2024 2023 2022 Flere år...
21-11-2013
Aalisarnermut ataatsimiititaliap Aalisarnermut, Piniarnermut Nunalerinermullu Naalakkersuisumik suleqateqarusuppoq
Aalisarnermut ataatsimiititaliamik attaveqarneq pitsaanerusariaqaraluartoq Naalakkersuisunut ilaasortap Karl Lyberthip nassuerutigaa, taamaattorli suleqatigiinnerup pitsanngornissaanut suli iliuuseqarsimanani - akerlianilli.
Ataatsimiititaliaq paasissutissanik tusagassiorfiit aqqutigalugit pissarsiniartariaqartarnera, kiisalu aalisarnermi allannguutissatut pilersaarutigineqartut iliuusissallu pillugit Naalakkersuisup Ataatsimiititaliamik ilisimatitsisannginnera isornarpoq.
Tamanna Ataatsimiititaliap ull. 23. oktober 2013 tusagassiorfitsigut uparuaatigereerpaa. Ataatsimiititaliaq Naalakkersuisunut ilaasortamit akissutisisimanngilaq, taamaattorli Sermitsiaakkut (nr. 46 ull. 15. november 2013) Ataatsimiititaliap paasisimavaa, nammineq avatimilu akornanni attaveqatigiinnerup pitsaanerusinnaagaluarnera nassuerutigisimagaa, attassinnaasaminillu aaqqiissutissaminik nassaarniartoq. Tamanna pillugu Ataatsimiititaliaq isumaqataavoq.
Ataatsimiititaliap Naalakkersuisunut ilaasortaq suleqatigerusuppaa, taamaattorli Naalakkersuisunut ilaasortap akunnialunnguanik periarfissiilluni sammisassatullu kissaatigineqartut nassuiaateqarfiginagit ataatsimiigiaqqusisarnera ajornartorsiutitut isigalugu. Taamaattumillu ataatsimiittarnerit suleqatigiinnit piareersarnissamulluunniit periarfississutigineqanngitsut ingerlanneqarnissaannut suleqatigiinnerup qanoq pitsanngortinneqarsinnaanera takorlooruminaappoq.
Taamaattumik Ataatsimiititaliamik suleqateqarnerup siuarsarnissaanut, tamatumanittaaq aalisarnermut, piniarnermut nunalerinermullu tunngassuteqartuni apeqqutit naleqquttut pillugit Ataatsimiititaliamik paasissutissiisarnissamik akuutitsisarnissamillu Ataatsimiititaliaq Naalakkersuisunut ilaasortamut kaammattuuteqaqqikkusuppoq.
Nikolaj Jeremiassen
Aalisarnermut, Piniarnermut Nunalerinermullu ataatsimiititaliami siulittaasoq
Paasisarnerorusunnermi Ataatsimiititaliami siulittaasoq attavigineqarsinnaavoq mobil +299 53 32 63.