeqqanut inuusuttunullu atuakkiornermut, avatangiisinut, nipilersornermut kiisalu atuakkiornermut nersornaasiuttagai tunniunneqassallutik.
2014 eqqarsaatigalugu Avatangiisinut Pinngortitamilu Pisuussutinut Ataatsimiititaliap ilaatigut silap pissusiinut tunngatillugu suliani ingerlateqqinniarpai, nunarsuarmioqatigiit isumaqatigiinniarneri pilersaarutit malillugit 2015-imi naammassineqartussat siuarsarniarlugit nunat avannarliit qanoq iliuuseqarsinnaanerat pingaartillugu. Taamatuttaaq ataatsimiititaliap 2014-imi piujuaannartitsinermik tunngavilimmik takornarniartitsisarneq immikkut sammillugu issittumut tunngasunik suliaqarnini ingerlateqqinniarpaa. Ataatsimiititaliaq taamatuttaaq 2014-imi suliassaqarfimmini naalakkersuinikkut aporaaffiusinnaasut aalajangersimasut pillugit EU-mut attaveqarnerusussaavoq, ilaatigut silap pissusii, nukissiorneq sananeqaatillu qinersit aqqutigalugit timtisinnik innarliisinnaasut pillugit.
Nunat Avannarliit Siunnersuisoqatigiiffianni ileqquusumik ataatsimiinnerit tullii 2014-imi ulluni 21.-22. januar Danmarkimi ingerlanneqassapput.
Paasissutissat sukumiinerusut Juliane Henningsen angallattagaq +299 48 81 48 aamma Kim Kielsen angallattagaq +299 54 86 92 attaveqarfigalugit pissarsiarineqarsinnaapput.
Nunat Avannarliit Siunnersuisoqatigiiffiat inatsisartutigoortumik suleqatigiiffiuvoq Norgemit, Danmarkimit, Sverigemit, Finlandimit, Islandimit nunanillu namminersorfiusunit Ålandimit, Savalimmiunit Kalaallit Nunaanniillu inatsisartunut ilaasortanit 87-init ilaasortaaffigineqartoq.
Inatsisartut Nunat Avannarliit Siunnersuisoqatigiiffianni marlunnik ilaasortaatitaqarput sinniisussalinnik. Inatsisartunut ilaasortat Juliane Henningsen, Inuit Ataqatigiit, aamma Kim Kielsen, Siumut, ilaasortaapput, Naaja Nathanielsen, IA, aamma Per Berthelsen, S, sinniisussaralugit. Juliane Henningsen aamma Kim Kielsen marluullutik Avatangiisinut Pinngortitamilu pisuussutinut Ataatsimiititaliaanut ilaasortaalluni.