2024 2023 2022 Flere år...
08-11-2013
Islandip nunanut allanut tunngasunut ministeria Inatsisartut Siulittaasuannut pulaarpoq
Nuummi Islandip sinniisoqarfiata generalkonsulatip ammarneqarneranut atatillugu Islandip nunanut allanut tunngasunut ministeriata Gunnar Bragi Sveinssonip Islandip generalkonsulitaava Petur Asgierson ilagalugu ullumi Inatsisartut Siulittaasuannut pulaarput. Inatsisartut Siulittaasuat tamatumunnga atatillugu aamma Nunat Avannarliit Killiit Siunnersuisoqatigiiffiata siulittaasoqarfiani aama siulittaasup tulleraa.
Ullumi kingusinnerusukkut sinniisoqarfittaaq pisortatigoortumik ammarnersiorneqassaaq.
Tamatumunnga atatillugu taamatuttaaq Nunat Avannarliit Killiit Siunnersuisoqatigiiffiata siulittaasua Unnur Bra Konradsdottir sinniisoqarfiup ammarneqarneranut qaaqquneqarsimavoq Nunat Avannarliit Killiit Siunnersuisoqatigiiffiata allattaanera Thordur Thorarinsson peqatigalugu.
Islandimip sinniisoqarfiata ammarnersiorneqarneranut peqataaneq uagutsinnut immikkut nuannaarutissaavoq, tassami tamanna Nunat Avannarliit Killiit Siunnersuisoqatigiiffiata 2007-imi aalajangersakkatut kaammattuutaata inernerimmagu. Nunat Avannarliit Killiit Siunnersuisoqatigiiffiata siulittaasuata tulliatalu taamaalillutik ullumi pisoq Nunat Avannarliit Killiit Siunnersuisoqatigiiffiannut 2014-imi januaarimi siunnersuisoqatigiiffik Savalimmiuni aalajangersimasumik qulequtaqartitsilluni ataatsimeersuartitsilerpat nalunaarutigissavaat, qularnanngitsumillu nuannaarutissatut tiguneqassalluni.
Lars-Emil Johansen
Inatsisartut Siulittaasuat
Paasissutissat sukumiinerusut Inatsisartut Siulittaasuat Lars-Emil Johansen, angallattagaq 55 19 15, attaveqarfigalugu pissarsiarineqarsinnaapput.
